رەسەيدە پرەزيدەنت سايلاۋى باستالدى. ءبىرىنشى بولىپ سايلاۋ ۋچاسكەلەرى اشىلعان كامچاتكا ايماعىنىڭ تۇرعىندارى داۋىس بەرەدى. رەسەيدەگى سايلاۋ 15-17 ناۋرىز ارالىعىندا وتەدى.

رەسەي وسك-ءسى داۋىس بەرۋدىڭ الدىن الا قورىتىندىلارىن 18 ناۋرىز كۇنى جاريالايدى. 25 اقپان مەن 14 ناۋرىز ارالىعىندا پرەزيدەنت سايلاۋىندا مەرزىمىنەن بۇرىن داۋىس بەرۋ شالعاي ايماقتاردا جانە جەتۋگە قيىن جەرلەردە، سونىڭ ىشىندە پوليارلىق ستانتسيالار مەن ءجۇزۋ كەمەلەرىندە ءوتتى.

سونىمەن، ناتيجەسى ويتالقى تۋدىرمايتىن رەسەيدەگى بۇل سايلاۋدا پرەزيدەنتتىكتەن كىمدەر ۇمىتكەر؟

باستى فاۆوريت - ۆلاديمير پۋتين (قازىرگى پرەزيدەنت).

ول سايلاۋعا بەسىنشى رەت قاتىسۋدا. پۋتين ەكى جىل بۇرىن ۋكرايناعا باسىپ كىرىپ، ونىڭ اۋماعىنىڭ ءبىر بولىگىن اننەكسيالاي باستادى. حالىقارالىق قىلمىستىق سوت 2023 جىلى ۋكراينالىق بالالاردى دەپورتاتسيالاۋعا بايلانىستى ءپۋتيندى قاماۋعا الۋعا وردەر شىعاردى. ءوزىنىڭ بۇرىنعى مەرزىمىندە كونستيتۋتسيانى قايتا جازىپ، ءوزىنىڭ پرەزيدەنتتىك مەرزىمىن جويىپ، رەسەيدىڭ ىشىندەگى ساياسي قۋعىن-سۇرگىندەردى كۇشەيتىپ، ەڭ كورنەكتى وپپوزيتسيونەرلەردى تۇرمەگە وتىرعىزىپ، وزگەسىن ەلدەن قۋدى.

وسى سايلاۋدا ول كەمى 80% داۋىس الۋى مۇمكىن. قازىرگى زاڭدار پۋتينگە 2036 جىلعا دەيىن بيلىكتە قالۋعا مۇمكىندىك بەرەدى.

سۋرەت: bbc.com

ونان وزگەلەرى: 

نيكولاي حاريتونوۆ - رەسەي كومپارتياسىنىڭ ۇمىتكەرى. ول ۇگىت-ناسيحات كەزىندە «بولاشاق ءۇشىن سولعا بۇرىلۋدى» ۇسىنادى جانە ءپۋتيندى سىنامايتىنىن باسا ايتادى. 2022 جىلى باتىستىڭ سانكتسيالارىنا تاپ بولدى. ۋكراينانى «دەناتسيفيكاتسيالاۋدى» قولدادى.

لەونيد سلۋتسكي - لدپر-دان كانديدات. جيرينوۆسكي جولىن جالعاۋشى جانە ونىڭ پارتياسىن باسقارۋشى. ۇگىت كومپانياسىن دا سول جيرينوۆسكيدىڭ اتىنان جۇرگىزدى.

ۆلاديسلاۆ داۆانكوۆ - «جاڭا ادامداردان» كانديدات.  مەملەكەتتىك دۋمادا سوعىس ءۇشىن داۋىس بەرگەن «بەيبىتشىلىكتى» جاقتاۋشى كانديدات. رەسەيدەگى تانىمال ساياساتكەر دەي المايمىز. 2023 جىلى ماسكەۋ مەرىن سايلاۋعا قاتىسىپ، 5%-دان ءسال اسا داۋىس جيناعان.

ول دا ۋكراينا اۋماعىن اننەكسيالاۋدى قولداپ داۋىس بەرگەن. سول ءۇشىن حالىقارالىق سانكتسيالارعا ۇشىراعان.

ءپۋتيننىڭ جولى

پۋتين رەسەي بيلىگىندە 2000 جىلدان بەرى كەلە جاتقان ادام. بۇل جولعى سايلاۋدىڭ دا ناتيجەلەرى ەشكىمدى تاڭ قالدىرا قويمايتىنى ايدان انىق.

2020 جىل. رەسەي كونستيتۋتسياسى رەفورمالاندى. ءوزى بيلىككە كەلگەن العاشقى جىلدارى كونستيتۋتسيانى ەش وزگەرتپەۋگە ۋادە بەرەگن پۋتين سول ۋادەسىن بۇزدى. ءوزىنىڭ وسىعان دەيىنگى پرەزيدەنتتىك مەرزىمدەرىن نولگە تەڭەستىرىپ، تاعى سايلاۋعا قاتىسۋعا جول اشتى. ونان كەيىن سوعىس باستادى. ءپۋتيننىڭ شيرەك عاسىرلىق بيلىگىن ىقشامداپ ايتقاندا وسى.

Abai.kz