بۇگىن پرەزيدەنت توقاەۆتىڭ توراعالىعىمەن سۋ تاسقىنىنا قارسى شارالاردى ۇيلەستىرۋ جانە قارعىن سۋ ءجۇرۋ كەزەڭىنىڭ سالدارىن جويۋ جونىندەگى رەسپۋبليكالىق شتابتىڭ وتىرىسى ءوتتى. قاسىم-جومارت توقاەۆ ۇكىمەتكە، قۇزىرلى مەملەكەتتىك ورگاندارعا جانە وبلىس اكىمدەرىنە بىرقاتار تاپسىرما بەردى.

قازىرگى باستى مىندەت – ادام شىعىنىنا جول بەرمەۋ!

«بيىلعى قارعىن سۋ اۋقىمى جاعىنان سوڭعى 30 جىلداعى ەڭ ءىرى سۋ تاسقىنى سانالعان 2012 جانە 2017 جىلدارداعى دەڭگەيدەن اسىپ كەتتى. بۇل نەنى بىلدىرەدى؟ بولجام جۇمىستارى مۇلدەم بولماعان. جاعداي سالالىق مامانداردىڭ تاپشىلىعىنان تۋىنداپ وتىر. ەگەر اكىمدىكتەر جىل سايىن سۋ تاسقىنىنا قارسى جوسپارلانعان بارلىق ءىس-شارانى ءتيىستى دەڭگەيدە جۇزەگە اسىرعاندا، اۋا-رايى جاعدايىن ەسكەرگەننىڭ وزىندە، اپاتتىڭ سالدارى مەن اۋقىمى مۇنشالىقتى بولماس ەدى. سوعان قاراعاندا، اكىمدىكتەر بۇل جۇمىستارمەن اينالىسپاعان. قازىر سۋ تاسقىنىنان تونەتىن قاۋىپ سەيىلدى دەۋگە كەلمەيدى.

سوندىقتان ىشكى ىستەر مينيسترلىگىنىڭ، ۇلتتىق ۇلاننىڭ، قارۋلى كۇشتەردىڭ، ۇلتتىق قاۋىپسىزدىك كوميتەتىنىڭ بارلىق كۇشى مەن قۇرالىن، ونىڭ ىشىندە كادرلىق جانە تەحنيكالىق رەسۋرسىن بارىنشا جۇمىلدىرۋ قاجەت. سونىمەن قاتار ەرىكتىلەردى، جاردەم بەرگىسى كەلەتىن ازاماتتاردى تارتۋ كەرەك. الايدا، ەڭ باستىسى – مەملەكەتتىك ورگاندار. احۋال كەز كەلگەن ساتتە ۋشىعىپ كەتۋى مۇمكىن. قازىرگى باستى مىندەت – ادام شىعىنىنا جول بەرمەۋ. بۇل ورايدا جىبەرىلگەن قاتەلىكتەر مەن ولقىلىقتاردى ەسكەرۋىمىز قاجەت»، – دەدى پرەزيدەنت.

تاسقىننان زارداپ شەككەن ادامدارعا كومەك كورسەتىلسىن!

«سۋ تاسقىنىنان زارداپ شەككەن ادامدارعا ءتيىستى بارلىق كومەك كورسەتىلسىن. بۇل ماقساتقا ۇكىمەتتىڭ جانە اكىمدىكتەردىڭ رەزەرۆىن عانا ەمەس، «قازاقستان حالقىنا» قورىنىڭ قارجىسىن دا پايدالانۋ قاجەت. وسىنداي جاۋاپتى ساتتە ەلىمىزدەگى بيزنەس وكىلدەرىن حالىققا قول ۇشىن سوزۋعا شاقىرامىن. اپاتتان زارداپ شەككەن ازاماتتارعا جانە ايماقتارعا بارىنشا قولداۋ كورسەتۋ كەرەك. بۇل – ءدال قازىرگى كەزەڭدە بارشاعا ورتاق مىندەت. قارعىن سۋدان قاتتى شىعىنعا ۇشىراعان باتىس ايماقتاردا ءىرى كاسىپورىندار كوپ. «سامۇرىق-قازىنا» قورىنا قاراستى كومپانيالار، جەر قويناۋىن يگەرۋشىلەر بار. ولار حالىققا جاردەم بەرىپ، بۇلىنگەن ينفراقۇرىلىمدى قالپىنا كەلتىرۋگە اتسالىسادى دەپ سەنەمىن»، – دەدى مەملەكەت باسشىسى.

جاۋاپتى ورگانداردىڭ جۇمىسى ناشار ۇيىمداستىرىلعان!

پرەزيدەنت سۋ باسقان ايماقتاردا الەۋمەتتىك ماڭىزى بار قىزمەتتەر مەن ازىق-تۇلىك باعاسىنىڭ وسۋىنە جول بەرمەۋ ماسەلەسىنە ۇكىمەت نازارىن اۋداردى.

«سۋ تاسقىنى مەن ورتكە قاتىستى جاعداي جىل سايىن قايتالانادى. جاۋاپتى ورگاندار مەن سالالىق قىزمەتتەردىڭ (قازسۋشار، قازگيدرومەت) جوبالاۋ، ساراپتاما جاساۋ جۇمىستارى ناشار ۇيىمداستىرىلعان. ءتيىستى شارالار، نەگىزىنەن، جاعداي ورىن العاننان كەيىن نەمەسە تولىققاندى بولجام جاسالماي قابىلدانادى. سوندىقتان بىزگە داعدارىس جاعدايلارىن بولجاۋدىڭ ناقتى تەتىگى وتە قاجەت. تسيفرلىق دامۋ مينيسترلىگى ەكولوگيا، سۋ رەسۋرستارى جانە توتەنشە جاعدايلار مينيسترلىكتەرىمەن بىرلەسىپ جىل سوڭىنا دەيىن بارلىق ىقتيمال توتەنشە جاعدايلاردى (سۋ تاسقىنى، ءورت جانە ت.ب.) مودەلدەۋگە، ءتيىستى بولجامدار، ۇسىنىمدار مەن ءىس-قيمىل جوسپارىن جاساۋعا مۇمكىندىك بەرەتىن اقپاراتتىق جۇيە ازىرلەۋگە ءتيىس.

ايتپاقشى، ۇكىمەت پەن جەرگىلىكتى اتقارۋشى ورگاندار، ەڭ الدىمەن، وبلىستاردىڭ اكىمدەرى جازعى ماۋسىمعا دا دايىن بولۋى قاجەت. ءورت نەمەسە باسقا دا تابيعي اپاتتاردىڭ بولۋى ابدەن مۇمكىن. قازىرگىدەي قامسىز وتىرماي، الدىن الا ارەكەت ەتۋ كەرەك. سۋ تاسقىنىن كورگەندە، كوكتەن تۇسكەندەي ابدىراپ قالدىڭىزدار. وسى رەتتە ەلىمىزدىڭ شىعىس وڭىرلەرىندەگى سۋ تاسقىنىن مودەلدەۋ جونىندەگى تجم مەن «قازاقستان عارىش ساپارى» ۇلتتىق كومپانياسىنىڭ بىرلەسكەن جۇمىس تاجىريبەسىن قولدانۋعا بولادى»، – دەدى قاسىم-جومارت توقاەۆ.

پرەزيدەنت قارعىن سۋدى اۋىل شارۋاشىلىعى قاجەتىنە جاراتۋ ءۇشىن جوسپار ازىرلەۋ جانە پارمەندى شارالار قابىلداۋدى تاپسىردى. ونىڭ ايتۋىنشا، اكىمدىكتەر ەرىگەن قار سۋىن ەلدى مەكەندەردەن وزەن ارنالارىنا نەمەسە توعاندارعا بۇرۋ جۇمىستارىن جۇرگىزۋى كەرەك.

نۇرجىگىتوۆتىڭ 2030 جىلعا دەيىنگى تۇجىرىمداماسى سىن كوتەرمەيدى!

مەملەكەت باسشىسى ۇكىمەت بەكىتكەن سۋ رەسۋرستارىن باسقارۋ جۇيەسىن دامىتۋدىڭ 2030 جىلعا دەيىنگى تۇجىرىمداماسىن سىنعا الدى.  ونىڭ پىكىرىنشە، تۇجىرىمدامانى جۇزەگە اسىرۋ جونىندەگى ءىس-قيمىل جوسپارى دەكلاراتيۆتىك سيپاتقا يە. قۇجات سۋ تاسقىنى سالدارىنان بولاتىن شىعىننىڭ الدىن الۋ جانە ازايتۋ ماسەلەسىن كەشەندى تۇردە شەشۋگە مۇمكىندىك بەرمەيدى. سوندىقتان تۇجىرىمدامانى قايتا قاراۋ جونىندە مىندەت جۇكتەلدى.

«قۇزىرلى مەكەمەلەر، ياعني اكىمدىكتەر، توتەنشە جاعدايلار مينيسترلىگى، سۋ رەسۋرستارى مينيسترلىگى بىرلەسىپ جۇمىس جاسامايدى. جاۋاپكەرشىلىك الۋدان قاشادى. جۇمىستى ءبىر-بىرىنە سىلتەپ وتىرادى. جاعداي وسىلاي جالعاساتىن بولسا، ءتيىستى قىزمەتكەرلەردى لاۋازىمىنان بوساتۋ قاجەت. ەڭ باستى كريتەري – مەملەكەتتىك قىزمەتشىلەردىڭ تيىمدىلىگى. مەملەكەتتىك ورگاندار جانە اكىمدىكتەر اراسىندا ناقتى ءارى تۇراقتى بايلانىس الگوريتمى جوق. ءتيىستى مينيسترلىك ەلىمىزدىڭ تابيعي اپاتتارعا دايىندىعىن قاداعالاپ وتىرۋى قاجەت. بۇل – مينيسترلىكتىڭ نەگىزگى ماقساتى. وسى ماسەلەگە باسا نازار اۋدارۋ كەرەك. مينيسترلىك گيدروتەحنيكالىق جانە باسقا دا ماڭىزدى نىسانداردىڭ جاعدايىن تەكسەرىپ، شىنايى مالىمەت بەرىپ وتىرۋعا ءتيىس»، – دەدى پرەزيدەنت.

مەملەكەت باسشىسى سۋ تاسقىنى ماسەلەسى بويىنشا حالىقارالىق تاجىريبەنى، وزگە ەلدەردىڭ قارعىن سۋدى قالاي يگەرەتىنىن مۇقيات زەرتتەۋ قاجەت ەكەنىن ايتتى.

ۇكىمەتكە جۇكتەلەر جۇمىس كوپ. تالاپ قاتاڭ بولادى!

جيىن بارىسىندا قاسىم-جومارت توقاەۆ ەلىمىزدە سۋ رەسۋرستارى، يرريگاتسيا سالالارى بويىنشا تەحنيكالىق مامانداردىڭ تاپشىلىعىنا نازار اۋداردى.  وسىعان قاتىستى ۇكىمەتكە شۇعىل تۇردە شەشىم قابىلداۋدى تاپسىردى.

«تاعى دا قايتالاپ ايتامىن. تاسقىننىڭ الدىن الۋ ىسىنە ءاربىر لاۋازىم يەسى تىكەلەي جاۋاپ بەرۋگە ءتيىس. سىزدەردىڭ جۇمىستارىڭىزدى نەمقۇرايلى جانە كاسىبي مىندەتكە ساي كەلمەيدى دەپ باعالادىم. سونىڭ سالدارىنان ازاماتتارىمىز ۇلكەن ماتەريالدىق شىعىنعا ۇشىرادى. ولار دەنساۋلىعى مەن ءال-اۋقاتىنا زيان كەلتىرەتىن تۇرمىستىق قولايسىزدىقتارعا تاپ بولدى. ارينە، مەملەكەت شىعىندى وتەۋ ءۇشىن شارالار قابىلدايدى. ازاماتتارعا ايتارىم، الاڭداماڭىزدار. مەملەكەت، سونداي-اق كاسىپكەرلەر بارلىق شىعىندى وتەپ بەرەدى. بىراق قارجىلىق جانە ساياسي شىعىندار وراسان زور. ونى دا ەسكەرۋ كەرەك. سوندىقتان ۇكىمەتكە جۇكتەلەر جۇمىس كوپ. قىسقاسى، تالاپ قاتاڭ بولادى»، – دەدى پرەزيدەنت.

وتىرىس بارىسىندا پرەمەر-مينيستر ولجاس بەكتەنوۆ, توتەنشە جاعدايلار ءمينيسترى شىڭعىس ءارىنوۆ, اقتوبە وبلىسىنىڭ اكىمى اسحات شاحاروۆ, باتىس قازاقستان وبلىسىنىڭ اكىمى ناريمان تورەعاليەۆ, قوستاناي وبلىسىنىڭ اكىمى قۇمار اقساقالوۆ, شىعىس قازاقستان وبلىسىنىڭ اكىمى ەرمەك كوشەرباەۆ, قاراعاندى وبلىسىنىڭ اكىمى ەرماعانبەت بولەكپاەۆ, اقمولا وبلىسىنىڭ اكىمى مارات احمەتجانوۆ, سولتۇستىك قازاقستان وبلىسىنىڭ اكىمى عاۋەز نۇرمۇحانبەتوۆ, ۇلىتاۋ وبلىسىنىڭ اكىمى بەرىك ابدىعاليۇلى جانە اباي وبلىسىنىڭ اكىمى نۇرلان ۇرانحاەۆ بايانداما جاسادى.

Abai.kz