بۇگىن Abai.kz اقپاراتتىق پورتالىنىڭ قۇرىلعانىنا 15 جىل. ءبىزدىڭ ۇجىم وسى ءبىر دوڭگەلەك داتاعا ورايلاستىرىپ بىرقاتار ءىس-شارالار جوسپارىن ازىرلەگەن. الايدا توسىننان بولعان تاسقىن سۋ ەلىمىزدىڭ ونداعان ءوڭىرىن باسىپ، ەلىمىز توتەنشە جاعدايدى باستان كەشىرۋدە. مۇنداي الاعاي دا بۇلاعاي ۋاقىتتا Abai.kz اقپاراتتىق پورتالى دا توي-تويلاپ جاتۋدى ءجون سانامادى.

دەسە دە، پورتال وقىرماندارىنا قر مادەنيەت جانە اقپارات ءمينيسترى ايدا عالىمقىزى بالاەۆانىڭ قۇتتىقتاۋ حاتىن ۇسىنعاندى ءجون كوردىك.

Abai.kz اقپاراتتىق پورتالىنا

قۇرمەتتى ارىپتەستەر!

سىزدەردى Abai.kz اقپاراتتىق پورتالىنىڭ 15 جىلدىق مەرەيتويىمەن شىن جۇرەكتەن قۇتتىقتايمىن!

ۇلى ابايدىڭ اتىن ارقالاپ، ەلىمىزدىڭ اقپاراتتىق كەڭىستىگىنە ايشىقتى باعىت-باعدارىمەن قوسىلعان پورتال تىڭ تاقىرىپتارىمەن، ەرەكشە ايدارلارىمەن مىڭداعان وقىرماننىڭ ىستىق ىقىلاسىنا بولەندى.

ون بەس جىلدىق تاريحىندا بەلگىلى قالامگەر داۋرەن قۋاتتىڭ جەتەكشىلىگىمەن ەل مۇددەسىن قوزعاعان وزەكتى ماسەلەلەر كوتەرىپ، ۇلت زيالىلارىنىڭ مارتەبەلى مىنبەرىنە، ەركىن پىكىر الاڭىنا اينالدى.

پورتال بۇگىندە مەملەكەتىمىزدىڭ قالىپتاسۋى مەن رۋحانياتىمىزدىڭ دامۋى، ەلىمىزدىڭ ساياسي-ەكونوميكالىق، الەۋمەتتىك-تۇرمىستىق، ادەبي-مادەني ءومىرىنىڭ جان-جاقتى جاندانۋى جولىندا قاجىرلى قىزمەت ەتىپ كەلەدى.

كاسىبي ماماندار شوعىرىن قالىپتاستىرعان ۇجىمعا تولايىم تابىس، شالقار شابىت پەن جارقىن جەتىستىكتەر تىلەيمىن!

وزىندىك قولتاڭباسى قالىپتاسقان Abai.kz اقپاراتتىق پورتالىنىڭ عۇمىرى ۇزاق بولسىن!

قۇرمەتپەن،

مينيستر ايدا بالاەۆا

Abai.kz