قازاقستان رەسپۋبليكاسىنىڭ پرەمەر-مينيسترىنە!

قۇرمەتتى ارىپتەستەر!

مەنىڭ دە ساۋالىم ارىپتەسىم ماقسات تولىقبايدىڭ كوتەرگەن ماسەلەسىمەن تولىعىمەن ۇندەس.

دانا حالقىمىز «تازا بولسا تابيعات، امان بولار ادامزات» دەپ بەكەر ايتپاعان. بۇل ءسوزدىڭ ءمانى تەرەڭ. ويتكەنى ادام بالاسىنىڭ بۇكىل تۇرمىس-تىرشىلىگى، بارشا ءومىرى تابيعاتپەن بىتە-قايناسىپ جاتىر. قورشاعان ورتانىڭ ادام ساۋلىعى مەن جاي-كۇيىنە تىكەلەي اسەر ەتەتىنى ءسوزسىز. سوندىقتان ماڭايىمىزدى تازا ۇستاۋ، قورشاعان ورتانى كۇتىپ-باپتاۋ، تابيعاتتى ايالاۋ وتە ماڭىزدى.

مەن وڭىرلەردى كوپ ارالايمىن. جۇرتپەن ءجيى كەزدەسەمىن. جولدا كوپ جۇرەمىن. كەيدە تاڭقالارلىعى كەيبىر پىسىقايلار كولىكتە كەلە جاتىپ تەرەزەسىنەن بوس بوتەلكەلەرىن، قوقىس قالدىقتارىن، تەمەكى تۇقىلىن ەشبىر الاڭداماي لاقتىرا سالادى. قوعامدا ءالى دە ازاماتتارىمىزدىڭ قالدىقتاردى ارنايى قوقىس تاستايتىن ورىندارعا سالۋ مادەنيەتى قالىپتاسپاي وتىرعانى جاسىرىن ەمەس.

مىسالى، پلاستيك، اينەك جانە پوليەتيلەن پاكەتتەردىڭ ءشىرۋى 1000 جىلعا دەيىن سوزىلادى. مۇنىڭ جەر انامىزعا، ادامزات بالاسىنا، كەلەر ۇرپاققا تيگىزەر زالالى زور.

وسى رەتتە، دامىعان ەلدەردەگىدەي تازالىق مادەنيەتىن قالىپتاستىراتىن شارالاردى قولعا الۋ كەرەك. ونىڭ شەشىمى – جالپى جۇرتتى قورشاعان ورتانى تازالاۋعا جاپپاي جۇمىلدىرۋ، كۇندەلىكتى تازالىقتى ءومىر سالتىمىزعا اينالدىرۋ قاجەت.

مىسالى، اپتانىڭ تاعى ءبىر كۇنىن، ناقتىلاپ ايتساق، ءار بەيسەنبىنى «تازا بەيسەنبى» اتتى شىنايى حالىقتىق شاراعا اينالدىرايىق.

ادامداردى ماجبۇرلەپ ەمەس، ال كەرىسىنشە ءوز ىقىلاسىمەن، تۇرعان جەرىنە دەگەن جاناشىرلىقپەن اتسالىسۋىنا جاعداي جاسايىق. ءبىز سول كەزدە عانا كۇن-ءتۇن دەمەي، كۇننىڭ ىستىق-سۋىعىنا قاراماي كوشەنى تازالاپ جۇرگەن اتا-اپالارىمىزدىڭ ەڭبەگىن باعالاۋدى ۇيرەنەمىز.

ول ءۇشىن الەۋمەتتىك جەلىدەگى ميلليونداعان وقىرمانى بار تانىمال تۇلعالاردى، قوعام بەلسەندىلەرىن، ەل تۇرعىندارىن وسى ورتاق ىسكە بىرگە اتسالىسۋعا شاقىرامىن.

قادىرلى اعايىن، قاشاندا ۇيىمداسقان – ۇتاتىنىن، بىرىككەن – جەڭەتىنىن بىلگەن ۇلتپىز! 

داۋلەت مۇقاەۆ،

ءماجىلىس دەپۋتاتى

Abai.kz