جازعى وليمپيادانىڭ العاشقى ءۇش كۇنىندە قازاقستان سپورتشىلارى ءۇش جۇلدە ولجالادى.

27 شىلدەدە دزيۋدودان 60 كەلى سالماقتا سىنعا تۇسكەن ەلدوس سمەتوۆ فينالدا فرانتسيا اتىنان سىنعا تۇسكەن گرۋزين لۋكا محەيدزەنى جەڭىپ، قازاق دزيۋدوسى تاريحىنداعى العاشقى التىن مەدالعا قول جەتكىزدى. ەلدوستىڭ بۇعان دەيىنگى وليمپيالىق ويىنداردا كۇمىس (ريو-دە-جانەيرو-2016) جانە قولا (توكيو-2021) جۇلدەلەردى يەلەنگەنىن ەسكەرسەك، ونىڭ ەنشىسىندەگى مەدالدار جيىنتىعى ەندى تولىق تۇگەلدەندى. جارايسىڭ، ەلدوس!

دزيۋدو سپورتىنان قازاقستان قورجىنىنا تۇسكەن تاعى ءبىر جۇلدە – 66 كەلى سالماق دارەجەسىندە باق پەن باپ سىناعان عۇسمان قىرعىزباەۆتىڭ قولا مەدالى. عۇسمان دا فينالعا شىعۋعا مۇمكىندىگى بولدى، بىراق سوڭعى ساتتە، قوسىمشا ۋاقىتتا برازيليالىق ۆيلليان ليماعا ەسە جىبەردى. قولا مەدال ءۇشىن بولعان سايىستا ول سەرب سپورتشىسى ستراحينيا بۋنچيچ ايقىن باسىم ءتۇستى.

وكىنىشكە قاراي، وسى دزيۋدوداعى تاعى ءبىر ءۇمىتىمىز – قىزدار اراسىندا 48 كەلى سالماق دارەجەسىندە سىنعا تۇسكەن ءابيبا ابۋجاقىنوۆا قارسىلاستارىنىڭ ءبارىن ايقىن باسىمدىقپەن جەڭىپ كەلىپ، جارتىلاي فينالدا يسپان قىزى لاۋرا مارتينەس ابيلەندادان ايلا اسىرا المادى. سوسىن جۇبانىش بەلدەسۋىندە پاراگۆايلىق گابريەلا نارۆاەستەن باسىم ءتۇستى. الايدا قولا جۇلدە ءۇشىن بولعان تارتىستى باسەكەدە شۆەتسيانىڭ بالۋان قىزى تارا بابۋلفاتقا ەسە جىبەردى. بۇعان قاراماستان، ءوزىنىڭ سەنىمدى دە ايقىن مانەرلى ويىنىمەن ءبىزدىڭ ءابيبا شىن مانىندە كورەرمەن كوزايىمىنا اينالدى. ونىڭ جارقىن جەڭىستەرى ءالى الدا دەپ سەنەمىز.

ال پاريج وليمپياداسىندا قازاقستانعا العاشقى مەدالدى اپەرگەن – مەرگەندەر جۇبى يسلام ساتپاەۆ پەن الەكساندرا لە بولاتىن. پنەۆماتيكالىق مىلتىقتان 10 مەتر قاشىقتىقتان وق اتۋدان ولار گەرمانيا سپورتشىلارىنان باسىم ءتۇسىپ، قولا جۇلدەگە يە بولدى. يسلام مەن الەكساندرا ءالى جاس، الدا ءالى تالاي جارىستارعا قاتىسۋعا مۇمكىندىگى بار. بۇل – ولاردىڭ العاشقى وليمپياداسى بولسا دا، بىردەن جۇلدە تۇعىرىنا كوتەرىلدى.

بوكسشىلارىمىزدىڭ دەنى باستاپقى جەكپە-جەكتەرىن ءساتتى وتكىزىپ جاتىر، كەيبىرى جارىس الاڭىنا ەندى شىعادى. تەك كوماندا كاپيتانى اسلانبەك شىمبەرگەنوۆ قانا (71 كەلى) 1/16 فينالدا يوردانيالىق بىلعارى قولعاپ شەبەرى زەياد يشايشتان جەڭىلىپ قالدى. دەگەنمەن اسلانبەك كوماندالاس سەرىكتەرى ەلدىڭ سەنگەن ءۇمىتىن اقتايدى دەپ ويلايمىز.

بۇگىنگە دەيىنگى جۇلدەلەر كەستەسىندە قازاقستان وليمپياشىلارى 3 مەدالمەن (1 التىن، 2 قولا) 8-ورىندا تۇر. مىقتىلار كوشىن 4 التىنى بار اۆستراليا مەن جاپونيا باستاپ كەلەدى. ودان كەيىنگى ورىندارعا ارقايسىسى 3 التىنعا يە اقش، فرانتسيا، وڭتۇستىك كورەيا جانە قىتاي قونجيعان. 7-ورىندا 1 التىن، 2 كۇمىسى بار يتاليا كەلەدى.

Abai.kz