بالالارىن مەكتەپتە وقىتقالى كەلگەن قانداستار مەن مەكتەپ ديرەكتورلارىنا ءۇشبۋ حات

ءار جىلى جاڭا وقۋ ماۋسىمى باستالاردا الىس-جاقىن شەتەلدەردەگى ەتنيكالىق قازاقتار دا بالالارىن جەتەلەپ، قازاقستانعا اعىلادى. ءدال وسى كەزدە باستالاتىن ءبىر «جىر» بار.

ول «جىر» – سول شەتتەن ورالعان بالالاردى مەكتەپ ديرەكتورلارىنىڭ مەكتەپكە الاماي، اۋرە-سارساڭعا سالاتىنى.

«اۋرە-سارساڭعا سالاتىنى» دەگەن جاي ءسوز، «وزەككە تەبەتىنى» دەسەك، دۇرىس بولادى.

ارينە، بارلىق مەكتەپ ديرەكتورلارى ەمەس، ءبىرازى! اسىرەسە، ۇلكەن قالالارداعى مەكتەپتەردىڭ ديرەكتورلارى.

وسى ماسەلەگە بايلانىستى ماعان حابارلاساتىن اعايىنداردىڭ قاتارى كوپ. وتە كوپ. ءار جىلى جۇزدەگەن ازاماتتار تەلەفون سوعىپ، كومەك سۇرايدى.

مەن سولاردىڭ بارىنە قول ۇشىمدى بەرىپ، بالالارىن وزدەرى قالاعان مەكتەپكە ءتۇسىرىپ بەرۋمەن كەلەمىن.

قالاي كومەكتەسەسىز دەيسىز عوي، قولدانىستاعى زاڭعا سۇيەنىپ!

قازاقستان رەسپۋبليكاسىنىڭ «ءبىلىم تۋرالى» زاڭىنىڭ 66-بابىندا «شەت ەلدەگى قازاق دياسپوراسىنىڭ ءبىلىم الۋ قاجەتتىلىكتەرىن قاناعاتتاندىرۋ» تۋرالى ءبىر ەمەس، ءۇش نورما بار.

سونىڭ ءبىرىنشى تارماعىندا: «قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىندا ءبىلىم الۋعا قۇقىعى بار», - دەپ جازىلعان!

ءيا، قازىرگى تاڭدا شەتتەگى قازاقتار باياعىداي قوتارىلا كوشىپ كەلىپ جاتقان جوق. كوش سايابىرلاپ قالدى. اركىمنىڭ جاعدايى ءار ءتۇرلى. سوڭعى كەزدە شەتتەگى قازاقتاردىڭ ءبىر ءبولىمى بالالارىن قازاقستاننان وقىتۋعا ارەكەت جاساپ جاتىر. ولاردىڭ دا اتاجۇرتقا ءار ءتۇرلى جولمەن كەلىپ جاتقانى بەلگىلى. كەيبىر وتباسىلار ەكىگە جارىلىپ، اتا-انانىڭ بىرەۋى بالاسىن الىپ كەلسە، ەندى بىرەۋلەر بالالارىن قازاقستانداعى تۋىستارىنا نوتاريۋستالعان «سەنىمحات» بەرۋ ارقىلى قالدىرىپ كەتۋگە ءماجبۇر بولۋدا. قازاقستانعا مۇنداي «جۇك سالۋ» قىتايدا تۇراتىن قازاقتاردا كوبىرەك ەكەن...

بىلە-بىلسەڭىزدەر، بۇل دا جەتىسكەننەن بولىپ وتىرعان شارۋا ەمەس، قازاقتار كوپ تۇراتىن كورشى ەلدەردەگى ساياسي جاعدايدىڭ كەسىرىنەن وسىنداي قادامعا بارۋدا ولار!

قايتا، ۇرپاعىن شەتتە قالدىرماي، ءوز وتانىنا جەتكىزۋگە بارىن سالىپ جاتقان سول اتا-انالارعا ءبىز راحمەت ايتۋىمىز، الدىنان شىعىپ كومەكتەسۋىمىز كەرەك!

وسى جەردە باسا ايتا كەتەتىن ءبىر ءتۇيىن بار.

قازىر قازاقتار تۇراتىن مەملەكەتتەردىڭ كوبىندە قازاق مەكتەپتەرى جوق. باياعىدا جابىلىپ قالعان. ونداعى قازاق بالالار سول ءوزى تۇرعان ەلدىڭ تىلىندە وقيدى. ءتىپتى، كەيبىرەۋلەرى انا ءتىلىن بىلمەيدى. انا ءتىلىن بىلمەيتىن بالانى ۇلتتىق باعىتقا بۇرۋدىڭ ءوزى ءبىر – قيامەت!

شىندىعىن ايتساق، قازىر سول ءوزىنىڭ انا تىلىننەن ايىرىلىپ، تامىرىنان اجىراپ بارا جاتقان بالالاردى قازاقستانعا الىپ كەلۋدىڭ ءوزى وڭاي شارۋا بولماي تۇر!

قازاقستاندى اي مەن كۇنگە تەڭەپ، ماقتاۋىن اسىرىپ، سول بالالاردى زورعا الىپ كەلگەندە، مەكتەپ ديرەكتورلارى ءتۇرلى سىلتاۋ كورسەتىپ، ولاردى مەكتەپكە الماي قويسا، ايتىڭىزشى، بۇل – ءوز ۇلتىن وزەككە تەپكەن ەمەي، نە؟!

«اتاجۇرتىم!»، «وتانىم!» دەپ كەلگەندەگى جاعداي وسى بولسا، ديرەكتورلاردىڭ يتتىگىن كورگەن اناۋ بالا بايقۇس، قانداي كۇيدە بولماق!؟

ول بالانى الداپ-سۋلاپ ءوز وتانىنا ارەڭ الىپ كەلگەن اكە مەن انا بايقۇستىڭ بار ارمانى مەن ءۇمىتى سەلگە كەتپەي مە؟!

ءبىر قىزىعى، ءبىزدىڭ قازاقستاندا الىستاعى اعايىننىڭ وسى جاعدايىن سەزبەيتىن، تۇسىنبەيتىن مەكتەپ باسشىلارى كوپ!

ەڭ وكىنىشتىسى، ونداي مەكتەپ ديرەكتورلارى جوعارىداعى «ءبىلىم تۋرالى» زاڭنىڭ 66-بابىنىڭ ءبىرىنشى تارماعىنداعى: «قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىندا ءبىلىم الۋعا قۇقىعى بار», - دەگەن نورمادان حابارى جوق!

وقىماعان!

ءتىپتى، كەيبىرەۋى «ءبىلىم تۋرالى» زاڭنىڭ بار ەكەنىن بىلمەيدى!

بۇل تۋرالى ءسال كەيىنىرەك!

سول ءۇشىن، بالالارىن قازاقستاننان وقىتۋ ءۇشىن ورالعان قانداستار!

سىزدەر ەڭ الدىمەن وسى «ءبىلىم تۋرالى» زاڭنىڭ 66-بابىن جاتتاپ الىڭىزدار!

ارينە، قازاقستانعا جاڭادان كەلگەن، ءبىرىنشى مارتە اياق باسىپ وتىرعان اعايىندار ءۇشىن بۇل زاڭدى بىلمەدىڭ دەپ كىنالاۋ دۇرىس ەمەس.

بىراق، ولاردىڭ قازاقستاندا تۇراتىن، ەرتەرەك كەلگەن تۋىستارى «ءبىلىم تۋرالى» زاڭنىڭ 66-بابىن ءسوزسىز بىلۋلەرى كەرەك!

بۇرىن بىلمەگەن بولساڭىزدار، مەنىڭ وسى ماقالامدى وقىعان سوڭ كوكەيلەرىڭىزگە ءتۇيىپ، قۇران سۇرەسىندەي جاتتاپ الىڭىزدار.

ەستەرىڭىزدە بولسىن، سىزدەردى قورعايتىن – ءبىرىنشى قۇداي، سونان سوڭ وسى زاڭ!

ارعى بەتتەگى تۋىستارىڭىز بالالارىن وقىتۋعا الىپ كەلگەندە، مەكتەپ ديرەكتورلارى ولاردى وقۋعا الماي، سىلتاۋ ايتا باستاسا، «قۇرمەتتى ديرەكتور، ءسىز «ءبىلىم تۋرالى» زاڭنىڭ 66-بابىن وقىڭىز! وندا: «قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىندا ءبىلىم الۋعا قۇقىعى بار!»، - دەپ جازىلعان! ءسىز مىنا بالانىڭ سول زاڭمەن بەكىتىلگەن قۇقىعىن شەكتەپ تۇرسىز!»، - دەپ، ول ديرەكتوردان اتالعان زاڭنىڭ اتالعان بابىن وقۋدى قاتاڭ تالاپ ەتىڭىزدەر!

بولماسا، مەنىڭ وسى ماقالامدى وقتىڭىزدار.

ەگەر، ميى سۋ بولىپ كەتكەن توپاس بىرەۋ بولماسا، «ءبىلىم تۋرالى» زاڭنىڭ 66-بابىن وقىعان سوڭ، شاپشۋىرلاپ تۇرعان ارقانداي ديرەكتور سىلق ەتە تۇسەدى دە، ءسىزدىڭ بالاڭىزدى بىردەن مەكتەپكە وقۋعا قابىلدايدى.

ال، ول ديرەكتور بۇل زاڭدى وقىپ تۇرىپ، ءسىزدىڭ بالاڭىزدى مەكتەپكە وقۋعا قابىلداۋدان باس تارتسا، وندا ماعان حابارلاسىڭىزدار.

مەنىڭ تەلەفون نومەرىم: +77019884189. ول ديرەكتورمەن ءوزىم سويلەسەمىن! كەرەك بولسا، قازاقستاننىڭ قاي تۇكپىرىندە بولسا دا بارۋعا دايىنمىن!

***

ەندىگى مەكتەپ ديرەكتورلارى تۋرالى ءبىر-ەكى اۋىز ءسوز.

قۇرمەتتى مەكتەپ ديرەكتورلارى!

مەن استانا قالاسىنىڭ تۇرعىنىمىن.

سول سەبەپتى، استانا قالالىق ءبىلىم باسقارماسىنىڭ باسشىسى قاسىمحان سەنعازيەۆ باۋىرىمنىڭ فاميلياسىن وقۋ-اعارتۋ ءمينيسترى عاني بەيسەنباەۆتىڭ فاميلياسىنا قوسىپ، تاقىرىپقا شىعارىپ وتىرمىن.

بىراق، بۇل «اشىق حاتىمدى» بۇكىل قازاقستاننىڭ بارلىق مەكتەپتەرىنىڭ ديرەكتورلارىنا ارناپ جازعانىمدى ەستەرىڭىزگە سالامىن.

جوعارىداعى قانداستارىمىزعا قاراتىپ ايتقان سوزدەرىمنەن بايقاعان بولارسىزدار، قازاقستان رەسپۋبليكاسى «ءبىلىم تۋرالى» زاڭىنىڭ 66-بابىنا ساي، قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىندا ءبىلىم الۋعا قۇقىعى بار!

تىلەككە قارسى، ءبىزدىڭ مەكتەپ ديرەكتورلارى، جوعارىدا ايتتىم، «ءبىلىم تۋرالى» زاڭنىڭ 66-بابىن بىلمەيدى ەكەن.

مەكتەپ ديرەكتورلارى مەن ءبىلىم باسقارمالارى ءۇشىن بۇل – دۇرىس ەمەس! ۇيات! ءتىپتى، ماسقارا جاعداي!

سوڭعى ەكى-ءۇش جىلدىڭ ىشىندە كوشى-قون ساياساتىمەن ون بەس جىل بويى تىنباي اينالىسىپ كەلە جاتقان بەلسەندى ازامات، تاجىريبەلى مامان رەتىندە، قانداستارىمىزدىڭ بالالارىن وقۋعا الماي قان قاقساتقان ديرەكتورلارمەن كوپ الىستىم. اياۋسىز كۇرەستىم دەۋگە دە بولادى.

ەندى سىزدەرگە سولاردىڭ ەسىمدە قالعان ءبىر-ەكەۋىن ايتىپ بەرەيىن.

بىردە اقمولا وبلىسىنىڭ ەرەيمەنتاۋ اۋدانىنان راسۋل قاينار دەگەن ازامات تەلەفون سوقتى.

ول قىتايدان بىرگە تۋعان اعاسىنىڭ ايەلى (جەڭگەسى) بالاسىن الىپ كەلگەنىن، ول بالانى سول ەرەيمەنتاۋ اۋدانىنىڭ ءوزى تۇرعان اۋىلداعى مەكتەپتەن وقىتقىسى كەلەتىنىن، بىراق ول بالانى مەكتەپ ديرەكتورى وقۋعا قابىلداماي قويعانىن ايتىپ، كومەك سۇرادى.

راسۋل قايناردىڭ ايتۋىنا قاراعاندا، ونىڭ جەڭگەسى بالاسىن نوتاريۋستالعان «سەنىم حاتپەن» قاينارعا تابىستاپ كەتپەكشى ەكەن.

راسۋل قاينارعا سول مەكتەپ ديرەكتورىنىڭ كەڭسەسىنە بارلىق قۇجاتتارىمەن انا بالانى ەرتىپ بارۋدى، كابينەتكە كىرگەن سوڭ WhatsApp جەلىسى ارقىلى ۆيديو قوڭىراۋ شالىپ، مەنى سول مەكتەپ ديرەكتورىمەن بەتپە-بەت سويلەستىرۋدى تاپسىردىم.

راسۋل قاينار ايتقانىمدى ورىندادى. ۆيدەو ارقىلى ديرەكتورمەن سويلەسۋ باستالدى. ديرەكتوردىڭ اتا-ءجونى، جاڭىلماسام، ساۋلە انۋاربەكقىزى ەكەن.

ساۋلە انۋاربەكقىزىنىڭ الدىندا كومپيۋتەر تۇر.

اماندىق-ساۋلىق جاساسىپ، قىسقاشا تانىسقان سوڭ، ساۋلە قارىنداسىمىزدان كومپيۋتەردى اشىپ، «ءبىلىم تۋرالى» زاڭنىڭ 66-بابىن وقۋدى ءوتىندىم.

قىزىق بولعاندا، ديرەكتور اتالعان زاڭدى تابا الماي، اق تەر، كوك تەر بولدى.

سوسىن، راسۋل قاينارعا WhatsApp جەلىسى ارقىلى «ءبىلىم تۋرالى» زاڭنىڭ سىلتەمەسىن جىبەرىپ، ديرەكتوردىڭ 66-باپتى وقىپ شىعۋىن كۇتتىم.

بەس-التى مينۋت وتكەن سوڭ، راسۋل قاينارعا قايتا تەلەفون سوقسام، ساۋلە انۋاربەكقىزى اۋداندىق ءبىلىم باسقارماسىنىڭ باسشىسى بولسا كەرەك، بىرەۋگە تەلەفون سوعىپ، بولعان جاعدايدى بايانداپ جاتىر. سوزدەرى ماعان اپ-انىق ەستىلىپ تۇر.

– ءپالانباي تۇگىلەنباەۆيچ،  «ءبىلىم تۋرالى» زاڭ دەگەن زاڭ بار ەكەن عوي، سونىڭ 66-بابىندا «قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىندا ءبىلىم الۋعا قۇقىعى بار» دەگەن جازۋ بار ەكەن، نە ىستەيمىن؟! – دەيدى، ساۋلەش ديرەكتور الدىنداعى كومپيۋتەرگە ۇڭىلە ءتۇسىپ!

نە كۇلەرىمدى، نە جىلارىمدى بىلمەيمىن، تەلەفوندى جابا سالدىم.

جارتى ساعاتتان كەيىن، راسۋل قاينار تەلەفون سوعىپ، «ساۋلە انۋاربەكقىزى انا بالانى مەكتەپكە وقۋعا قابىلدايتىن بولدى...»، - دەگەن قۋانىشتى حاباردى جەتكىزىپ، راحمەتىن ايتتى.

كوردىڭىز بە، بىلدەي ءبىر مەكتەپتىڭ ءاپ-ادەمى، جاپ-جاس ديرەكتورى «ءبىلىم تۋرالى» زاڭدى وقۋ بىلاي تۇرسىن، ونداي زاڭنىڭ بار ەكەنىن بىلمەيتىن بولىپ شىقتى.

تاعى ءبىر اڭگىمە.

كەشە – 12 تامىز كۇنى كاسىپكەر ەربوسىن نۇرمۇحانۇلى ەكەۋىمىز ءبىر جۇمىسپەن استانا قالاسىنىڭ اكىمدىگىنە بارا قالدىق.

قىتايدان كەلگەن ءبىر كەلىنشەك قابىرعاداعى تەلەفونعا جارماسىپ الىپ، ارعى بەتتەن ابىسىنىنىڭ ءبىر قىزىن استانادان وقتىتۋ ءۇشىن الىپ كەلگەنىن، نوتاريۋستالعان «سەنىم حاتپەن» ءوز قولىندا الىپ قالىپ وقىتايىن دەسە، ول قىزدى №93 مەكتەپتىڭ الماي جاتقانىن ايتىپ، جالىنىپ تۇر ەكەن.

تەلەفون سوعىپ تۇرعان كەلىنشەكتىڭ اتى-ءجونى دانابەك باقىتگۇل بولىپ شىقتى.

ونى قالالىق استانا قالالىق ءبىلىم باسقارماسىنا جىبەرگەن №93 مەكتەپ ديرەكتورىنىڭ كومەكشىسى مە، حاتشىسى ما بىلمەيمىن، ايمان دەگەن مۇعالىم ەكەن.

ەندى، باقىتگۇلدىڭ تەلەفونى ارقىلى ايمانمەن سويلەسۋىمە تۋرا كەلدى.

سويلەستىم.

سويتسەك، انا قىزدى №93 مەكتەپكە الۋ ءۇشىن، «سەنىم حات» العان ازامات قالالىق ءبىلىم باسقارماسىنىڭ «وقۋعا الۋعا بولادى!» دەگەن كەلىسىمىن اكەلۋ كەرەك ەكەن.

«جوق، ولاي ەمەس!» - دەپ، ايمانعا «ءبىلىم تۋرالى» زاڭىنىڭ 66-بابىنا ساي، قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىندا ءبىلىم الۋعا قۇقىعى بار ەكەنىن تۇسىندىردىك.

ءتىپتى، اتالعان زاڭنىڭ اتالعان نورماسىن WhatsApp جەلىسى ارقىلى جىبەردىك.

زاڭدى كورگەن سوڭ، مانادان بەرى بەت باقتىرماي شاپشۋىرلاپ تۇرعان ايمانجان دا بىردەن سىلق ەتە ءتۇستى. سىندى!

باعاناعى وكتەم داۋىس جايىنا قالىپ، ەندى بارىنشا سىپايى، مەيىرىمدى ۇنمەن «تۇستەن كەيىن بالاڭىزدى قۇجاتتارىمەن الىپ، ديرەكتورعا كەلىڭىز. مەكتەپكە قابىلدايمىزعا» كوشتى...

كەشكە قاراي، دانابەك باقىتگۇل قارىنداسىمىز تەلەفون سوعىپ، «ابىسىنىنىڭ قىزى №93 مەكتەپكە قابىلداناتىن بولدى...» - دەگەن قۋانىشتى حابار جەتكىزدى.

ارقامىزدان ءبىر اۋىر جۇك تۇسكەندەي بولىپ، ءبىز دە قۋانىپ قالدىق...

ارداقتى مەكتەپ ديرەكتورلارى!

وزدەرىڭىز وتە جاقسى بىلەسىزدەر، ءبىز «ادىلەتتى ءارى تازا قازاقستان» قۇرىپ جاتىرمىز.

پرەزيدەنتىمىز قاسىم-جومارت توقاەۆ: «قازاقستان – قۇقىقتىق مەملەكەت. ال كەز كەلگەن قۇقىقتىق مەملەكەتتە ازاماتتار مەن ينستيتۋتتاردىڭ بارلىعى زاڭداردى، ەرەجەلەر مەن نورمالاردى مۇلتىكسىز ساقتاۋعا ءتيىس»، - دەگەن جوق پا؟!

ەندەشە، قاسىم-جومارت كەمەلۇلى ايتقانداي، وسىناۋ زاڭداردى، ەرەجەلەر مەن نورمالاردى مۇلتىكسىز ساقتاۋعا ءتيىس ازاماتتاردىڭ ساپ باسىندا، ارداقتى مەكتەپ ديرەكتورلارى، سىزدەر تۇرۋلارىڭىز كەرەك قوي.

ول ءۇشىن، سىزدەردىڭ قىزمەت ۇستەلدەرىڭىزدىڭ وڭ جاق بەتىندە «قازاقستان رەسپۋبليكاسىنىڭ كونستيتۋتسياسى», سول جاق بەتىندە «قازاقستان رەسپۋبليكاسىنىڭ ءبىلىم تۋرالى» زاڭى تۇرۋى ءتيىس!

سىزدەر ءار كۇنى قىزمەتكە كىرىسەردىڭ الدىندا، وسى ەكى قۇجاتتى قولدارىڭىزعا كەزەك-كەزەك الىپ، باسىنان باستاپ، سوڭىنا قاراي پاراقتاپ وقىپ تۇرۋلارىڭىز قاجەت.

سونشالىقتى قالىڭ رومان ەمەس قوي، كونستيتۋتسيا نەبارى 99 باپتان، «ءبىلىم تۋرالى» زاڭ 68 باپتان تۇرادى.

كۇنىنە ءبىر باپتاپ وقىپ وتىرساڭىزدار، ەكى قۇجاتتى جىلىنا ەكى-ءۇش رەتتەن وقىپ شىعۋلارىڭىزعا بولادى.

وسىلايشا، جىلىنا ءۇش رەتتەن وقي بەرسەڭىزدەر، بەس جىلدا ەكى قۇجاتتى دا تۇگەل جاتتاپ الاسىزدار دا، شەتتەرىڭىزدەن اتاقتى زاڭگەر بولىپ شىعاسىزدار.

ەستەرىڭىزدە بولسىن، زاڭدى ەڭ جاقسى بىلەتىن باسشى – ەڭ مىقتى باسشسى!

تاعى دا قايتالاپ ايتايىن، ءبىز زاڭ ۇستەمدىك ەتەتىن «ادىلەتتى، تازا قازاقستان» قۇرىپ جاتىرمىز.

ەندەشە، ەڭ الدىمەن سىزدەر زاڭدى جاقسى بىلۋگە مىندەتتىسىزدەر جانە ول زاڭدى وزدەرىڭىز عانا ەمەس، قول استىلارىڭىزا قىزمەت ىستەيتىن بۇكىل مۇعالىمدەرگە دە وقىتۋلارىڭىز كەرەك.

مۇعالىمدەرمەن عانا شەكتەلمەي، وزدەرىڭىز وقىتىپ جاتقان جاس ۇرپاقتىڭ ساناسىنا دا سىڭىرۋگە تيىسسىزدەر!

مىناداي ماسەلەگە ءدوپ كەلگەندە، وزدەرىڭىزدەن جوعارى تۇرعان مەكەمەدەن نۇسقاۋ سۇراۋدى، سولاردىڭ بۇيرىعىمەن جۇمىس اتقارۋدى دوعارىڭىزدار! تەك زاڭمەن جۇمىس جاساۋدى، زاڭعا سۇيەنۋدى ۇيرەنىڭىزدەر! بۇل – ءبىر!

ەكىنشى ايتارىم، باسقاسىن بىلمەيمىن، الىس-جاقىن شەتەلدەردەن قازاقستانعا كوشىپ كەلەتىن ەتنيكالىق قازاقتاردى قۇجاتتاندىرۋدىڭ، ءبىلىم بەرۋدىڭ زاڭدىق نەگىزى باياعىدا جاسالىپ قويىلعان.

مىسالى، ءبىز ايتىپ وتىرعان «ءبىلىم تۋرالى» زاڭ  2007 جىلعى 27 شىلدەدە; ال «حالىقتىڭ كوشى-قونى تۋرالى» زاڭ 1997 جىلدىڭ 13 جەلتوقسانىندا قابىلدانعان بولاتىن. ودان بەرى ءبىزاز ۋاقىت ءوتتى عوي، سىزدەردىڭ ءبىر وقىپ شىعۋلارىڭىزعا بولاتىن ەدى عوي...

اۋەلگى سوزىمىزگە قايتا ورالايىق.

قۇرمەتتى ديرەكتورلار!

بالاسىن وقىتۋ ءۇشىن ورالعان قانداستارىمىزدى وقۋ-اعارتۋ مينيسترلىگى مەن ءبىلىم باسقارماسىنا جىبەرىپ، عاني بەيسەنباەۆ پەن قاسىمحان سەنعازيەۆ سەكىلدى ءبىلىم باسقارماسى باسشىلارىنىڭ مازاسىن الماڭىزدار!

ءدال وسى ماسەلەمەن ول كىسىلەردى مازالاۋدىڭ ەش قاجەتى جوق!

كورىپ وتىرسىزدار، بۇل ماسەلە زاڭمەن باياعىدا بەكىتىلىپ قويعان، ەندى تەك سىزدەردىڭ دەڭگەيلەرىڭىزدە عانا شەشىلە بەرەدى!

سوندىقتان، سىزدەر الدىڭىزعا وقيمىن دەپ شەتەلدەن ورالعان بالالاردى وزەككە تەپپەي, ۇلتى قازاق بولسا بولعانى، ولاردىڭ ۆيزاسىنىڭ ساناتى مەن مەرزىمىنە، اتا-اناسىنىڭ بىرەۋىنىڭ نە ەكەۋىنىڭ دە قازاقستان ازاماتى بولماعانىنا، سونداي-اق اتا-اناسىنىڭ قازاقستاندا تۇراقتى تىركەۋدە تۇراتىن نە تۇرايتىنا دا قاراماستان، ەشقانداي سەبەپ كورسەتپەستەن، بىردەن وقۋعا الۋعا مىندەتتىسىزدەر!

ارينە، قازاقستاندا تۇرمايتىن اتا-انالار بالالارىن قازاقستان ازاماتى بولىپ تابىلاتىن تۋىستارىنا نوتوريۋستالعان «سەنىم حات» بەرۋ ارقىلى تابىستاپ كەتۋىلەرى – شارت!

ەگەر، مەكتەپكە قابىلداۋدان باس تارتساڭىزدار، سىزدەر ول بالانىڭ زاڭمەن بەكىتىلگەن قۇقىعىن تاپتاعان بولىپ سانالاسىزدار! ءتىپتى، سوت الدىندا جاۋاپ بەرىپ قالۋلارىڭىز مۇمكىن!

ال، ولاردىڭ ۆيزالارى مەن تىركەۋلەرى سايكەس كەلمەسە، سىزدەر ول بالانىڭ مەكتەپتە وقىپ جاتقانى تۋرالى «انىقتاما» بەرەسىزدەر.

اتا-اناسى نەمەسە نوتوريۋستالعان «سەنىم حاتى» بار ازامات سول سىزدەر بەرگەن «انىقتاما» ارقىلى ولاردىڭ قۇجاتتارىن دۇرىستاي الادى.

ەگەر، مەكتەپتە وقىپ جاتقانى تۋرالى سىزدەر بەرگەن «انىقتاماسى» بولا تۇرا، وزگە قۇزىرلى ورگاندار مەن مەكەمەلەر ول بالانىڭ قۇجاتتارىن ىڭعايلاپ بەرمەسە، ولار دا سول بالانىڭ «ءبىلىم تۋرالى» زاڭنىڭ 66-بابىنداعى قۇقىعىن بۇزعان بولىپ ەسەپتەلەدى. ولار دا سوت الدىندا جاۋاپ بەرىپ قالۋى مۇمكىن...

قۇرمەتتى مەكتەپ ديرەكتورلارى!

سىزدەر مەنىڭ وسى «اشىق حاتىمدى» مۇقيات وقىڭىزدار جانە رەسپۋبليكامىزدىڭ تۇكپىر-تۇكپىرىندەگى بارلىق ارىپتەستەرىڭىزگە تارتىڭىزدار!

سونىمەن، شەتتەن ورالعان قازاق بالاسىن مەكتەپكە الماي، وزەككە تەبەتىن كەلەڭسىزدىك وسىمەن اياقتالسىن!

ءبارىمىز زاڭدى بىلەيىك جانە زاڭدى مۇلتىكسىز ورىندايىق

قۇرمەتپەن،

اۋىت مۇقيبەك،

«ەرەن ەڭبەگى ءۇشىن» مەدالىنىڭ، «قۇرمەت» وردەنىنىڭ يەگەرى

Abai.kz