استانادا V دۇنيەجۇزىلىك كوشپەندىلەر ويىندارىنىڭ اشىلۋى ءسان-سالتاناتىمەن ءوتتى. 30 مىڭ كورەرمەنگە ارنالعان «استانا ارەنا» ءىشى بۇگىن جانكۇيەرلەر مەن كورەرمەندەرگە لىق تولدى. 3 مىڭعا جۋىق ونەرپاز قاتىسقان كوشپەندىلەر ويىندارىنىڭ اشىلۋى – وليمپيادا ويىندارىنىڭ اشىلۋىنان ەش كەم بولعان جوق.

سۋرەتتەر اقوردانىڭ تەلەگرام ارناسىنان الىندى.

كوشپەندىلەر ويىنىنىڭ اشىلۋىنا پرەزيدەنت قاسىم-جومارت توقاەۆ پەن بىرگە قىرعىزستان مەن وزبەكستان پرەزيدەنتتەرى سادىر جاپاروۆ پەن شاۆكات ميرزيوەۆتىڭ, تاتارستان باسشىسى (رايسى) رۋستام ميننيحانوۆ پەن تۇركىمەنستاننىڭ ۇلت كوسەمى، حالك ماسلاحاتىنىڭ توراعاسى قۇربان بەردىمۇحامەدوۆتەر ارنايى كەلىپ قاتىستى.

سونىمەن قاتار، شەتەلدىك رەسمي دەلەگاتتاردىڭ قاتارىندا: ساحا رەسپۋبليكاسىنىڭ باسشىسى ايسەن نيكولاەۆ, موڭعوليانىڭ بۇرىنعى پرەزيدەنتى ەنحبايار نامبارىن, دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ءبىلال ەردوعان, سونداي-اق يۋنەسكو، اوسشك، بۇۇ دۇنيەجۇزىلىك تۋريزم ۇيىمى، تۇركى مەملەكەتتەرى ۇيىمى، تۇركسوي، تۇركى ينۆەستيتسيالىق قورى، تۇركى مەملەكەتتەرىنىڭ پارلامەنتتىك اسسامبلەياسى، يسلام سپورت قاۋىمداستىعى، ازىق-تۇلىك قاۋىپسىزدىگى جونىندەگى يسلام ۇيىمىنىڭ باسشىلارى، ەۋروپا وداعىنىڭ ورتالىق ازياداعى ارنايى وكىلى جانە باسقا دا رەسمي تۇلعالار قاتىستى.

سۋرەتتەر اقوردانىڭ تەلەگرام ارناسىنان الىندى.

كوشپەندىلەر ويىندارىندا 21 سپورت تۇرىنەن ۇزىن-سانى 97 مەدال جيىنتىعى ساراپقا سالىنباق!

الەمنىڭ ءار تۇكىپىرىندە بار ۇلتتىق سپورتتىڭ بايراقتى باسەكەسىنىڭ اشىلۋىندا قازاقستاننىڭ كوك تۋىن ەلىمىزدى مەكەن ەتكەن ءتۇرلى ەتنوس وكىلدەرىنىڭ بالالارى كوتەرىپ شىقتى. ونان سوڭ ەلىمىزدىڭ ءانۇرانى شىرقالىپ، وليمپيادالىق دارەجەدە دايارلانعان شوۋ-باعدارلامامەن جالعاستى. ەلارالىق دودا ءداستۇرى بويىنشا جارىسقا قاتىسۋشى مەملەكەتتەردەن كەلگەن سپورتشىلار شەرۋلەتىپ ءوتتى.

استانادا باستالعان كوشپەندىلەر ويىندارىنا ازيادان، ەۋروپادان، سولتۇستىك جانە وڭتۇستىك امەريكادان، افريكادان، ءتىپتى، اۆستراليادان سپورتشىلار كەلگەن ەكەن.

سۋرەت اقوردانىڭ تەلەگرام ارناسىنان الىندى.

«ۇلى دالا كوشپەندىلەرى ەجەلدەن بايتاق ەۋرازيانى مەكەن ەتكەن. ولار جاھاندىق دامۋ ۇدەرىسىنە تۇبەگەيلى وزگەرىس اكەلدى، سول زامانداعى وزىق تەحنولوگيانىڭ يەسى بولدى. كوشپەندىلەر بەس مىڭ جىل بۇرىن جىلقىنى قولعا ۇيرەتتى. دۇنيەنى دۇبىرلەتكەن سالت اتتىلار مادەنيەتىن قالىپتاستىردى. قۋاتتى قارۋ-جاراق پەن عاجايىپ زەرگەرلىك بۇيىمدار جاساپ شىعاردى. ساق ءداۋىرىنىڭ التىن ادامدارى – سونىڭ ايقىن دالەلى. قازاق جەرىنەن ءال-فارابي، قوجا احمەت ياساۋي سىندى عۇلامالار شىققان. ولار ءىلىم-عىلىمنىڭ دامۋىنا وراسان زور ۇلەس قوستى. ءبىزدىڭ بابالارىمىز الىپ مەملەكەتتەر قۇردى، ۇلكەن قالالار سالدى. ۇلى دالادا وتىرار، تۇركىستان، تاراز، سارايشىق سياقتى ساۋلەتتى شاھارلار بوي كوتەردى. كوشپەندى جۇرت باتىس پەن شىعىسقا كوپىر بولىپ، ءتۇرلى مادەنيەتتىڭ جاقىنداسۋىنا اسەر ەتتى. وسى جەردە ەجەلگى عۇن يمپەرياسى، ودان سوڭ تۇرىك قاعاناتى سالتانات قۇردى. ولاردىڭ داڭقتى جولىن التىن وردا مەن قازاق حاندىعى جالعاستىردى.

ون جىل بۇرىن وسى جارىستى العاش ۇيىمداستىرعان قىرعىز باۋىرلارعا العىس ايتامىن. بۇل – ۇلتتىق سپورت تۇرلەرىنەن وتەتىن الەمدەگى ەڭ ءىرى دودا. ونى كوشپەندىلەر وليمپياداسى دەۋگە بولادى. بۇل ويىندار دالا وركەنيەتىن جەر جاھانعا پاش ەتەدى.

سپورت – ءوزارا قۇرمەت پەن سىيلاستىق سيمۆولى. سپورتتىڭ باستى ميسسياسى – حالىقتار دوستىعىن نىعايتۋ. قازاقستان بۇكىل الەمگە بەيبىتشىلىك پەن كەلىسىم مەكەنى رەتىندە تانىمال. ەلىمىزدە ءتۇرلى ەتنوس وكىلدەرى تاتۋ-ءتاتتى ءومىر ءسۇرىپ جاتىر. ءبىز الىس-جاقىن شەتەلدىڭ بارىمەن تىعىز بايلانىس ورناتتىق. باسقا مەملەكەتتەر دە ءوزارا دوستىق قاتىناستا بولعانىن قالايمىز. سوندىقتان كوشپەندىلەر ويىندارى ىنتىماعىمىزدى بەكەمدەي تۇسپەك»، – دەدى پرەزيدەنت.

جالپى دۇنيەجۇزىلىك كوشپەندىلەر ويىندارى باستالعان اۋەلگىدە: «بۇل بايراقتى باسەكە بولاشاقتا وليمپيادالىق دارەجەگە جەتەدى»، - دەپ ايتىلعان. الايدا، وسىعان دەيىن ءار مەملەكەت وزىنشە وتكىزىپ كەلدى. قىرعىزستان دا، تۇركيا دا ءسويتتى.

بۇگىنگى دۇنيەجۇزىلىك كوشپەندىلەر ويىندارىنىڭ اشىلۋىنا قاراپ، قازاقستاننان كەيىن بىرىڭعاي فورمات قالىپتاسادى دەپ ويلايمىز!

Abai.kz