الىشەر قادىروۆ – وزبەكستانداعى باتىل ءارى شىنشىل ساياساتكەردىڭ ءبىرى. ول رەسەي شوۆينيزمىنە قارسى وتكىر سىندارىمەن ايگىلى دەپ جازادى Abai.kz Fragment كانالىنا سىلتەمە جاساپ.

بۇل تۇرعىدا ول قازاقستانداعى مىڭداعان وقىرمانى بار جانە قوعامدىق پىكىرگە ىقپال ەتە الاتىن - مۇحتار تايجان مەن ارمان شوراەۆقا ۇقساس. جالعىز عانا ايىرماشىلىق - قادىروۆ بيلىكتە وتىر.

الىشەر مىرزا اۋقىمدى ەلەكتوراتى بار "ميللي تيكلانيش" (ۇلتتىق جاڭعىرۋ) پارتياسىنىڭ كوسەمى جانە پارلامەنتتەگى تومەنگى پالاتا سپيكەرىنىڭ ورىنباسارى. ءبىر جىلدارى ميرزياەۆپەن قاتار پرەزيدەنت سايلاۋىنا تۇسكەنىن دە ۇمىتا قويعان جوقپىز.

قادىروۆتىڭ تەلەگرام ارناسى رەسەيگە قارسى كونتەنتكە تولىپ تۇر. "رەسەيلىك-كەڭەستىك يدەولوگياعا ەل كولەمىندە تولىق تىيىم سالۋ كەرەك" دەيدى ساياساتكەر.

بۇل مالىمدەمەگە 74 جاستاعى سامارقان تۇرعىنىنىڭ سوت ۇكىمى تۇرتكى بولدى، ول كەڭەس وداعىن قايتا قالپىنا كەلتىرۋدى جاقتاپ، وزبەكستاننىڭ تاۋەلسىزدىگىن جوققا شىعارعان بولاتىن.

قادىروۆ بۇل جاعدايدى ەل تاريحىنداعى ەڭ اۋىر كەزەڭدەرمەن بايلانىستىردى جانە مۇنداي پىكىردى "حالقىمىز بەن اتا-بابالارىمىزعا جاسالعان وپاسىزدىق" دەپ اتادى. ء"بىرىنشى ماي" كەزىندە كوشەگە كسرو-نىڭ تۋىن الىپ شىققاندار قادىروۆتىڭ قاھارىنا ۇشىراپ، ەندى قايتىپ مۇندايعا بارماستاي بولدى.

الىشەر قادىروۆتىڭ ماسكەۋگە جانە كەڭەس وداعىنا قارسى اشىق پىكىرلەرى – جاي عانا سىن ەمەس، ساياسي مالىمدەمە. ول كەڭەس وداعىن تەك وتكەننىڭ قاراڭعى پاراعى رەتىندە عانا ەمەس، قازىرگى كرەملدىڭ يمپەريالىق پيعىلىنىڭ جالعاسى دەپ قابىلدايدى.

"وزبەكستان تاۋەلسىزدىگىن بەكەم ۇستاۋ كەرەك، دەيدى قادىروۆ، ال "كەڭەس وداعىن قايتا قۇرۋ" سەكىلدى اڭگىمەلەر – بۇل ءبىزدىڭ اتا-بابالارىمىزعا جاسالعان قيانات دەپ سانايدى.

ۋكرايناعا باسىپ كىرگەننەن كەيىن رەسەيلىك يدەولوگتار ورتا ازيا ەلدەرىنە شۇيلىگە باستادى. ايتالىق، رەسەيلىك ساياساتكەر زاحار پريلەپين وزبەكستاندى اننەكسيالاۋ قاجەتتىلىگىن ايتىپ، وندا جۇمىس ىستەپ جۇرگەن ميلليونداعان ميگرانتتاردىڭ سانىن سىلتاۋراتتى. ال رەسەيلىك تاريحشى ميحايل سمولين وزبەكتەردى ۇلت رەتىندە جوققا شىعارعانى بەلگىلى.

بۇعان جاۋاپ رەتىندە قادىروۆ رەسەيلىك تەلەارنالاردىڭ وزبەكستان اۋماعىندا تارالۋىنا شەكتەۋ قويۋدى تالاپ ەتتى. ونىڭ پىكىرىنشە، رەسەيلىك پروپاگاندا وزبەكستاننىڭ اقپاراتتىق كەڭىستىگىن تۇنشىقتىرىپ وتىر.

"ەلدەگى ورىستىڭ ۇلەسى 3 پايىزدان اسپايدى. سولاي بولا تۇرا رەسەيلىك مەديا كونتەنتتىڭ ىقپالى تىم كۇشتى. ءۇش پايىز ورىس ءۇشىن رەسەيلىك تەلەارنالارعا تولىق ەركىندىك بەرگەنىمىز اقىلعا سىيمايدى", - دەيدى ساياساتكەر.

"تاشكەنت سىرتقى ساياساتتا كرەملگە قارسى كەلمەگەنمەن، قادىروۆ سياقتى ساياسي تۇلعالار رەسەيدىڭ ىقپالىنا اشىق قارسىلىق ءبىلدىرىپ وتىر. وزبەكستانداعى ساياسي جۇيەدە سىرتقى ساياساتقا قاتىستى كەز كەلگەن اشىق پىكىر ەلدىڭ جوعارى باسشىلىعىنىڭ ماقۇلداۋىنسىز ايتىلمايدى" دەپ پايىمدايدى Fragment.

سوندىقتان، قادىروۆتىڭ پىكىرى وزبەكستان ۇكىمەتىنىڭ رەسەيگە قاتىستى رەسمي ۇستانىمى بولماسا دا، ەل ىشىندەگى بەلگىلى ءبىر توپتاردىڭ كرەملدىڭ شوۆينيستىك ساياساتىنا قارسىلىق بىلدىرەتىنىن كورسەتەدى.

كرەملدىڭ يمپەريالىق ويىنى ءالى توقتاعان جوق. قادىروۆتىڭ سوزدەرى – بۇل ماسكەۋدىڭ ورتا ازياعا قاتىستى اگرەسسيۆتى ساياساتىنان ساقتاندىرۋ، جانە مۇنداي اشىق مالىمدەمەلەر ارقىلى تاشكەنتتىڭ ءوزىنىڭ تاۋەلسىزدىگىن قورعاۋعا دايىن ەكەنىن كورسەتىپ وتىر.

Abai.kz