باتىستىق باسىلىمدار ۋكراينا پرەزيدەنتى زەلەنسكيدىڭ «جەڭىس جوسپارى» جايلى تالداۋلارىن جاريالاي باپتاپتى. ءبىز دە بۇگىن وسى تاقىرىپقا از-كەم توقتالعاندى ءجون سانادىق، - دەپ جازادى Mezgil.kz اقپاراتتىق پورتالى. 

ۋكراينانىڭ جەڭىس جوسپارى قانداي؟

«ۋكراينا پرەزيدەنتى ۆلاديمير زەلەنسكي امەريكا كوشباسشىسى جو بايدەنگە ۇسىناتىن «جەڭىس جوسپارىندا» ءتورت نەگىزگى تارماق بار»، - دەپ جازادى «The Times». باسىلىم اتاعان ءتورت تارماق قانداي تارماقتار؟ وندا نە جازىلعان، قاراڭىز:

اۋەلگىسى – باتىس تاراپىنان ۋكرايناعا قاۋىپسىزدىك كەپىلدىكتەرىن بەرۋ;

ونان سوڭ – ناتو-عا كىرۋ كەزىندە ءوزارا قورعانىس تۋرالى پاكتىگە بالاما ازىرلەۋ;

ءۇشىنشى تارماق – كۋرسك وبلىسىنداعى ۋكراينا وپەراتسياسىن ودان ارى جالعاستىرۋ، زاماناۋي قارۋ-جاراقپەن قامتاماسىز ەتۋ ماسەلەسىن بىرجاقتى ەتۋ;

جانە سوڭعىسى – ۋكرايناعا حالىقارالىق قارجىلىق كومەك بەرۋ ماسەلەسىن شەشۋ.

نازار اۋدارارلىق ماسەلە: بۇل جوسپاردا سوعىس قيمىلدارىن ۋاقىتشا توقتاتۋ نەمەسە وق اتۋدى توقتاتۋ تۋرالى مۇلدە جازىلماعان. قۇجاتتا ونى جۇزەگە اسىرۋ مەرزىمى دە بەلگىلەنگەن. ەندىگى ماسەلە بايدەننىڭ ۋكراينا پرەزيدەنتى ازىرلەگەن ۇسىنىستى قولداي ما، جوق پا، سوعان بايلانىستى. ال پرەزيدەنت زەلەنسكي بايدەننەن «ترامپتىڭ ىقپالىنا ۇشىرامايتىن» قاۋىپسىزدىك كەپىلدىگىن سۇراماق!

بۇعان دەيىن زەلەنسكي ءوزى ۇسىنعان «جەڭىس جوسپارى» بەس نەگىزگى تارماقتان تۇراتىنىن ايتقان بولاتىن. «ءبىز ەگجەي-تەگجەيلى ازىرلەگەن «جەڭىس جوسپارى» بەس تارماقتان تۇرادى. تورتەۋى - بىزگە ءداپ بۇگىن قاجەت، بىرەۋى - سوعىستان كەيىن كەرەك»، - دەپ ايتقان ەدى پرەزيدەنت زەلەنسكي.

«The Times» ساراپشىلارى: «وسى ۇسىنىلعان بەيبىتشىلىك جوسپارىنىڭ قاۋىپسىزدىك كەپىلدىكتەرى تۋرالى تارماعى وداقتاستار اراسىندا كەلىسپەۋشىلىك تۋدىرۋى مۇمكىن. جانە بۇل كەلىسپەۋشىلىك ۋكراينانىڭ ناتو-عا قوسىلۋ پروتسەسسىن تەجەيتىن بولادى»، - دەپ جازادى.

الەمدى ەلەڭدەتكەن «STORM SHADOW»

ساراپشىلار بايدەن مەن زەلەنسكيدىڭ جولىعۋىنا ەرەكشە نازار اۋدارىپ وتىر. سەبەبى، اقش پرەزيدەنتى وسى كەزدەسۋدە رەسەي اۋماعىنداعى اسكەري نىسانداردى اتقىلاۋ ءۇشىن الىس قاشىقتىقتى كوزدەيتىن قارۋلارعا رۇقسات بەرۋ تۋرالى ءسوز بولا ما دەيدى. سونىڭ ىشىندە، ۇلىبريتانيادا جاساپ شىعارىلعان، بىراق قارۋ قۇرامىندا امەريكالىق ءوندىرىستىڭ كومپونەنتتەرى بار «Storm Shadow» زىمىراندارىن قولدانۋعا قويىلعان شەكتەۋلەردى الىپ تاستاۋ ماسەلەسى الەمدىك ساياسي الاڭدا قىزۋ تالقى بولۋدا.

ساراپشىلار بۇعان دەيىن لوندون مەن ۆاشينگتون ۋكرايناعا «Storm Shadow» زىمىراندارىمەن رەسەي اۋماعىنا الىس قاشىقتىقتان سوققى بەرۋگە جاسىرىن تۇردە رۇقسات بەرە الاتىنىن بولجاپ ايتقان بولاتىن. بۇل شەشىم العاش ىسكە اسىرىلعانعا دەيىن قۇپيا ساقتالۋى مۇمكىن.

بۇعان دەيىن «Bloomberg» اگەنتتىگى كيەۆتىڭ باتىستىق وداقتاستارىنىڭ اراسىندا كەلىسسوزدەر جونىندەگى ۇستانىم بويىنشا الشاقتىق تۋىنداعانىن حابارلاعان ەدى. ناقتىلاي ايتساق، بىرەۋلەرى ماسكەۋ تاراپىنان رەسەيگە الىستان اتىلاتىن قارۋمەن سوققى جاساۋعا سالىنعان شەكتەۋلەردى الىپ تاستاعان جاعدايدا سوعىس ءورتىنىڭ ءورشىپ كەتۋىنەن قورقىپ، ءبارىن بۇرىنعىسىنشا قالۋىن «جاقتايدى»، باسقالارى بولسا، ءوز كەزەگىندە كەلىسسوزدەرگە مەرزىمىنەن بۇرىن كىرىسۋگە قارسى شىعىپ، كيەۆكە اسكەري كومەكتىڭ ۇلعايۋىن قولدايدى.

سوعىستىڭ تاعدىرى وسى كۇزدە شەشىلەدى!

تاقىرىپقا تۇزدىق: وسىنىڭ الدىندا پرەزيدەن زەلەنسكي: «سوعىستىڭ تاعدىرى وسى كۇزدە شەلىلەدى!»، - دەپ مالىمدەگەن ەدى.

پرەزيدەنتتىڭ ايتۋىنشا، ۋكراينا اقش-قا جەڭىس جوسپارىن ۇسىنادى. ونى الدىمەن پرەزيدەنت بايدەن كورەدى، سودان كەيىن ول اقش كونگرەسىندەگى ەكى پارتياعا دا، پرەزيدەنتتىككە ۇمىتكەرلەرگە دە كورسەتىلەدى. سونداي-اق جوسپار سەرىكتەس ەلدەردىڭ بارلىق باسشىلارىنا ۇسىنىلادى.

ال رەسەي تارابى رەسمي تۇردە «بەيبىتشىلىك سامميتىنە» قاتىسۋدان باس تارتىپ، ەكى كەزەك مالىمدەمە جاسادى. اۋەلى رەسەي سىرتقى ىستەر ءمينيسترى سەرگەي لاۆروۆ سويلەپ: «رەسەي ەشقانداي دا «بەيبىتشىلىك سامميتىنە» قاتىسپايدى»، - دەپ سويلەسە، ارتىنشا رف ءسىم وكىلى ماريا زاحاروۆا دا وسى مالىمدەمەنى قۋاتتاپ سويلەدى.

Abai.kz