پرەزيدەنت تمد-عا مۇشە مەملەكەتتەردىڭ قاۋىپسىزدىك ورگاندارى مەن ارناۋلى قىزمەتتەرىنىڭ باسشىلارىن قابىلدادى. بۇل تۋرالى اقوردا حابارلادى.

قاسىم-جومارت توقاەۆ تمد ەلدەرى قاۋىپسىزدىك ورگاندارى مەن ارناۋلى قىزمەتتەرى باسشىلارى كەڭەسىنىڭ 55-ءشى وتىرىسىنا قاتىسۋشىلارمەن كەزدەستى.

مەملەكەت باسشىسى بۇل الاڭنىڭ قاۋىپسىزدىك سالاسىنداعى كۇش-جىگەردى ۇيلەستىرۋ تەتىگى رەتىندە تانىلعانىن، سونداي-اق قازىرگىدەي كۇردەلى كەزەڭدە كەڭەستىڭ ءرولى بۇرىنعىدان دا ارتىپ كەلە جاتقانىن اتاپ ءوتتى.

پرەزيدەنت شۇعىل جانە ساراپتامالىق اقپاراتپەن دەر كەزىندە الماسۋ وڭىرلىك قاۋىپسىزدىككە تونەتىن قاۋىپتەر مەن سىن-قاتەرلەرگە قارسى تۇرۋ قابىلەتىن ارتتىرا تۇسۋگە جانە ەلدەرىمىزدىڭ ۇلتتىق مۇددەلەرىن قورعاۋ ءۇشىن ۇيلەستىرىلگەن تاسىلدەردى دايىنداۋعا ىقپال ەتەتىنىن ايتتى.

مەملەكەت باسشىسى بۇل كەزدەسۋدىڭ قورىتىندىسى حالىقارالىق قاۋىپسىزدىكتى قامتاماسىز ەتۋ سالاسىنداعى ىنتىماقتاستىقتى نىعايتۋعا سەپتىگىن تيگىزىپ، دوستاستىق مەملەكەتتەرىنىڭ ارناۋلى قىزمەتتەرى اراسىنداعى ءوزارا ىقپالداستىقتى ودان ءارى دامىتۋعا وڭتايلى جاعداي جاسايتىنىنا سەنىم ءبىلدىردى.

Abai.kz