بۇگىن قالادا «جايلى مەكتەپ» ۇلتتىق جوباسى اياسىندا سالىنعان ەكى مەكتەپ پايدالانۋعا بەرىلدى. المالى اۋىلدىق وكرۋگى بەرەكە اۋىلىندا 1200 ورىندىق №47 ورتا مەكتەپ، سارىوزەك ىقشاماۋدانىندا 300 ورىندىق №46 ورتا مەكتەپ اشىلدى. بۇل تۋرالى وبلىس اكىمىنىڭ ءباسپاسوز قىزمەتى حابارلايدى. 

ءبىلىم وردالارىنىڭ اشىلۋ سالتاناتىنا وبلىس اكىمى سەرىك شاپكەنوۆ قاتىسىپ، تۇرعىنداردى جاڭا مەكتەپتەردىڭ اشىلۋىمەن قۇتتىقتادى.

- مەملەكەت باسشىسى قاسىم-جومارت كەمەلۇلى توقاەۆ ورتا ءبىلىمنىڭ ساپاسى تابىستى ۇلت بولۋدىڭ تاعى ءبىر ماڭىزدى شارتى ەكەنىن ايتىپ، ءار وقۋشىنىڭ ساپالى ءبىلىم الۋىنا، جان-جاقتى دامۋىنا قولايلى جاعداي جاساۋدى تاپسىردى. بۇگىن ەسىگىن اشاتىن ءبىلىم ورداسىندا شاكىرتتەردىڭ بارلىق ءپاندى وقىپ-ۇيرەنۋىنە، ۇستازداردىڭ شىعارماشىلىقپەن اينالىسۋىنا تولىق جاعداي جاسالدى. بۇل مەكتەپتە مۇعالىم مەن وقۋشىنىڭ، مەكتەپ پەن اتا-انانىڭ بايلانىسى ارتىپ،  بىلىمدى دە تالانتتى، ساناسى سەرگەك، ويى ۇشقىر، باسەكەگە قابىلەتتى جاس ۇرپاق تاربيەلەنىپ شىعارىنا سەنىم مول، - دەدى س.شاپكەنوۆ.

جاڭا مەكتەپتەردە ەكى اۋىسىمدا وقيتىن 3000 بالاعا 120-دان استام ۇستاز ءبىلىم بەرەدى.

بالاسىن مەكتەپكە جەتەكتەگەن اتا-انالاردىڭ اراسىندا بەرەكە اۋىلىنىڭ تۇرعىنى حانشايىم كوپبەرگەنوۆا بار. ول سەگىز نەمەرەسىن دە №47 ءبىلىم ورداسىنا ورنالاستىرىپتى. اجەيدىڭ قۋانىشىندا شەك جوق، سەبەبى ەندى نەمەرەلەرى زاماناۋي جاراقتالعان مەكتەپتە ءبىلىم الادى.

- بۇگىن كوپتەن كۇتكەن مەكتەپ اشىلدى. ونىڭ قۇرىلىسى باستالىپ، اياقتالعانعا دەيىن كۋا بولدىق. ەندى بالالاردى قابىلداپ جاتىر. مەن دە، باسقا اتا-انالار دا ءدان ريزامىز، سەبەبى بۇعان دەيىن نەمەرەلەرىم وسى اۋىلداعى مەكتەپتە وقىدى، بىراق ورىن سانى تاپشى ەدى. بۇگىن سول ماسەلە شەشىلگەندەي، جاڭا مەكتەپكە ورنالاسىپ جاتىرمىز. بالالارىمىزدىڭ زەيىنى اشىلسىن. ەلىمىزدىڭ ماقتانىشى بولسىن، - دەدى ح.كوپبەرگەنوۆا.

مەكتەپتەرگە جەدەل باسقارۋ ورتالىعىنا قوسىلعان بەينەباقىلاۋ كامەرالارى ورناتىلىپ، ەرەكشە ءبىلىم بەرۋدى قاجەت ەتەتىن بالالار ءۇشىن كەدەرگىسىز ورتا قالىپتاستىرىلدى. باستاۋىش جانە جوعارعى سىنىپ وقۋشىلارى ءۇشىن بولەك بلوكتار سالىنعان.

مەكتەپ اۋماعى 2 جۇگىرۋ جولاعىمەن، باسكەتبول، ۆولەيبول الاڭدارىمەن، تەننيس كورتىمەن، ويىن جانە workout الاڭدارىمەن جابدىقتالعان.

مەكتەپ عيماراتىندا 2 سپورت زال، باستاۋىش جانە جوعارى سىنىپ وقۋشىلارىنا ارنالعان ەكى اسحانا، 260 ورىندىق اكت زال جانە كىتاپحانا بار.

سونىمەن قاتار پسيحولوگ، لوگوپەد، مەديتسينالىق كابينەتتەرىمەن، زاماناۋي ۇلگىدەگى وقۋ سىنىپتارىمەن، فيزيكا، حيميا زەرتحانالارىمەن جانە STEM كابينەتتەرىمەن جاراقتالعان.

«جايلى مەكتەپ» ۇلتتىق جوباسى اياسىندا  وسى جىلدىڭ سوڭىنا دەيىن تاعى ءۇش مەكتەپ پايدالانۋعا بەرىلەدى.

2025 جىلدىڭ اياعىندا جايلى مەكتەپتەردىڭ سانى 12-گە جەتىپ، 12 مىڭنان استام وقۋشى ساباققا بارادى.

Abai.kz