الگى ءبىر بلوگەر مۇقاعالي ولەڭىن عانا ەمەس، مۇقاعالي جانىن دا ۇقپايتىن، ءوزىن كەرەمەت ساناعان نارتسيست ەكەن.

ول مۇقاعالي ولەڭىن تۋعان كۇنىندە ەرىنبەگەن پەندە پىسىرەتىن جارتى قازان قۋىرداققا تەڭەپ جىبەرىپتى... مۇقاعالي ءوز ولەڭدەرىن حالىق وقيتىنىن، ونى اقىن رەتىندە حالقىنىڭ مويىنداعانىن بىلمەيدى ەمەس، بىلەدى...

سو كەزدە، شاتىپ-پۇتىپ اقىن-جازۋشىمىن دەپ جۇرگەن بىرەۋلەر ءوز پىسىقايلىعىمەن اتاقتار الىپ، ولاردىڭ تۋعان كۇندەرى سارايلاردا تويلانىپ جاتقانىن دا مۇقاعالي بىلەدى... سول سەبەپتى، مۇقاعالي «حالقىم جاتىر نەگە تويلاماي» دەپ، ءوز جان كۇيزەلىسىن ايتادى...

بيلىكتىڭ قىرعي-قاباعىن كورىپ، كىتاپتارى بۇعاۋلانىپ، گونوراردان قاعىلىپ جۇرگەن كۇيىن «قۇدايدىڭ ءبىر جارىتپاي قويعانى-اي» دەگەن سوزبەن اياقتايدى...

ارينە، ول «مىنا بيلىكتىڭ ءبىر جارىتپاي قويعانى-اي» دەۋىنە دە بولار ەدى، ءارى، وعان تولىق قاقىسى بار دا! الايدا، اقيىق اقىن ءوزى كۇندەلىكتى كورىپ جۇرگەن، بيلىك ماڭىنداعى كۇندەستەردىڭ دەڭگەيىنە ءتۇسۋدى وزىنە ار سانايدى.

ونداي پەندەلىكتەن ءوزىن جوعارى ۇستايدى...

سوندىقتان، قازاقتىڭ «شۇناقسىڭ»، «سوقىرسىڭ» دەگەن قارعىسىنا ابدەن ەتى ۇيرەنىپ، ول ءۇشىن وعان تيىسپەيتىن، جاعاسى جايلاۋ «قازاقى قۇدايىن – ءتاڭىرىن» العا سالىپ قويادى... سونىسىمەن-اق ول ءوزىن تىكەلەي «قۇدايمەن تىلدەسەر» دەڭگەيگە كوتەرەدى...

ادەيى ەمەس، شىنايى... ويتكەنى، ول ءوزى «قۇدايتەكتەس» ادام عوي، مۇمكىن، ونى ءوزى ەلەمەگەن بولسا دا! مىنە، بلوگەر بالاقاي وسىنى ۇقپاعان...

ءابدىراشيت باكىرۇلى

Abai.kz