كولىك مينيسترلىگى اۋە كومپانيالارىنىڭ بيلەتتەرى نە سەبەپتى قىمبات بولاتىنىن ءتۇسىندىردى، دەپ حابارلايدى BAQ.KZ .

كولىك ءمينيسترى مارات قاراباەۆتىڭ سوزىنە قاراعاندا، حالىقارالىق تاجىريبەگە سايكەس باعا بەلگىلەۋ زاڭمەن رەتتەلمەيدى. باعا بەلگىلەۋدىڭ نارىقتىق تەتىگى (سۇرانىس، ۇسىنىس) قولدانىلادى.

اۋە كومپانيالار شىعىستارىنىڭ شامامەن 80%-ى، دالىرەك ايتقاندا، ساتىپ الۋ نەمەسە ليزينگ، قوسالقى بولشەكتەردى ساتىپ الۋ جانە ت.ب. شەتەل ۆاليۋتاسىندا جۇرگىزىلەتىنىن اتاپ ءوتۋ قاجەت. ال اۋە كومپانيا تابىسىنىڭ 80%-عا جۋىعى تەڭگەمەن الىنادى. وسىعان بايلانىستى ءوز شىعىندارىن جابۋ ءۇشىن اۋە كومپانيالارى ۆاليۋتا باعامىنىڭ قىسىمىنا بايلانىستى بيلەتتەردىڭ قۇنىن تۇزەتۋگە ءماجبۇر. سوڭعى 5 جىلدا ۆاليۋتا باعامى 327 تەڭگە/اقش دوللاردان (2018 جىل) 478 تەڭگەگە/اقش دوللارىنا دەيىن وزگەردى (2024 جىلعى تامىز), - دەلىنگەن ءمينيستردىڭ رەسمي جاۋابىندا.

وسىعان قاراماستان، قازاقستاندىق اۋە كومپانيالارىنىڭ بيلەتتەرىنىڭ قۇنى دوللارلىق بالامادا وزگەرگەن جوق، سونداي-اق ىشكى مارشرۋتتار بويىنشا اۋە بيلەتتەرىنىڭ باعاسى قازىرگى ۋاقىتتا 2021 جىلعى قاراشا دەڭگەيىندە قالىپ وتىر.

قاراباەۆتىڭ ايتۋىنشا، اۋە بيلەتتەرىنىڭ باعاسى مەملەكەتتىك رەتتەۋگە جاتپايدى.

ال ەگەر اۋە كومپانياسى باعانى نەگىزسىز كوتەرسە، كاسىپكەرلىك كودەكسكە سايكەس باسەكەلەستىكتى قورعاۋ جانە دامىتۋ اگەنتتىگى مونوپولياعا قارسى دەن قويۋ شارالارىن قولدانادى. بۇگىندە جولاۋشىلار اعىنى كورسەتكىشىنىڭ ارتۋىنا بايلانىستى اۋە كەمەلەرىنىڭ پاركىن كەڭەيتۋ جانە تاسىمالداۋ سىيىمدىلىعىن ارتتىرۋ بويىنشا جۇمىستار جۇرگىزىلىپ جاتىر. 2025 جىلدىڭ سوڭىنا قاراي اۋە كەمەلەرىنىڭ پاركى جاڭا 19 كەمەمەن ۇلعايتىلىپ، 120 بورتتى قۇرايدى دەپ كۇتىلىپ وتىر. بۇل تاسىمالداۋ سىيىمدىلىعىن 20%-عا ارتتىرادى، - دەپ ءتۇسىندىردى كولىك ءمينيسترى.

Abai.kz