2024 جىلعا ارنالعان وقۋ جوسپارىنا سايكەس جەكە قۇرامدى تەستىلەۋ جانە جاۋىنگەرلىك دايارلىق پاندەرىنەن سىناقتار تاپسىرۋ قازان ايىنىڭ سوڭىنا دەيىن جالعاسادى. ونىڭ ناتيجەلەرى بويىنشا بولىمشەلەردىڭ جاۋىنگەرلىك ازىرلىگى مەن جاۋىنگەرلىك قابىلەتىنىڭ دەڭگەيى باعالاناتىن بولادى. 

قوناەۆ گارنيزونىندا اسكەري قىزمەتشىلەر تاكتيكالىق، ارنايى، اتىس، ساپتىق، دەنە شىنىقتىرۋ جانە باسقا دا دايارلىق تۇرلەرىن قامتيتىن جاۋىنگەرلىك دايارلىقتىڭ نەگىزگى پاندەرىنەن سىناقتار تاپسىرۋدا. اسكەري توپوگرافيا، رادياتسيالىق، حيميالىق جانە بيولوگيالىق قورعانىس، جاۋىنگەرلىك ماشينالار مەن اۆتوموبيل تەحنيكاسىن جۇرگىزۋ داعدىلارىنان بىلىمدەرى تەكسەرىلىپ جاتىر.

قارۋ-جاراق پەن اسكەري تەحنيكانىڭ جاعدايى دا زەردەلەنۋدە. باعىنىستى قۇرامالاردا جاۋىنگەرلىك دايارلىققا باسشىلىق ەتۋ بويىنشا لاۋازىمدى تۇلعالاردىڭ جۇمىسىن ۇيىمداستىرۋ جۇيەسىنە ەرەكشە نازار اۋدارىلادى.

– ءاربىر اسكەري قىزمەتشى جەكە جانە بولىمشە قۇرامىندا تەك تەوريادا عانا ەمەس، پراكتيكادا دا ەمتيحان تاپسىرۋى ءتيىس. بريگادانىڭ ءاربىر بولىمشەسى باعالانادى، – دەدى 32363 اسكەري ءبولىمىنىڭ جاۋىنگەرلىك دايارلىق جونىندەگى دەسانتتىق-شابۋىلداۋ باتالونى كومانديرىنىڭ ورىنباسارى گۆارديا كاپيتانى باۋىرجان سەرۋباەۆ.

قارۋلى كۇشتەر باس شتابى كوميسسياسى اسكەري-تەڭىز كۇشتەرىنىڭ دايىندىعىن تەكسەردى. كەشەندى تەكسەرىس اسكەري قىزمەتشىلەر مەن بولىمشەلەردى دايارلاۋدىڭ بارلىق اسپەكتىلەرىن قامتىدى.

ءبىرىنشى كەزەڭدە ساپتىق جيىن وتكىزىلدى، وندا جەكە قۇرامنىڭ سىرتقى تۇرىنە قويىلاتىن تالاپتاردىڭ ساقتالۋى زەردەلەندى، مەملەكەتتىك-قۇقىقتىق پاندەر مەن جالپى اسكەري جارعىلاردان ءبىلىمى تەكسەرىلدى.

– كەشەندى تەكسەرىس اسكەري قىزمەتشىلەردىڭ دايارلىق دەڭگەيىن باعالاۋعا، سونداي-اق اسكەري-تەڭىز كۇشتەرىنىڭ باسقارۋ ورگاندارى مەن بولىمشەلەرىنىڭ ۇيلەسىمدىلىك دارەجەسىن انىقتاۋعا مۇمكىندىك بەرەدى، – دەدى تەكسەرۋ باسشىسى قورعانىس مينيسترلىگى ستراتەگيالىق دامۋ دەپارتامەنتىنىڭ اعا وفيتسەرى پولكوۆنيك جالعاس بالابەكوۆ.

كوميسسيا جاۋىنگەرلىك كەزەكشىلىكتىڭ ۇيىمداستىرىلۋىن، ديۆەرسياعا قارسى قاۋىپسىزدىكتىڭ جاي-كۇيىن، لاۋازىمدى تۇلعالاردىڭ باعىنىستى قۇرامالار مەن اسكەري بولىمدەردەگى جاۋىنگەرلىك جانە جۇمىلدىرۋ دايىندىعى ماسەلەلەرىن ۇيىمداستىرۋ ساپاسىن تەكسەردى.

قورىتىندى تەكسەرىس جىل سايىن وقۋ جىلىنىڭ سوڭىندا بارلىق اسكەري بولىمدەردە جۇرگىزىلەدى. ءار جىلدا وتەتىن تەستىلەۋ اسكەرلەردىڭ جاۋىنگەرلىك دايىندىعى مەن جاۋىنگەرلىك قابىلەتىن قامتاماسىز ەتۋگە، بولىمشەلەردىڭ تيىمدىلىگى مەن ۇيلەسىمدىلىگىن ارتتىرۋعا باعىتتالعان.

Abai.kz