پاتەر الىپ-ساتۋمەن اينالىساتىن، باشكاستىي كورشىمىز بار. كوتلوۆانعا اقشا قۇيۋدىڭ ارتىقشىلىعى مەن تاۋەكەلدەرىن بۇگە-شىگەسىنە دەيىن بىلەدى...

ۇتىمدى ۆاريانت كورسە، ءبىز سەكىلدى ون ويلانىپ، ءجۇز تولعانىپ جاتپايدى. اقشاسى جەتپەي جاتسا، استىنداعى كولىكتى دە اينالىمعا جىبەرىپ، قۇرىلىستىڭ ەڭ ەرتە كەزەڭىندە ينۆەستيتسيا جاساپ قويادى.

ROI-Return on Investment (ينۆەستيتسيا قايتىمى), CAP rate (كىرىس كوەففيتسيەنتى), پاتەردىڭ جىلدىق كاپيتال ءوسىمى دەگەن ۇعىمداردى العاش وسى كورشىمنەن ەستىدىم. اڭگىمەسىڭ تىڭداساڭ، فەيسبۋكتەگى "اسانقايعىلانعان" اۋرانىڭ قۇرساۋىنان بوساپ، ومىرگە دەگەن قۇلشىنىسىڭ ويانىپ، ساۋاتىڭ اشىلىپ، كاسىپ باستاعىڭ كەلىپ كەتەدى))

سول كورشىم ايتادى، الماتىدا كوتلوۆان كەزەڭىندە ساتىپ الىنعان پاتەردىڭ باعاسى جوبانىڭ تولىق اياقتالۋىنا دەيىن 30-40 پايىزعا دەيىن وسەدى ەكەن (كەيدە 50-گە دەيىن بارادى).

جاڭىلىسپاسام، بىلتىر اتاكەنتتىڭ جانىنداعى جەتى قاباتتى جك-دان كوتلوۆان ساتىندە 40 ملن تەڭگەگە ەكى بولمەلى ءۇي الىپ قويدى، سونى تۇنەۋكۇنى 55 ملن تەڭگەگە ساتىپتى. باعانىڭ ءوسۋى: 55 ملن – 40 ملن = 15 ملن تەڭگە (تازا تابىس).

ىلگەرىدە ايتقان ROI = (پايدا / باستاپقى ينۆەستيتسيا) x 100 = (15 ملن / 40 ملن) x 100 = 37.5%. كورشىمنىڭ تىلىمەن ايتقاندا، ينۆەستيتسيانىڭ قايتارىمى 37.5 پايىزدى قۇراعان. سونىڭ الدىندا تاعى ءبىر جك-داعى پاتەرىن 60 ملن-نىڭ ۇستىندە ساتتى. بۇل ەندى مەن بىلەتىنى عانا.

كوتلوۆانعا اقشا قۇيۋدىڭ ءبىر ارتىقشىلىعى، قۇرىلىستىڭ باستاپقى كەزەڭىندە ساتىپ الۋشىلارعا پاتەردىڭ ءتۇرى، ورنالاسۋى مەن ەتاجى بويىنشا كەڭىرەك تاڭداۋ بەرىلەدى ەكەن.

"جوبا اياقتالعانعا دەيىن ەڭ تارتىمدى پاتەرلەر، مىسالى جوعارى قاباتتاعى كورىنىسى ادەمى پاتەرلەر نەمەسە اۋدانى ۇلكەن پاتەرلەر ىستىق پيراجكي سەكىلدى لەزدە ساتىلىپ كەتەدى. زاسترويششيكتەر كوتلوۆان كەزەڭىندە كليەنت تارتۋ ءۇشىن جەڭىلدىكتەر مەن يكەمدى تولەم شارتتارىن ۇسىنادى. ءبولىپ تولەۋ ارقىلى ساتىپ الۋ مۇمكىندىگىنە يە بولاسىڭ نەمەسە باستاپقى جارنانى تومەندەتىپ الۋعا بولادى" دەيدى كورشىم.

وتكەندە قاراسام، جاياۋ ءجۇر. استىنداعى كولىگىن ساتىپ جىبەرىپ، تاعى ءبىر كوتلوۆانعا اقشا قۇيىپتى. "ول پاتەردى، بۇيىرسا، جالعا بەرەم. الگى اۋداندا ءبىر بولمەلى پاتەردىڭ ارەنداسى ايىنا 400 مىڭنان كەم ەمەس. ءۇيدى كەلەر جىلعا دەيىن اياقتاسا، ءبىر-ەكى ايدا رەمونتىن رەتتەپ، بۇيىرسا، جىل سايىن 4.8 ملن تەڭگە تۇراقتى كىرىس الامىن", - دەپ وتىر.

ىلگەرىدەگى CAP rate (كىرىس كوەففيتسيەنتى) دەگەنىڭ جىلدىق جالعا بەرۋ كىرىسىنە قاتىستى كورسەتكىش ەكەن. CAP Rate = (جالعا بەرۋ قۇنى / پاتەردىڭ قۇنى) x 100 = (4.8 ملن / 50 ملن) x 100 = 9.6%

بىلايشا ايتقاندا، جالعا بەرۋدەن تۇسەتىن ديۆيدەند قوي. كورشىم پاتەردى ارەنداعا بەرۋدەن جىل سايىن پاتەر قۇنىنىڭ 9.6% -ىن تابىس رەتىندە الىپ وتىرادى.

جالپى، مۇنداي جىگىتتەرمەن ارالاسقاننىڭ ءجونى بولەك ەكەن. ەڭ باستىسى، اڭگىمەسىنەن شارشامايسىڭ. احىلەپ، ۇحىلەگەنىن كورمەيسىڭ. بيزنەس، فينانس، تۇتاستاي العاندا تاۋەكەل مەنەجمەنتىن مىقتى مەڭگەرگەن. مەنىڭ "فب-داعى پوستىمدى وقىماپسىڭ، وقىساڭ دا لايك باسپاي وتە شىعىپسىڭ" دەپ وكپە ارتپايدى، "ۇلت ءۇشىن ۇيقى كورمەي ءجۇرمىن" دەگەن وبرازعا ەنبەيدى، پافوسپەن اينالىسپايدى.

ەسەسىنە، جاقسى ءومىر سۇرەدى. ءبارى بار.

ينۆەستيتسيا جاساماس بۇرىن نارىقتىڭ تسيكلىن، جوبانىڭ پوتەنتسيالىن، ءينفلاتسيانىڭ اسەرىن، زاسترويششيكتىڭ بەدەلىن جانە ماكروەكونوميكالىق احۋالدى مۇقيات زەرتتەيدى. شىنى كەرەك، "پەرەكۋپ" دەگەن سۇيكىمسىز سوزگە قيمايسىڭ. زاماننىڭ اۋانىن سەزەتىن ادام دەگەن دۇرىس شىعار. مىسالى، ءبىز كوبىنە دايىن ءونىمدى ساتىپ الامىز عوي. بۇلار ەشكىم كورمەگەندى كورەدى. ساناسىندا نارىقتىڭ زاڭدىلىقتارى مەن ناقتى ساندار تۇرادى.

بايقاعانىم، مۇنداي جىگىتتەر بالالارىنا ەڭبەك پەن تابىستىڭ بايلانىسىن، نارىقتىڭ پرينتسيپتەرىن ەرتە جاستان ۇيرەتەدى، ولاردى تاۋەلسىز ءارى قابىلەتتى تۇلعا رەتىندە قالىپتاستىرۋعا تىرىسادى.

بالا-شاعاسىنىڭ بۇگىنگى قاجەتتىلىكتەرىن قامتاماسىز ەتىپ قانا قويماي، ولارعا بولاشاقتا قارجىلىق ەركىندىك بەرەتىندەي اكتيۆتەردى جيناقتايدى. بۇلاردىڭ تابىس تابۋى بىزدىكى سەكىلدى كۇندەلىكتى قاجەتتىلىكتى جابۋ ەمەس، جان-جاقتى قامتىلعان قارجىلىق ەكوسيستەما قۇرۋ. فۋكۋياماشا ايتقاندا، كاپيتالدى ءوسىرۋ، قۇندىلىق جاساۋ، مۇرا قالدىرۋ پرينتسيپتەرىن تەرەڭ مەڭگەرگەن.

وتكەندە سويلەسە قالعاندا، ەلدەن كوشەتىن نيەتى بارىن اڭعارتىپ قالدى. سوعان قاراعاندا وتباسىنا ۇزاق مەرزىمدى تۇراقتىلىق بەرەتىن، بالالارىنا جاقسى ءبىلىم مەن ومىرلىك مۇمكىندىكتەر سىيلايتىن رەسۋرس جيناعان سەكىلدى.

دۋمان بىقايدىڭ جەلىدەگى جازباسى

Abai.kz