«2022 جىلى ۇكىمەتكە ازاماتتاردى اسكەري-پاتريوتتىق تاربيەلەۋ ءتارتىبىن ايقىنداۋ قۇقىعى بەرىلگەن بولاتىن. سول جىلى-اق ءتيىستى ەرەجەلەر قابىلداندى، بىراق بۇل ءىس-ارەكەت قالىپتاسقان جاعدايدى وزگەرتپەدى»، - دەيدى دەپۋتات.

وسىنى ەسكەرگەن پارلامەنتتىڭ ءبىر توپ دەپۋتاتى اسكەري-پاتريوتتىق تاربيەنى جەتىلدىرۋگە باعىتتالعان زاڭ جوباسىن ازىرلەپ وتىر.

ايگۇل قۇسپاننىڭ ايتۋىنشا، زاڭ جوباسى «اسكەري قىزمەت تۋرالى» زاڭىن «اسكەري-پاتريوتتىق تاربيە»، «اسكەري-پاتريوتتىق تاربيە جۇيەسى» تەرميندەرىنىڭ مازمۇنىن زاڭنامالىق تۇرعىدان ايقىندايتىن جاڭا باپپەن تولىقتىرادى.

سونىمەن قاتار وسى نورما رەسپۋبليكالىق جانە وڭىرلىك دەڭگەيلەردە اسكەري-پاتريوتتىق تاربيە جونىندەگى ۇيلەستىرۋ كەڭەستەرىن قۇرۋدى كوزدەيدى.

ول كەڭەستەرگە مىنانداي مىندەتتەر جۇكتەلمەك:

– اسكەري-پاتريوتتىق تاربيەنى دامىتۋ ماسەلەلەرى بويىنشا ۇسىنىستار ازىرلەۋ;

– اسكەري-پاتريوتتىق تاربيەگە مۇددەلى مەملەكەتتىك ورگاندار مەن ۇيىمداردىڭ، قوعامدىق بىرلەستىكتەردىڭ كۇش-جىگەرى مەن مۇمكىندىكتەرىن بىرىكتىرۋ;

– جاستاردىڭ بويىندا قازاقستان ارمياسىنىڭ جاعىمدى بەينەسىن قالىپتاستىراتىن كوركەم جانە دەرەكتى فيلمدەر جاساۋ، مۋزىكا جانە ادەبي شىعارمالار تۋدىرۋ، باسپا ونىمدەرىن شىعارۋ، تەلەارنالاردا اسكەرلەر تۋرالى تسيكلدى حابارلار جۇرگىزۋ جانە الەۋمەتتىك جەلىلەردە شىنشىل اقپارات بەرۋ.

سونداي-اق زاڭ جوباسىندا جوعارى وقۋ ورىندارىنىڭ جانىندا جۇمىس ىستەيتىن اسكەري كافەدرالاردىڭ جەلىسىن كەڭەيتۋ ۇسىنىلىپ وتىر. دەپۋتات يۋليا كۋچينسكايانىڭ ايتۋىنشا، ەلدەگى ستۋدەنتتەردىڭ 1 پايىزدان استامى عانا اسكەري كافەدراعا تارتىلادى.

دەپۋتاتتار جوعارى ءبىلىم الىپ جۇرگەن ستۋدەنتتەردىڭ اسكەري بورىشىن وتەۋ مەرزىمىن كەيىنگە شەگەرۋ ماسەلەسىن ءبىرجولا رەتتەۋدى ۇسىنىپ وتىر. ناقتى ايتساق، ءبىر جوعارى وقۋ ورنىن ءبىتىرىپ، ەكىنشى وقۋعا تۇسكەن ستۋدەنت اسكەري بورىشىن وتەۋ مەرزىمىن كەيىنگە شەگەرە المايدى. تەك الدىڭعى ءبىلىمىن جەتىلدىرۋ ءۇشىن ماگيستراتۋرا تۇسسە، كوللەدجدە العان ءبىلىمىن ۋنيۆەرسيتەتتە جالعاستىراتىن بولسا عانا اسكەري بورىشىن وتەۋ مەرزىمىن شەگەرە الادى.

Abai.kz