قازاقستان پرەمەر-ليگاسى (قپل) كلۋبتارىنىڭ وبلىستىق جانە قالالىق اكىمدىكتەرمەن قانداي سومالارعا كەلىسىمشارت جاساسقانى بەلگىلى بولدى.

«دياديا ۆانيا» Telegram ارناسىنىڭ مالىمەتىنشە، بيىل قپل كوماندالارى 25,68 ملرد تەڭگە كولەمىندە تەندەر جەڭىپ العان.

مەملەكەتتىك ساتىپ الۋ سايتىندا تاعى ءۇش تەندەر بويىنشا ساۋدا ءجۇرىپ جاتىر. ونىڭ ەكەۋىن اقتوبە وبلىسىنىڭ مادەنيەت جانە سپورت باسقارماسى 187,5 ملن تەڭگە مەن 312,5 ملن تەڭگەگە جاريالادى. ال شىمكەنت قالاسىنىڭ دەنە شىنىقتىرۋ جانە سپورت باسقارماسى تاعى ءبىر تەندەردى 892,9 ملن تەڭگەگە جاريالادى.

قالعان كەلىسىمشارتتار جاسالعاننان كەيىن جەرگىلىكتى بيۋدجەتتەردىڭ ەليتالىق ديۆيزيون كلۋبتارىنا جۇمسايتىن شىعىندارى 1,38 ملرد تەڭگەگە ارتىپ، 27,06 ملرد تەڭگەگە جەتەدى دەپ كۇتىلۋدە.

بۇل سومانىڭ قۇرامىنا «استانا» فك-نىڭ شىعىندارى كىرمەيدى، سەبەبى سوڭعى جىلدارى ەلوردالىق كوماندانى سپورت سالاسىنداعى بيۋدجەتتەن تىس قاراجاتتاردى بولۋگە ارنالعان بىرىڭعاي وپەراتور «Sport Qory» ارقىلى كۆازيمەملەكەتتىك سەكتور قارجىلاندىرادى.

«پروفەسسيونالدى كلۋبتاردى قارجىلاندىرۋ شىعىندارىن سامۇرىق-قازىنا» اق-نىڭ باعىنىشتى ۇيىمى تەك كەلەسى جىلى جاريالايتىن بولادى. سوندىقتان «استانا» فك-نى قارجىلاندىرۋ سوماسىن تەك شامالاپ قانا ايتۋعا بولادى. دەگەنمەن، وتكەن ماۋسىمدا قور بۇل ماقساتتارعا 5,3 ملرد تەڭگە، ال ودان الدىڭعى جىلى 4,8 ملرد تەڭگە جۇمساعانى تۋرالى الدىڭعى ەسەپتەردە ايتىلعان»، - دەلىنگەن حابارلامادا.

سونداي-اق، «اقتوبە» فك وبلىستىق دەنە شىنىقتىرۋ جانە سپورت باسقارماسىمەن 3 جىلعا 5,712 ملرد تەڭگە كولەمىندە كەلىسىمشارتقا قول قويدى.

جۋرناليستەر 2024 جىلى جەرگىلىكتى بيۋدجەتتەردەن فۋتبولدى قارجىلاندىرۋ كولەمى تۋرالى مالىمەتتەردى جاريالادى:

🔴 «ورداباسى» كاسىپقوي فۋتبول كلۋبى» اق - 5,3 ملرد تەڭگە (سپورتقا جۇمسالاتىن وبلىس شىعىندارىنىڭ 87,1%);

🔴 «وبلىستىق فۋتبول كلۋبى «اقتوبە» اق - 4,55 ملرد تەڭگە (40,1%);

🔴 «ەلىماي» فۋتبول كلۋبى قق - 2,341 ملرد تەڭگە (72%);

🔴 «قىزىل-جار سك» فۋتبول كلۋبى» جشس - 2 ملرد تەڭگە (51,5%);

🔴 «وبلىستىق فۋتبول كومانداسى «اتىراۋ» جشس – 1,9 ملرد تەڭگە (29%);

🔴 «توبىل» فۋتبول كلۋبى قق - 1,647 ملرد تەڭگە (46,9%);

🔴 «قايسار» قىزىلوردا وبلىستىق فۋتبول كلۋبى» جشس - 1,636 ملرد تەڭگە (70,6%);

🔴 «جەڭىس» فك» جشس - 1,599 ملرد تەڭگە (28,9%);

🔴 «تۇران» كاسىبي فۋتبول كلۋبى» مكقك - 1,399 ملرد تەڭگە (24,7%);

🔴 «جەتىسۋ» فۋتبول كلۋبى» مكقك - 1,396 ملرد تەڭگە (32,7%);

🔴 «شاحتەر» فۋتبول كلۋبى» اق - 1,2 ملرد تەڭگە (17,1%);

🔴 «قايرات» فۋتبول كلۋبى» جشس - 0,75 ملرد تەڭگە (3,2%).

ەسكە سالا كەتەيىك، قاڭتار ايىندا قىزىلوردا وبلىسىنىڭ «قايسار» فۋتبول كلۋبىن 5 جىلعا سەنىمگەرلىك باسقارۋعا بەرۋ جانە ونى كەيىن ساتىپ الۋ جوسپارى حابارلانعان بولاتىن. سول كەزدە لوتتىڭ باستاپقى باعاسى 1,6 ملرد تەڭگە بولىپ بەلگىلەندى، العاشقى جارناسى – 252,9 ملن تەڭگە.

قازان ايىنىڭ باسىندا «كاسپي» فۋتبول كلۋبىنىڭ بۇرىنعى ويىنشىلارى مەن قىزمەتكەرلەرى سوت ارقىلى جالاقى تولەمدەرىن الۋعا قول جەتكىزدى. كلۋب ولارعا ميلليونداعان تەڭگە قارىز بولعان.

سول ۋاقىتتا مەملەكەت قاراجاتىمەن قارجىلاندىرىلاتىن «قايسار» فۋتبول كلۋبىنىڭ ويىنشىلارى بىرنەشە اي بويى جالاقى الماعانى انىقتالدى.

قاراشا ايىندا «قازاقستان فۋتبول فەدەراتسياسى» (قفف) پرەزيدەنتى ادىلەت بارمەنقۇلوۆ ءوز ورنىنان كەتەتىنىن جاريالادى. قفف پرەزيدەنتى رەتىندەگى بارمەنقۇلوۆتىڭ قىزمەتى فۋتبول جانكۇيەرلەرىنىڭ سىنىنا ءجيى ۇشىراپ، ءتىپتى ۋەفا باسشىلىعىنىڭ كۇدىگىن تۋعىزعانى تۋرالى فبرك رەداكتسياسى بىرنەشە رەت جازعان بولاتىن.

بارمەنقۇلوۆتىڭ فۋتبول فەدەراتسياسىنىڭ باسشىسى رەتىندەگى قىزمەتىنە قوعامنىڭ نەگە نارازىلىق بىلدىرگەنىن، قانداي جەمقورلىق داۋلارىنا ارالاسقانىن جانە قانداي بيزنەسكە يە بولعانىن سىلتەمەدەن وقۋعا بولادى.

دەرەككوزى: fund_anticorr

Abai.kz