يننوۆاتسيانى دامىتۋعا ارنالعان زاڭ جوباسىن تالقىلاۋ كەزىندە Astana Hub حالىقارالىق تەحنوپاركى مەن «يننوۆاتسيالىق تەحنولوگيالار پاركى» دەربەس كلاستەرلىك قورىن بىرىكتىرۋ پروتسەسىن زاڭمەن رەتتەۋ نورمالارى تانىستىرىلدى.

دەپۋتاتتار اتالعان ەكى ۇيىمعا مەملەكەتتەن ۇلكەن قولداۋ كورسەتىلىپ وتىرعانىمەن سوعان سايكەس باقىلاۋ بولماي جاتقانىن سىنادى.

«جالپى تەحنوپاركتە قازىرگى تاڭدا 18 ملرد تەڭگەگە 204 جوبا جۇزەگە اسىرىلىپ جاتىر. سونداعى ءار جوبادان قانشا سالىق تۇسكەنى، قانشا جۇمىس ورنىن اشقانى تۋرالى تالداۋ جاسالۋ كەرەك. سوڭعى بەس جىلدا تەحنوپارك پەن Astana Hub-تا قانشا سۋبەكت بولدى؟ ولار نە ىستەپ جاتىر؟ قانشا كىرىس تاپقانىن جازباشا ۇسىنىڭىزدار. ءبىز سوعان تالداۋ جاساۋىمىز كەرەك»، - دەدى نۇرتاي سابيليانوۆ.

دەپۋتات ءتىپتى Astana Hub-تا تىركەلگەن كاسىپورىندارعا ۇسىنىلىپ وتىرعان سالىق جەڭىلدىكتەرىن ازايتۋدى ۇسىندى.

«بەس جىلدا Astana Hub 864 ملرد تەڭگە كىرىس العان ەكەن. سودان بيۋدجەتكە بار تولەگەنى 7 ملرد 630 ملن تەڭگە عانا. ال ونداعى سۋبەكتىلەرگە 133 ملرد تەڭگە سالىق جەڭىلدىگى بەرىلگەن. سوندىقتان سالىق كودەكسىن قاراعان كەزدە وسىنداي سالىق جەڭىلدىكتەرىن الىپ تاستاۋعا جۇمىس ىستەۋىمىز كەرەك. نەگە ءبىز بيزنەس سۋبەكتىلەرگە سالىق جەڭىلدىكتەرىن بەرىپ، سۋبسيديا بەرەمىز؟ ال باسقا سالالارعا اقشا جەتپەي جاتادى. ەگەر ونداعى جوبالار جاڭا جۇمىس ورىندارىن اشىپ، جاڭا تەحنولوگيالاردى دامىتىپ جاتسا تۇسىنەر ەدىم. ال بىزدە جاڭالىق جوق. سوندىقتان وسى جاعىنا باستى نازار اۋدارامىز»، - دەدى ءماجىلىس دەپۋتاتى.