وتكەن عاسىردىڭ 90 جىلدارى جامبىل قالاسىندا مۇستافا اعامىز تاەكۆوندو مەكتەبىن اشتى. العاشقى شاكىرتتەرى ساناتىندا قاسىندا جۇردىك. ءدۇيىم ەلدىڭ الدىندا بەلىندەگى بەلبەۋىن بەلىمە بايلاپ «مارالتاي — قارا ولەڭنىڭ قارا بەلبەۋى!» - دەگەن لەبىزى ءالى ەسىمدە. اعام بۇگىن بار بولعاندا 70 جاسقا تولار ەدى!

قارا بەلبەۋ

مارالتاي - پوەزيانىڭ “قارا بەلبەۋى”.

(مۇستافا وزتۇرىك)

جۇدىرىعىم تاسقا تيسە قۇم قىلعان،

تاعدىرىمدى تالاي اقىن جىر قىلعان.

البىرت ەدىم باسقا نوقتا تۇسپەگەن،

بالشاراپتان باسقا سۋسىن ىشپەگەن.

ءبارى ەسىمدە كوشەسىندە جامبىلدىڭ

باعىمدى ىزدەپ ماڭگىردىم مەن، قاڭعىردىم.

ءوزىمدى-ءوزىم جوقتاپ ءجۇردىم تابا الماي،

قۇپياسى اشىلماعان ارالداي.

تانىسىپ ەك سونداي كۇننىڭ بىرىندە،

تابىسىپ ەك سونداي كۇننىڭ بىرىندە،

التى الاشتىڭ ارلان ۇلى مۇستافا،

التى الاشتىڭ تارلان ۇلى مۇستافا!

قازاعىم دەپ قابىرعاسى سوگىلگەن،

مەن سياقتى جان ەكەنسىڭ دەدىم مەن…

جىر وقىدىم: كوگى كەتكەن بەل جايلى،

جىر وقىدىم: كەگى كەتكەن ەل جايلى.

جىر وقىدىم جانارىمنان جاس پارلاپ،

بارا جاتتى جان-دۇنيەم اسپاڭداپ.

تۇردىم سوندا قوشەمەتتەن تاسىنىپ،

تۇردى حالىق ارۋاعىمدى اسىرىپ.

اقىن ەكەن دەدى بىرەۋ شىنىمەن،

باتىر ەكەن دەدى بىرەۋ… مۇڭىمەن.

التى الاشتىڭ ارلان ۇلى مۇستافا،

التى الاشتىڭ تارلان ۇلى مۇستافا!

جىرلارىمدى تىڭداپ بولىپ ول-داعى،

قازاق جايلى تەبىرەنىپ تولعادى.

ونىڭ-داعى اڭساعانى - ازاتتىق،

مەنىڭ-داعى اڭساعانىم - ازاتتىق.

شەشىپ بەردى بەلىندەگى بەلبەۋىن،

قارا بەلبەۋ تۇڭعىش رەت كورگەنىم.

باتىل بول دەپ نامىسىمدى قايرادى،

بەلىمە اكەپ ءوز قولىمەن بايلادى.

ول تانىدى مەنى ۇلكەن باتىر دەپ،

مەن تانىدىم ونى ۇلكەن اقىن دەپ.

مەن سول ساتتە باقىتتى ەدىم، ول -انىق،

تۇردى سولاي قۇشاقتاسىپ، قول الىپ.

قارا بەلبەۋ — قارا كۇشتىڭ اقىنى،

قارا بەلبەۋ — قارا ولەڭنىڭ باتىرى!

مارالتاي رايىمبەكۇلىنىڭ جەلىدەگى پاراقشاسىنان الىندى. 

Abai.kz