التىن استاۋدان جەم جەپ وتىرعان ءبىر سايتتار بار. الگىلەردى كەيدە اقتارىپ شىعامىن. قۇداي-اۋ، بىرەۋىندە ءبىر ءجوندى ماقالا جوق قوي، جوق. تانىمدىق، ساراپتامالىق ماقالالاردى تابۋ ءتىپتى قيىن. جازاتىندارى، جاريالايتىندارى - اقپارات. ونىڭ ءوزى ءبىر قولدان شىققانداي بىرىنەن ءبىرى اۋمايتىن، رەسمي دەرەك كوزدەرىنەن تاراعان اقپاراتتار. مەم ورگاندار بولماسا، بۇگىنگى جۋرناليستتەر اقپارات تاپپاي ارام قاتاتىن شىعار تەگى دەپ ويلايمىن كەيدە.

ءا، ايتپاقشى، بۇلاردىڭ ءسۇيىپ، ءسۇيسىنىپ جازاتىن جالقى تاقىرىبى بار. ونى ايتپاساق بولمايدى ەندى. ول تاقىرىپ وسى جىلدىڭ باسىندا پايدا بولدى. جەر سىلكىنىسى. الەمنىڭ الىس شالعايىندا جارىقتىق جەر سىلكىنىپ قالسا، سونى الدىمەن جارىسا جازىپ، جاھانعا جار سالاتىن قازاق سايتتارى شىعار. كەيدە فەيك جىبەرەدى: «الماتىدا جىل سوڭىنا دەيىن قاتتى جەر سىلكىنىسى بولادى ەكەن»، «ايتەدى ەكەن، بۇيتەدى ەكەن» دەپ.

الىپ تاۋ باۋرايىندا، تىم بيىك ۇيلەردە تۇراتىن جۇرت اقپان مەن ناۋرىزداعى جەر سىلكىنىسىنەن قورقىپ قالعان. ولار وسى كۇندەرى قوسۇرەيلى حال كەشۋدە. سونداي الاڭ كوڭىل ەلدى شوشىتىپ، زارە قۇتىن قاشىراتىن اقپاراتتاردى تىقپالاي بەرەتىن جۋرناليستتەردىڭ سونداعى ويى نە؟ ەل باسىنا جاماندىق تىلەۋ مە؟ «اپات كەلىپ، استاڭ-كەستەڭ بولىپ جاتايىق» دەي مە الدە؟

سوزدە (اقپاراتتا) زاتتاناتىن قاسيەت بار. ەل ىشىندە قانداي ءسوز كوپ ايتىلادى، سول ءسوز قوعامدىق ورتاعا بەلسەنە ارالاسىپ، ساناعا سىڭەدى، بۇقارالىق ويدى جەتەگىنە الىپ، ارەكەتكە كوشەدى.

التىن استاۋدان باس الماي كۇيسەي بەرەتىن سايتسىماقتار قايتالاپ جازا بەرىپ ەدى، كەشە تۇندە جەتىسۋ وبلىسىندا جەر سىلكىندى. قۇداي ساقتاپ ەل امان، جۇرت تىنىش. ارينە، جۋرناليستتەردىڭ ءبىر تاقىرىپتى جارىسا جازعانىنان ءتاڭىرىم جاراتقان جارىق دۇنيە بۇتىندەي بۇلىنە قويماس. جەر سىلكىنبەي تۇرمايدى. ال، اندا-ساندا ءبىر سىلكىنۋى مۇمكىن جەردىڭ سىلكىنەتىنى تۋرالى اقپاراتتاردى رەتى كەلسىن كەلمەسىن جاريالاي بەرگەنىمەن سايتتار ءبارىبىر ول قاۋىپتىڭ الدىن الا المايدى. ءبىر عانا الدىن الۋ شاراسى بار: ول - سەيسمولوگيالىق قاۋىپتى ايماقتاردا تۇراتىن ەلدى ءتۇپ قوپارا كوشىرىپ اكەتىپ، قاۋىپسىز ايماقتارعا ورنالاستىرۋ. سولاي ىستەيىك پە؟ بۇل جالپى مۇمكىن بە؟ مۇمكىن ەمەس، ارينە. ەندەشە جۋرناليستتەر قوعامدى، بيلىكتى سىلكىندىرەتىن ماقالالار جازىپ، ۇزبەي جاريالاپ وتىرسا يگى بولار ەدى...

داۋرەن قۋات

Abai.kz