سقو دەنساۋلىق ساقتاۋ باسقارماسى باسشىسى ورىنباسارىنىڭ مىندەتىن اتقارۋشى نۇرسۇلتان سارجانوۆ وبلىستىق قوعامدىق كەڭەستە ەلدى مەكەندەردى قىسقارتۋ ماسەلەسىنە توقتالدى.

اۋىلدىق ەلدى مەكەندەردىڭ الەۋمەتتىك-ەكونوميكالىق دامۋ مونيتورينگى قورىتىندىسى بويىنشا وبلىستا حالىق سانى 50 ادامنان اسپايتىن 45 اۋىل انىقتالعان.

بۇل ەلدى مەكەندەردە تۇراتىن 258 ادامنىڭ 75-ءى — زەينەتكەرلەر مەن بالالار. ناتيجەسىندە ەسىل اۋدانىندا — 8, تايىنشادا — 6, جامبىلدا — 6, م.جۇماباەۆتا — 6, مامليۋتتە — 5, اققايىڭدا — 3, ءۋاليحانوۆتا — 3, قىزىلجاردا — 2, تيميريازەۆتە — 2, ع. مۇسىرەپوۆتە — 2 جانە شال اقىن اۋدانىندا ەكى ەلدى مەكەن قىسقارتىلماق.

— اۋىلداردىڭ تۇرعىندارىنىڭ پىكىرى ەسكەرىلدى، جينالىستار وتكىزىلىپ، تاراتۋ تۋرالى شەشىم قابىلداندى، ويتكەنى بۇل اۋىلداردا الەۋمەتتىك ينفراقۇرىلىم مۇلدەم جوق. الەۋمەتتىك نىساندار جابىلىپ قالعان، ورتالىقتاندىرىلعان سۋمەن جابدىقتاۋ جۇيەسى 20 ەلدى مەكەندە عانا بار، 4 اۋىلعا سۋ تاسىپ جەتكىزىلەدى. دەموگرافيالىق جاعدايدىڭ جىل سايىن ناشارلاۋىنا جانە الەۋمەتتىك نىسانداردىڭ، سونداي-اق جۇمىسقا ورنالاسۋ مۇمكىندىگىنىڭ بولماۋىنا بايلانىستى قىسقارتۋ قاجەتتىلىگى تۋىندادى، بۇل بيۋدجەت قاراجاتىن الەۋەتى جوعارى ەلدى مەكەندەرگە ءتيىمدى جۇمساۋعا مۇمكىندىك بەرەدى. تاعى ءبىر سەبەپ — تۇرعىندارعا ءومىر سۇرۋگە جايلى ورتانى جانە ولاردىڭ قاۋىپسىزدىگىن قامتاماسىز ەتۋ، — دەيدى نۇرسۇلتان سارجانوۆ.

ماماننىڭ ايتۋىنشا، 2000 جىلدان 2019 جىلعا دەيىن وڭىردە 139 ەلدى مەكەن جويىلعان. 2020-2022 جىلدارى ارالىعىندا پاندەمياعا جانە حالىق ساناعىنا بايلانىستى بۇل جۇمىس اتقارىلماعان.

— تۇرعىندار قالاۋى بويىنشا وزىنە ىڭعايلى ەلدى مەكەنگە كوشە الادى نەمەسە وسى اۋىلدا تۇرا بەرەدى. تاراتىلعان كەزدە اۋىلدىڭ اتاۋى عانا الىنىپ تاستالادى، ال مەملەكەتتىڭ مىندەتتەمەلەرى ساقتالادى. جالپى، جۇمىسقا ورنالاسۋعا كومەك كورسەتىلەدى. سونداي-اق كوشۋگە نيەت بىلدىرۋشىلەر ءۇشىن وتباسىنىڭ ءاربىر مۇشەسىنە جەرگىلىكتى بيۋدجەتتەن 15 اەك مولشەرىندە وتەماقى بار، ال قونىس اۋدارۋعا تاڭداعان اۋىلدا بوس تۇرعىن ءۇي بولعان جاعدايدا جالعا بەرىلەتىن تۇرعىن ۇيمەن قامتاماسىز ەتىلەدى، — دەيدى نۇرسۇلتان سارجانوۆ.

Abai.kz