اباي وبلىسىنىڭ مامانداندىرىلعان تابيعات قورعاۋ پروكۋراتۋراسى سەمەيدە قوقىستى سۇرىپتاۋ جانە بولەك جيناۋ جوباسىنا قاتىستى تەكسەرىس جۇرگىزۋدە.

وبلىس پروكۋراتۋراسى ءباسپاسوز قىزمەتىنىڭ مالىمەتىنە سۇيەنسەك، 2020 جىلى باستالعان جوبانى قالا اكىمدىگى مەن ەكولوگيا مينيسترلىگى قولعا الدى. الايدا جوبانى ىسكە اسىرۋ كەزىندە قيىندىقتار تۋىندادى.

— شەتەلدىك كومپانيا 2,6 ملن ەۋرونىڭ قۇرال-جابدىقتارىن جەتكىزگەن. بىراق اكىمدىك ءوز مىندەتتەمەلەرىن ورىنداماي، جابدىقتاردى ورنالاستىراتىن انگاردى سالماعان. سونىڭ سالدارىنان قىمبات قۇرال-جابدىقتار ەكى جىلدان استام پايدالانىلماي، اشىق جەردە ساقتالدى. بۇل ونىڭ ءبۇلىنىپ، كەپىلدىگىنىڭ جوعالۋىنا اكەلىپ سوقتى، — دەلىنگەن حابارلامادا.

وسىعان بايلانىستى پروكۋراتۋرا قر قك-ءنىڭ 371-بابى 1-بولىگى (سالاقتىق) بويىنشا سوتقا دەيىنگى تەرگەۋدى باستادى. اكىمدىك تە جوبانى اياقتاۋ ءۇشىن ءتيىستى شارالاردى قابىلداپ جاتىر.

Abai.kz