اۆستريادا تانىمال جاپون بلوگەرى يۋدزي ناتسۋما «قر ءتۋريزمى ەلشىسى» مارتەبەسىن يەلەندى. قۇرمەتتى ميسسيا وعان ەلىمىزدى الەمگە تانىتۋداعى ۇلەسى ءۇشىن تابىستالدى. بەلگىلى پوليگلوت قازاق ءتىلىن مەڭگەرگەن جانە الەمنىڭ تۇكپىر-تۇكپىرىندەگى ءوز وقىرماندارىن قازاقستاننىڭ باي مادەنيەتىمەن جانە تابيعاتىمەن تانىسۋعا شابىتتاندىرادى.

بلوگەر ۇلتتىق داستۇرلەرگە جانە قازاقستاندىق شوكولادقا ەرەكشە كوڭىل بولەدى. يۋدزي ولاردى ءوزىنىڭ الەۋمەتتىك جەلىلەرىندە  (yuji_beleza)  بەلسەندى تۇردە دارىپتەيدى.

ۆەنادا تۇراتىن جاپون بلوگەرى يۋدزي قازاقستاندا 3 رەت بولعان. ول Kazakh Tourism ۇيىمداستىرعان اقپاراتتىق تۋرلارعا دا قاتىستى. بۇل ساپارلار وعان قازاقستاندى تەرەڭىرەك تانىپ-بىلۋگە مۇمكىندىك بەردى.

«مەن ءۇشىن  مۇنداي جاۋاپتى ميسسيانى قابىلداۋ – ۇلكەن مارتەبە. ودان كوبىرەك كونتەنت جاساپ، قازاقستاننىڭ جانە قازاق حالقىنىڭ سۇلۋلىعىن كورسەتۋگە تىرىسامىن»، - دەپ ءوز ويىمەن يۋدزي ءبولىستى.

اتاپ وتكەن ءجون، 2018 جىلدان باستاپ Kazakh Tourism «قر تۋريزم ەلشىسى» باعدارلاماسىن جۇزەگە اسىرادى. ونىڭ ماقساتى -  قازاقستاندى تارتىمدى تۋريستىك باعىت رەتىندە ىلگەرىلەتۋ جانە الەمنىڭ تۇكپىر-تۇكپىرىندەگى ساياحاتشىلاردىڭ نازارىن ەلىمىزدىڭ تابيعي جانە مادەني بايلىعىنا اۋدارۋ.

Abai.kz