قازا تۋرالى، اپات تۋرالى، ءولىم تۋرالى جازباق اۋىر. اقتاۋداعى شەتىن وقيعا جايلى بۇكىل الەم جۇرتى حاباردار بولدى. نەشەمە وتباسى قايعى ارقالادى. اۋەلى قازالى، ازالى وتباسىلارعا كوڭىل ايتۋ پارىزىمىز… ادامنان ايىرىلۋ كىم-كىمگە بولماسىن زىلدەي اۋىر عوي…

اپاتتىڭ سەبەبىنە قاتىستى ءتۇرلى پىكىر، ءتۇرلى بولجامدار ايتىلۋدا…

رەسمي:

1) ۇشاقتا 67 ادام بولعان. 62-ءسى جولاۋشى. 5-ەۋى ەكيپاج.

2) ازەربايجاننان 37 ادام بولعان. 23-ءى قازا تاۋىپ، 14-ءى ءتىرى قالعان.

3) رەسەيدەن 16 ادام بولعان. 7-ءسى قازا تاۋىپ، 9-ى امان قالعان.

4) قازاقستاننان 6 ادام بولعان. تۇگەلى قازا تاپتى.

5) قىرعىزستاننان 3 ادام بولعان. بارلىعى امان.

6) ەكيپاجدىڭ 5 مۇشەسىنىڭ 3-ەۋى ءتىرى قالعان.

باكۋدەن گروزنىيعا ۇشقان ۇشاق، گروزنىيعا قونا الماي، كەرى اينالىپ، قازاقستاننىڭ اۋە كەڭىستىگىنە 11:00-دە رۇقسات الىپ كىرگەن. 11:28-دە ۇشاقپەن بايلانىس جوعالىپ، 11:39-دا ۇشاق قۇلاعان.

قازاقستان ۇشاق اپاتىنىڭ سەبەبىن انىقتاۋ ءۇشىن كوميسسيا قۇرعان. ازەربايجانعا قاجەتتى كومەك كورسەتىلەتىنىن ايتتى. سونىمەن قاتار: قازاقستانعا شەتەلدەردەن سالا ماماندارى كەلىپ جاتىر. قارا جاشىك تابىلعان. ونداعى اقپارات ءبىراز جايدى انىقتاۋعا جاردەم بولماق. وندا ۇشقىشتاردىڭ اقىرعى ساتتەگى اڭگىمەلەرى تاسپالانعان. سونى تىڭداپ، ۇشاق اپاتىنا نە سەبەپ بولعانى جايلى تۇسىنىك قالىپتاستىرۋعا بولار…

قازاقستان 6 ادامنان ايىرىلدى. ەت-جاقىنىنان ايىرىلعان ءاربىر وتباسىعا قايعىرا كوڭىل ايتامىز. تاس تۇسكەن جەرىنە اۋىر. ولاردىڭ قازىرگى جاعدايىن سوزبەن سيپاتتاۋ مۇمكىن ەمەس.

ءبىزدىڭ ەڭبەك مينيسترلىگى قاجەتتى ماتەريالدىق كومەكتەر كورسەتىلەتىنىن ايتىپتى. اپات ايتىپ كەلمەيدى. قازا سۇراپ كەلمەيدى. دەسە دە، مارقۇمداردىڭ وتباسىلارىنا كەرەكتى كومەك كورسەتىلۋى دۇرىس.

وسى تۇستا: قازاقستاننىڭ سەرگەك سانالى ازاماتتارىنىڭ كەڭجۇرەكتىگىن ەرەكشە اتاپ ءوتۋ كەرەك. ۇشاق قۇلاعاندا الدىمەن بارىپ، ءتىرى قالعاندارعا اراشاشى بولعان قاراپايىم جۇمىسشىلار بولدى. امان قالىپ، جان ءۇشىن جانتالاسىپ جاتقاندارعا قان كەرەك بولار دەپ ەرىكتى تۇردە قان تاپسىرىپ جاتقان جۇرتتىڭ ءىسى دە قوعامنىڭ جاۋاپكەرشىلىگى مەن وياۋلىعىن، سانالىلىعىن كورسەتتى.

اناداي الىپ-عۇلىل جانىپ جاتقان ۇشاقتان وسىنشا ادامنىڭ ءتىرى قالۋىنا ۇشقىشتاردىڭ كاسىبيلىگىن باستى سەبەپ ەتسەك، وقيعا ورنىدا ەدەل-جەدەل جەتىپ، جاردەم جاساعان قاراپايىم جۇمىسشىلاردىڭ، قۇتقارۋشىلار مەن سالا ماماندارىنىڭ دا ۇلەسى ءبىر كەم ەمەس!

جوعارىدا ايتقانىمداي: ۇشاق اپاتىنا قاتىستى بولجام كوپ. سونىڭ ءبىرى - رەسەي اۋە قورعانىس جۇيەسىنىڭ (پۆو) قاتە جۇمىسى بولۋى مۇمكىن دەگەن نۇسقا. ياعني، رەسەي پۆو-سى ۇشاقتى سوقشىلاۋشى درونمەن شاتاستىرىپ، اتقىلاۋى مۇمكىن دەگەن نۇسقا. قۇلاعان ۇشاقتىڭ ارتقى بولىكتەرىندەگى شۇرىق-تەسىكتەر پۆو ىزىنە ۇقسايدى دەيدى. بۇل نۇسقانى ءتىپتى، رەسەيدىڭ z بلوگەرلەرى دە ايتىپ جاتىر. رەسەي ءسىم-ءنىڭ رەسمي وكىلى ماريا زاحاروۆا دا اتالعان نۇسقاعا قاتىستى پىكىر بىلدىرگەن.

ونىڭ ۇستىنە ءدال سول ۋاقىتتا شەشەنستان سوققىلاۋشى دروندارمەن الىسىپ جاتقان. سويتە تۇرا، اۋە كەڭىستىگىن جاپپاعان. ال ۇشاقتا بولعان جولاۋشىلاردۆڭ ءبىرى جارىلىس داۋسى ەستىلگەنىن ايتقان. سوندىقتان، ۇشاق ۇشقىشتارى ەڭ قاۋىپسىز نۇكتە رەتىندە كاسپيدىڭ بەرگى بەتىندەگى اقتاۋعا قاراي قاشقان.

رەسمي نۇسقادا ۇشاقتىڭ توپ بوپ ۇشقان قۇستارعا سوعىلۋىن باستى سەبەپ دەپ اتايدى. دەسە دە، ساراپشىلار ۇشاق قۇستارعا سوعىلعاننىڭ وزىندە بۇل شتاتتىق جاعداي سانالاتىنىن ايتادى.

كەشە Euronews تەلەارناسى اتالعان اپاتتى تەرگەۋگە قاتىستى رەسمي دەرەككوزدەردەن رەيستىڭ مەجەلى جەرى - رەسەيدىڭ گروزنىي قالاسىنا جاقىنداعان كەزدە امان قالعان جولاۋشىلار جارىلىس دىبىسىن ەستىگەنىن جانە ونىڭ ارتىنان ۇشاقتىڭ فيۋزەلياجىنا زاقىم كەلتىرگەن سىنىق سىنىقتارىن ەستىگەنىن حابارلادى.

Euronews العان اقپارات ازەربايجاندا ورنالاسقان AnewZ حالىقارالىق جاڭالىقتار ارناسىنىڭ جاڭالىقتار رەپورتاجىنا سايكەس كەلەدى، ولار رەسەيلىك اسكەري بلوگەردىڭ سوزىنە نەگىزدەلىپ وتىرعانى انىق، ول «ۇشاقتىڭ زاقىمدانۋى ابايسىزدا اۋە قورعانىس زىمىران جۇيەسىمەن سوقتىعىسۋى مۇمكىن دەگەن بولجام جاسايدى» دەلىنگەن اقپاراتتا. تاعى ءبىر اقپاراتتا اپاتقا ۇشىراعان ۇشاقتى رەسەي اۋە قورعانىس كۇشتەرى درونمەن شاتاستىرىپ، اتىپ تۇسىرگەن بولۋى مۇمكىن دەگەن بولجام ايتۋدا.

ارينە، بۇل ايتىلعاندار دولبار مەن بولجامدار عانا. ۇشاق اپاتىنا رەسەي كىنالى دەپ كەسىپ-ءپىشىپ ايتا المايمىز. مامان ەمەسپىز. ونىڭ ۇستىنە. حالىقارالىق ساراپشىلار مەن تەرگەۋ كوميسسياسى ءوز تۇجىرىمدارىن جاسايدى. قارا جاشىكتىڭ قوياسى اقتارىلادى. كۇتۋ كەرەك.

دەسە دە، رەسەي سوعىسىپ جاتقان مەملەكەت. بىزدىكى ساقتىق ءۇشىن. رەسەي اۋە كەڭىستىگى قاۋىپسىز ەمەس. قاڭعىپ ۇشقان وق كوپ. الدا-جالدا نە بولىپ، نە قويماس. سوندىقتان، سوعىس توقتاعانشا رەسەيگە ۇشاق ۇشىرۋدى توقتاتا تۇرۋ ءجون-اق…

نۇرگەلدى ابدىعانيۇلى

Abai.kz