21 جەلتوقسان كۇنى، سەمەي قالاسىنداعى № 20 مەكتەپتە قازاقتىڭ ۇلتتىق مۇراسى – ايتىس ونەرىن دارىپتەيتىن ماڭىزدى مادەني شارا ءوتتى. "سەمەي حالىقتىق اقىندار ورتالىعى" مەن "سەمەي قالاسىنىڭ ءبىلىم ءبولىمىنىڭ" ۇيىمداستىرۋىمەن "جاس اقىندار جىرلاعان – تاۋەلسىزدىك" اتتى قالالىق وقۋشىلار ايتىسى وتكىزىلدى.

بۇل ايتىستا، سەمەي قالاسىنىڭ 10-نان استام مەكتەپتەرىنەن كەلگەن جاس اقىندار جىر دوداسىنا ءتۇستى. جالپى سانى 5 جۇپ جاس ايتىسكەر اقىندار وزدەرىنىڭ تاپقىرلىعى مەن ءسوز شەبەرلىگىن ورتاعا سالىپ، كورەرمەندەردى جالىندى جىرعا بولەدى. ءسوز سايىسى  بارىسىندا جاس اقىندار ەل تاۋەلسىزدىگىن جىرلارىنا قوسىپ، ساحنا تورىندە ۇلتتىق رۋح پەن ءپاتريوتيزمدى اسقاقتاتتى.

سەمەي "حالىقتىق اقىندار ورتالىعىنىڭ" جەتەكشىسى، ايتىسكەر اقىن، قۇرمەتتى ۇستاز، قر مادەنيەت قايراتكەرى، سەمەي قالاسىنىڭ "قۇرمەتتى ازاماتى", "ەرەن ەڭبەگى", "ەڭبەك ارداگەرى" مەدالدارىنىڭ يەگەرى ومارباەۆا دامەش، "حالىقارالىق ايتىس اقىندارى مەن جىرشى - تەرمەشىلەر وداعىنىڭ" اباي وبلىستىق فيليالىنىڭ توراعاسى، ايتىسكەر اقىن، قر مادەنيەت سالاسىنىڭ ۇزدىگى  داۋلەت سمەتوۆ، سونداي-اق،  N 47 جالپى ورتا ءبىلىم بەرەتىن مەكتەپتىڭ  ادىسكەرى ءسوز  سويلەپ،  جاس اقىنداردىڭ ونەرىنە ءوز دارەجەسىنە ساي باعا بەردى. ساحناعا شىققان وقۋشى اقىندارعا ءوز العىستارىن ءبىلدىرىپ، بولاشاقتا قازاقتىڭ ايتىس ونەرىنىڭ بيىگىن باعىندىراتىن جاس تالانتتاردىڭ ءوسىپ كەلە جاتقانىنا كۋا بولدى.

ايتىس قورىتىندىسى بويىنشا جۇلدەلى ورىن يەلەرىن ادىلقازىلار القاسى  انىقتادى:

I ورىن: نۇروللاەۆ راۋان (№20 مەكتەپتىڭ وقۋشىسى).

II ورىن: اسۋباەۆ نازار (№37 گيمنازيانىڭ وقۋشىسى), تۇرعانبەكوۆا اياجان (№6 گيمنازيانىڭ وقۋشىسى).

III ورىن: ايداربەك اليحان ("جاس ۇلان" ارنايى ەرلەر ليتسەيىنىڭ وقۋشىسى), بولاتۇلى ءاليحان (№47 مەكتەپتىڭ وقۋشىسى), ارداقۇلى مەرلان (№39 مەكتەپتىڭ وقۋشىسى).

بارلىق جەڭىمپازدار ديپلومدارمەن ماراپاتتالدى. سونىمەن قاتار، ايتىسقا قاتىسقان بارلىق جاس اقىندارعا العىسحاتتار تابىستالدى.

اتالمىش مادەني شارادا N 20 مەكتەپ جاس دارىندارىنىڭ ورىنداۋىنداعى پاتريوتتىق اندەر شىرقالىپ، شارانىڭ رۋحاني ماڭىزدىلىعىن ارتتىرا ءتۇستى. مەكتەپ ديرەكتورى قاتىسۋشىلار مەن ۇيىمداستىرۋشىلارعا شىن جۇرەكتەن ءوزىنىڭ العىسىن ءبىلدىرىپ:

"بۇل ايتىس – جاس ۇرپاققا ۇلتتىق ونەردى ناسيحاتتاۋ مەن پاتريوتتىق تاربيە بەرۋدىڭ تاماشا ۇلگىسى. وسىنداي شارالار جاس تالانتتاردىڭ شىعارماشىلىق قابىلەتتەرىن دامىتۋعا ۇلكەن مۇمكىندىك بەرەدى", – دەدى.

"جاس اقىندار جىرلاعان – تاۋەلسىزدىك" ايتىس تاۋەلسىزدىك يدەياسىنىڭ ۇلت جۇرەگىندە ماڭگى ساقتالاتىنىن دالەلدەپ، كورەرمەندەرگە ايىرىقشا رۋحاني اسەر سىيلادى. ۇلتتىق ونەردى دارىپتەۋگە باعىتتالعان مۇنداي شارالار الداعى ۋاقىتتا دا جالعاسىن تابادى دەگەن سەنىمدەمىز.

سەمەي قالالىق مادەنيەت سارايى

Abai.kz