ولجاس بەكتەنوۆ اۋىل شارۋاشىلىعى كاسىپورىندارىن قارجىلاندىرۋ جۇمىستارىن جەدەلدەتۋ قاجەتتىگىنە نازار اۋداردى. بۇل تۋرالى ۇكىمەتتىڭ ءباسپاسوز قىزمەتى حابارلادى.

قر پرەمەر-ءمينيسترى ولجاس بەكتەنوۆ ۇكىمەت وتىرىسىندا 2025 جىلعى كوكتەمگى دالا جۇمىستارى ءۇشىن شارۋالارعا قارجى ءبولۋ ماسەلەسىن كوتەردى. قارجىلاندىرۋ وتكەن جىلى باستالعانى اتاپ ءوتىلدى.

اۋىل شارۋاشىلىعى ءمينيسترى ايداربەك ساپاروۆ وسى باعىتتا اتقارىلىپ جاتقان جۇمىستار تۋرالى باياندادى.

«ءبىز قارجىلاندىرۋدى وتكەن جىلدىڭ 29 قاراشاسىندا باستادىق. اتالعان جۇمىسقا جالپى 100 ملرد تەڭگە ءبولىنىپ، قازىردىڭ وزىندە ونىڭ 70 ملرد تەڭگەسى شارۋالارعا بەرىلگەن. ءارى قاراي جۇمىس جۇرگىزىلىپ جاتىر. وبلىستاردا اكك ءالى قوسىلماعان، ولاردى اكك ارقىلى دا تاراتۋ كەرەك، سوندا جۇمىس تەزىرەك جۇرەدى. جالپى قارجى بار»، - دەدى ايداربەك ساپاروۆ.

پرەمەر-مينيستر جۇمىستى جەدەلدەتۋدى تاپسىردى.

ايتا كەتۋ كەرەك، پرەزيدەنت تاپسىرماسىن ورىنداۋ اياسىندا 2025 جىلعى كوكتەمگى ەگىن جانە كۇزگى جيىن-تەرىم جۇمىستارىنا «كەڭ دالا-2» باعدارلاماسى بويىنشا جالپى 700 ملرد تەڭگەگە دەيىن، ونىڭ ىشىندە 140 ملرد تەڭگەسى – بيۋدجەت قاراجاتى، 560 ملرد تەڭگەسى – نارىق قاراجاتى جۇمسالادى. شارۋالارعا وتەۋ مەرزىمى 2026 جىلعى 1 ناۋرىزعا دەيىن بەلگىلەنگەن جىلدىق 5%-بەن نەسيە بەرىلەدى.

ەرتە قارجىلاندىرۋ ديحاندارعا ەگىس ناۋقانىن ۋاقتىلى باستاۋ ءۇشىن بارلىق قاجەتتى قۇرال-جابدىقتى، سونىڭ ىشىندە تىڭايتقىشتاردى الدىن الا ساتىپ الۋعا مۇمكىندىك بەرەدى.

Abai.kz