«قازاقستان تابيعي رەسۋرستارعا وتە باي»، «قازاقتىڭ جەرىنىڭ استى دا كەن، ءۇستى دە كەن» دەگەندى ءاربىر قازاق كۇن سايىن دەمەسەڭىز، كۇنارا ءبىر ايتاتىنى وتىرىك ەمەس. جانە بۇل سوزدەردىڭ جالعانى جوق. شىنىندا، قازاقستان تابيعي رەسۋرستار قورىنا باي مەملەكەت.

اشىق دەرەككوزدەردەگى قايسىبىر جىلعى مىناداي مالىمەتتەردى سوزدەلەلگە ۇسىنايىق: قازاقستان دۇنيەجۇزىنىڭ 186 ەلىنىڭ ىشىندە ۆولفرام، قورعاسىن جانە ءباريدىڭ قورى بويىنشا ءبىرىنشى ورىندا, حروميت، كۇمىس جانە تسينك بويىنشا ەكىنشى, مارگانەتس جانە موليبدەننەن ءۇشىنشى, مىس قورىنان  ءتورتىنشى, ۋران بويىنشا بەسىنشى, التىننان التىنشى, تەمىر كەنىنەن جەتىنشى, قالايى مەن نيكەلدەن سەگىزىنشى, كومىر مەن تابيعي گاز بويىنشا توعىزىنشى, مۇناي بويىنشا ون ۇشىنشى ورىندا ەكەن. ءيا، بۇل دەرەكتەر بۇگىنگى كۇنى ازدى-كەم ەسكىرگەن بولۋى مۇمكىن. دەسە دە، اقيقاتتان تىم الشاق ەمەس...

سۋرەتتەر: Abai.kz

اپاق تاپقان قارا تاس – قازاققا جىلۋ بولعان تاس...

بۇگىنگى قازاقستاندا سالا ماماندارى زەرتتەپ، انىقتاعان جەراستى ءھام جەرۇستى كەندەردىڭ، تابيعي رەسۋرستاردىڭ سان ءتۇرى بار. بىراق، سولاردىڭ ىشىندەگى قازاق جۇرتى قىزىعىن توتەلەي كورگەن ەڭ باستى بايلىق ول – كومىر دەسەك، قاتەلەسپەيمىز. ال كومىر دەگەندە ويعا بىردەن ورالاتىنى – قاراعاندى جەرى.

وسىدان 190 جىلدان اساتىن ۋاقىت بۇرىن قاراعاندىنىڭ نۇراسىنىڭ توڭىرەگىنەن اپاق بايجانوۆ تاپقان تاس كومىر كۇنى بۇگىنگە دەيىن قازاقتىڭ كادەسىنە جاراپ كەلەدى. اشىق دەرەكتەردەگى مالىمەتتەرگە سەنسەك، قازاقستاندا بارلانعان تاس كومىر مەن قوڭىر كومىردىڭ قورى 200 ملرد. توننادان اسادى ەكەن. العاش قاراعاندى جەرىنەن تابىلعان كومىر كەيىن كەلە قازاقستاننىڭ وزگە دە وڭىرلەرىندە انىقتالدى. سولاردىڭ ءبىرسىپىراسى: ەكىباستۇز، مايكوبەن، وباعان، جىلىنشىك، تەڭىز-قورعالجىن، شۋ، ىلە (قالجات), تومەنگى ىلە (وڭتۇستىك-بالقاش) جانە ورال-كاسپي (جايىڭ-جەم) باسسەيندەرى. داليىپ جاتقان قازاقستاننىڭ كوپتەگەن ءوڭىرى (اۋىل-اۋداندار، ءىرىلى-ۇساقتى قالالار مەن كەنتتەر) كۇنى بۇگىندە وسى قارا التىن – كومىرمەن جىلىنىپ وتىرعانى جانە فاكت.

سۋرەتتەر: Abai.kz

شۇباركولدىڭ كومىرى ءالى 150 جىلعا جەتەدى...

ال سول كومىردى كىمدەر قازىپ جاتىر؟ ولاردىڭ حال-جاعداي، تۇرمىس-تىرشىلىگى قالاي؟ كەنشىلەرگە قانداي جاعدايلار جاسالعان؟ ءبىز جۋىردا قاراعاندىدان 540 شاقىرىم جەردە ورنالاسقان شۇباركولدەگى كومىر كەنىنە ساپارلاپ باردىق.

شۇباركولدىڭ كومىر كەنى 1983 جىلى اشىلعان ەكەن. ال كومىردى اشىق ادىسپەن ءوندىرۋ 1985 جىلدان باستاپ جۇرگىزىلىپ كەلەدى. 2025 جىلى – قازاقستاننىڭ تاۋ-كەن ونەركاسىبىندەگى كوشباسشىلاردىڭ ءبىرى سانالاتىن ايگىلى «شۇباركول كومىر» كاسىپورنىنا تۇپ-تۋرا 40 جىل. وسى 40 جىلدىڭ ىشىندە شۇباركولدە وندىرىلگەن كومىر كولەمى 200 ميلليون توننادان اسادى. ال جىلدىق وندىرىلگەن كومىردىڭ كولەمى – 12, 5 ملن توننادان اسادى.  «شۇباركول كومىر» – قۇندى قازبانى وندىرۋدەن رەسپۋبليكا بويىنشا ءۇشىنشى ورىندا تۇرعان الىپ ۇجىم. ماماندار شۇباركولدە ءالى 150 جىلعا جەتەتىن كومىر قورى بارىن ايتادى.

ماماندار سونداي-اق، «شۇباركول كومىردى» قازاقستانداعى ءىرى ەنەرگەتيكالىق كومىر وندىرۋشىلەرىنىڭ ءبىرى دەپ باعالايدى. شۇباركول كومىرىن ونىڭ جوعارى كالوريالىعىنا جانە كۇلىنىڭ از بولۋىنا بايلانىستى ونى ەكولوگيالىق تازا ەنەرگيا تاسىمالداۋشىلارعا جاتقىزادى.

سۋرەتتەر: Abai.kz

كومىر قالاي قازىلىپ جاتىر؟

«شۇباركول كومىر» كاسىپورنىنىڭ نەگىزىن «ورتالىق» جانە «باتىس» دەيتىن ەكى ءىرى كومىر رازرەزى قۇرايدى. بۇل رەزەرۆتەر قاراعاندى ​​وبلىسىنىڭ نۇرا اۋدانىندا ورنالاسقان. ەكى كارەردە دە كومىر ءوندىرۋ اشىق ادىسپەن جۇرگىزىلەدى. ياعني، كومىر قازۋ – جالاڭ قولمەن جەردىڭ استىنا شاحتا سالۋ ارقىلى ەمەس، ارنايى تەحنيكا، ماشينالاندىرىلعان كەشەن ارقىلى قازىلۋدا. جەردىڭ بەتكى قاباتىن اشۋدان باستاپ، كومىردى قازىپ الۋعا دەيىن ەكسكاۆاتورلاردىڭ كۇشىمەن قازىلۋدا. «شۇباركول كومىر» كاسىپورنىندا كەنشىلەر (جۇمىسشىلار) تولىقتاي دەرلىك جاپوندىق «Hitachi» كومپانياسىنىڭ ونىمدىلىگى جوعارى گيدراۆليكالىق ەكسكاۆاتورلارى مەن رەسەيدە شىعارىلعان ەكگ ەكسكاۆاتورلارىمەن قامتىلعان. ال اشىق كەنىشتەردەن تاۋ-كەن ماسساسىن جانە كومىردى شىعارۋدى جۇك كوتەرگىشتىگى 60-تان 220 تونناعا دەيىنگى «Caterpillar»، «Hitachi» جانە «بەلاز» اۆتوساموسۆالدارى جۇزەگە اسىرۋدا. بۋلدوزەرلەر، گرەيدەرلەر مەن تيەگىشتەر جولداردى دايىنداۋمەن، تيەۋ جۇمىستارىمەن جانە ۇيىندىلەردە تاۋ-كەن ماسساسىن قابىلداۋمەن اينالىسۋدا. مۇنىڭ بارلىعىن ءبىز ءوز كوزىمىزبەن كورىپ، سونداعى جۇمىسشىلارمەن ءبىرلى-جارىم كۇن بىرگە ءجۇرىپ، ءبىلىپ قايتتىق.

سۋرەتتەر: Abai.kz

شۇباركول باسشىلىعى: بىزگە كومىردەن بۇرىن ءاربىر كەنشىنىڭ ءومىرى قىمبات!

«شۇباركول كومىر» كاسىپورنىندا ۇزىن-سانى 3 مىڭعا جۋىق جۇمىسشى ناپاقاسىن تاۋىپ، وتباسىن اسىراپ وتىر. ولار 15 كۇندىك ۆاحتالىق رەجيمدە جۇمىس جاسايدى. ياعني، ءبىر ۆاحتالىق رەجيمدە 1500-عا جۋىق ادام جۇمىس ىستەيدى. ولار 2 اۋىسىمدا، كۇندىزگى جانە تۇنگى اۋىسىمداردا ەڭبەك ەتۋدە. كاسىپورىن جۇمىسشىلارىنا بارلىق جاعداي جاسالعان دەسەك ارتىق ايتقاندىق ەمەس. مۇندا ەڭ اۋەلى ۆاحتالىق كەنت بار. «شۇباركول كومىر» جۇمىسشىلارى وسى كەنتتە تەگىن جاتاقجايمەن قامتىلعان. ال مۇنداعى ورتاشا ايلىق 500 مىڭ تەڭگەدەن اسادى.

«جەردىڭ كومىرىنە قۇنىعىپ، كەنشىلەردىڭ ءومىرىن نازاردان تىس قالدىرعان كەزىمىز جوق. بىزگە وسىنداعى ءاربىر جۇمىسشىنىڭ ءومىرى قىمبات»، - دەيدى «شۇباركول كومىر» اق باس ديرەكتورى سەرگەي كيم مىرزامەن سويلەسكەندە.

سۋرەتتەر: Abai.kz

شۇباركولدىڭ ۆاحتالىق كەنتى

«شۇباركول كومىر» اق ۆاحتالىق كەنتىندە جۇمىسشىلارعا بارلىق قولايلى جاعدايلار قاراستىرىلعان. بىزدە ءار جۇمىسشى كۇندەلىكتى دارىگەرلىك تەكسەرۋدەن وتكىزىلىپ قانا، جۇمىس الاڭىنا جىبەرىلەدى.

ءبىزدىڭ ۆاحتالىق كەنتتىڭ اۋماعىندا جۋىردا جاڭا سپورت كەشەنى اشىلدى. سپورت كەشەنى بارلىق كەرەك-جاقتارمەن تۇگەلدەي قامتىلعان. مۇندا ءتىپتى، ارنايى ەكى جاتتىقتىرۋشى جۇمىس جاسايدى. ءبىزدىڭ جۇمىسشىلار كۇندىز-ءتۇنى كەن قازىپ قانا قويماي، وسى سپورت كەشەنىندە وزدەرى قالاعان سپورت تۇرلەرىمەن اينالىسىپ، ءتىپتى كاسىپورىنارالىق، قالالىق، وبلىستىق، رەسپۋبليكالىق جارىستارعا قاتىسۋ مۇمكىندىگىنە يە. بۇل سپورت كەشەنىن اشۋداعى باستى ماقساتتاردىڭ ءبىرى – ۇجىمدىق رۋحتى كۇشەيتۋ بولعان. قازىر بۇل ويىمىز ءوز جەمىسىن بەردى»، - دەيدى سەرگەي كيم مىرزا.

جاڭا اشىلعان سپورت كەشەنىنىڭ اۋماعىندا: زاماناۋي قۇرال-جابدىقتار، فۋتبول، باسكەتبول جانە ۆولەيبول الاڭدارى، ەكىنشى قاباتتا ارنايى جابدىقتالعان زال دا قاۋىپسىزدىك تالاپتارىنا ساي جاڭارتىلعان بيىكتىكتە جۇمىس ىستەۋگە ارنالعان جاتتىعۋ الاڭى ورنالاسقان.

سونىمەن قاتار، «شۇباركول كومىر» اق ۆاحتالىق كەنتىنىڭ اۋماعىندا 4 بىردەي زاماناۋي ۇلگىدەگى جاتاقحانالار مەن ءبىر قاباتتى تۇرعىن ۇيلەر، ءبىر مەزەتتە 200 ادام ەركىن تاماقتانا الاتىن ۇلكەن اسحانا مەن جەڭىلدەتىلگەن باعاداعى ازىق-دۇكەنى، كاراوكە زالى ورنالاسقان. ءتىپتى، شۇباركول جۇمىسكەرلەرى ءۇشىن قاراعاندىمەن ەكىارادا قاتىنايتىن ارنايى تەمىرجول ۆاگوندارى دا بار ەكەن. بۇل ۆاگوندار جۇمىسكەرلەر ءۇشىن تەگىن. ياعني، كاسىپورىنعا كەلىپ-كەتۋگە دەيىن جاعداي قاراستىرىلعان.

«ءبىزدىڭ «شۇباركول كومىر» ۆاحتالىق كەنتىندە جۇمىسكەرلەرىمىزگە ءارتۇرلى اس ءمازىرى مەن جايلى اتموسفەرانى ۇسىنىپ، جۇمىس پەن دەمالىس ءۇشىن سالاۋاتتى ورتانى قۇرۋعا بارلىق جاعىنان كۇش سالۋدامىز»، - دەيدى «شۇباركول كومىر» باسشىلىعى.

سۋرەتتەر: Abai.kz

بالاماسى جوق كوكس-حيميا زاۋىتى: كومىردە بار كوپ ءونىم...

جۇرت مۇنايدان الىناتىن ءونىمنىڭ سان الۋان ءتۇرى بار ەكەنىن جاقسى بىلەدى. ال قازاق مۇنايىنا باستى بالاما سانالاتىن – قازاق كومىرىنەن نە شىعادى دەگەندە، كوبىمىز كىدىرىستەپ قالامىز. راسىندا، بىزدە مۇناي-حيمياسى ءھام مۇناي ونەركاسىبى ءجىتى زەرتتەلگەن جانە كوپ جازىلعان تاقىرىپ. ال كومىر-حيمياسى نەمەسە كومىر ونەركاسىبى تۋرالى كوپ ايتىلا بەرمەيدى.

كومىر ونەركاسىبى – ەلىمىزدەگى ەڭ كونە شارۋاشىلىقتاردىڭ ءبىرى سانالادى. ال ەلىمىزدە پايدالانىلاتىن وتىننىڭ 1/2 بولىگى ءدال وسى كومىردىڭ ۇلەسىنە تيەسىلى ەكەن. بۇگىنگى تاڭدا كومىردەن ءارتۇرلى ادىستەرمەن شارۋاشىلىقتىڭ ءتۇرلى سالاسىنا قاجەتتى 350-دەن استام قۇندى زات الىنادى ەكەن.

«شۇباركول كومىر» اق 2006 جىلدان بەرى ارنايى كوكس شىعاراتىنىن ءبىرى بىلسە، ءبىرى بىلمەيدى. ال 2021 جىلى ارنايى كوكس شىعاراتىن زاۋىتتىڭ ەكىنشى كەزەگىنىڭ قۇرىلىسى باستالعان.

ارنايى كوكسقا سۇرانىس كوپ

«شۇباركول كومىر» – زامان كوشىنەن قالماي كەلە جاتقان كاسىپورىن. مۇندا نەگىزگى وندىرىسپەن قاتار كومىردى تەرەڭ وڭدەۋ باعدارلاماسى بار. كاسىپورىن باسشىلىعى ءوندىرىستى ءارتاراپتاندىرۋ ماقساتىندا قازاقستاندا بالاماسى جوق، ارنايى كوكس شىعاراتىن زاۋىتتى ىسكە قوسقان.

ارنايى كوكس شىعاراتىن زاۋىت «شۇباركول كومىر» وندىرىستىك الاڭىندا ورنالاسقان. تومەن تەمپەراتۋرالى قۇرعاق تازارتۋ تەحنولوگياسى بويىنشا ارنايى كوكس وندىرەتىن زاۋىتتىڭ جالپى وندىرىستىك قۋاتى 210 مىڭ توننا جالپى ءونىمدى قۇراعان. ال 2021 جىلى كاسىپورىن الاڭىندا ارنايى كوكس شىعاراتىن جاڭا زاۋىتتىڭ قۇرىلىسى باستالعان. زاۋىتتىڭ قۋاتتىلىعى جىلىنا 400 مىڭ توننا ءونىمدى قۇرايدى.

اتالعان جوباعا سالىنعان ينۆەستيتسيا 60 ملرد تەڭگەنى قۇراعان. وسى ارقىلى زاۋىتتا 185 جاڭا جۇمىس ورنى اشىلعان. وندىرىستە ەڭ زاماناۋي تەحنولوگيالىق شەشىمدەر مەن اۆتوماتيكا قولدانىلادى.

قر تاۋ-كەن مەتاللۋرگيالىق كاسىپورىندارى قاۋىمداستىعىنىڭ مالىمەتتەرى بويىنشا، ارنايى كوكسقا دەگەن قازاقستاننىڭ ىشكى قاجەتتىلىگى جىلىنا 1 ميلليون توننادان اسادى ەكەن. ال ارنايى كوكستىڭ باسىم بولىگى قازىرگى تاڭدا ەلىمىزگە رەسەي مەن قىتايدان اكەلىنىپ جاتىر.

سۋرەت: egemen.kz

«بۇعان بىزدەن باسقا ينۆەستور ارالاسقان جوق، ءوز جوبامىز. حالىقارالىق تەحنولوگيالىق شەشىمدەردى پايدالاندىق (قازاقستاندا مۇنداي ءوندىرىس بولعان جوق), كەي تۇسىن ءوزىمىزدىڭ ماماندار جەتىلدىردى. بۇل وسى جوباعا قاتىسقان وتاندىق مامانداردا ءتيىستى بىلىكتىلىك دەڭگەيى مەن كەز كەلگەن تەحنولوگيانى بەيىمدەي الاتىن كاسىبيلىك بار دەگەندى بىلدىرەدى. ERG-دا سونداي جوعارى دارەجەلى ينجەنەر مەن تەحنولوگتەردىڭ بار ەكەنىن دە ماقتانىش ەتەمىز. ارينە، ارنايى كوكستى دايىن كۇيىندە ساتىپ العانعا قاراعاندا ءبىرشاما قىمبات. دەگەنمەن بۇل مەن ايتقان جۇمىس ىستەپ تۇرعان جانە جاڭادان قۇرىلعان كاسىپورىنداردى جاڭعىرتۋ عانا ەمەس، ۇزاق مەرزىمدى باسىمدىقتار تۇرعىسىنان وندىرىستىك ۇدەرىستى قايتا قارايتىن «يندۋستريالدى مودەرنيزم» ساياساتىمەن ۇيلەسەتىن رەينۆەستيتسيا ستراتەگياسىن مەڭزەيدى»، - دەيدى «Eurasian Resources Group» (ERG) ديرەكتورلار كەڭەسىنىڭ توراعاسى شۋحرات يبراگيموۆ (دەرەككوزى: egemen.kz. 22.10.2024).

ERG قۇرامىنداعى «شۇباركول كومىر» اق جاڭا ارنايى كوكستى وندىرەتىن زاۋىتى 2024 جىلى جوبالىق قۋاتقا جەتىپ، 478 000 توننا ءونىم شىعارعان. بۇل جوسپارلى كورسەتكىشتەن ايتارلىقتاي جوعارى ناتيجە سانالادى.

«زاۋىتتا وندىرىلەتىن سپەتسكوكس يمپورتقا تاۋەلدىلىكتى ازايتۋعا مۇمكىندىك بەرەدى. قازىر نارىقتا مۇناي، بەلسەندىرىلگەن كومىر، تەحنيكالىق كومىر، مەتانول جانە كاربوناتتار سياقتى قايتا وڭدەلگەن ونىمدەرگە سۇرانىس جوعارى. بولاشاقتا وسى ونىمدەر قاتارى كەڭەيتىلەتىن بولادى. ءبىز كومىردى تولىق تسيكلمەن وڭدەپ، بولاشاقتا كومىردەن — كوكس، كوكس ارقىلى — گاز، گازدان — ەلەكتر ەنەرگياسى الۋدى ماقسات ەتىپ وتىرمىز»، - دەيدى «شۇباركول كومىر» اق كاسىپورىننىڭ باس ديرەكتورى سەرگەي كيم.

ارتاراپتاندىرىلعان ءوندىرىس: «شۇباركولدىڭ» ونىمدەرى

قازىرگى تاڭدا «شۇباركول كومىر» تەك قانا كومىر قازىپ، ونى قازاقستاننىڭ ىشكى نارىعىنا جانە سىرتقا ەكسپورتتاپ وتىرعان جوق. سونىمەن قاتار، ءوندىرىستى ءارتاراپتاندىرۋ بويىنشا كومىر ونەركاسىبىن مەيلىنشە دامىتىپ، كومىردەن ءتۇرلى ونىمدەر الۋدا. سولاردىڭ ءبىرسىپىراسى مىنەكەيىڭىز:

1) «شۇباركول كومىر» وندىرىستىك الاڭىندا نەگىزگى ونىمدەردەن باسقا، جىلىنا 72 مىڭ توننا كومىر شايىرى مەن كومىر مايى وندىرىلەدى. سونداي-اق، تاعى ءبىر اۋقىمدى جوبا – كوكس-حيميا تسەحىندا ارنايى كوكس ۇساقتارىنان بەلسەندىرىلگەن كومىر وندىرىلۋدە.

«بۇل قازىردىڭ وزىندە ءارتاراپتاندىرۋدىڭ ەكىنشى كەزەڭى، ويتكەنى ءونىمنىڭ قوسىلعان قۇنى كومىردىڭ قۇنىنان ەكى ەسە جوعارى. وبەكتتىڭ وندىرىستىك قۋاتى جىلىنا 1 مىڭ توننا بەلسەندىرىلگەن كومىردى قۇرايدى. كاسىپورىن جاڭا جانە تمد ەلدەرىندە بالاماسى جوق»، - دەيدى زاۋىت باسشىلىعى.

2) «شۇباركول كومىر» وندىرىستىك الاڭىندا 2022 جىلى گۋماتتار ءوندىرىسى باستالعان. بۇل – گۋميندى تىڭايتقىشتار (ناتري گۋماتى). ونىڭ شيكىزاتى شۇباركول كەن ورنىنىڭ توزعان كومىرلەرى. بۇل وندىرىستىك قالدىقتاردى قايتا وڭدەۋ ماسەلەسىن شەشۋگە كومەكتەسەتىن ماڭىزدى ەكولوگيالىق جوبا.

3) 2024 جىلى تىڭايتقىشتىڭ تاعى ءبىر ءتۇرى – كالي گۋماتى ءوندىرىسى بويىنشا جۇمىستار باستالدى. سونىمەن قاتار، كومىردى تەرەڭدەتە وڭدەۋدىڭ تاعى ءبىر باعىتى – كومىر شايىرى مەن كومىر شايىرىنىڭ قالدىقتارىنان كومىرتەكتى تالشىق ءوندىرۋ قاراستىرىلۋدا.

ەۋرازيالىق توپ ەلگە بەت بۇرا ما؟

ايتا كەتەيىك: 2000 جىلدىڭ قىركۇيەك ايىنان باستاپ «شۇباركول رازرەزى» ەۋرازيالىق ونەركاسىپتىك قاۋىمداستىقتىڭ،  ياعني ERG (ەۋرازيالىق توپ) قۇرامىنا قۇرامىنا كىرەدى.

وسى تۇستا اقيقاتىن ايتۋ پارىز: قازاق جۇرتىنىڭ ەۋرازيالىق توپقا قاتىستى كوزقاراسى ەكىۇشتى. ەسكى بيلىك تۇسىندا (نۇرسۇلتان نازارباەۆ) قازاقستاننىڭ ەسەپسىز تابيعي رەسۋرستارىنا ەركىن قول جەتكىزگەن الەكساندر ماشكەەۆيچ باستاعان ەۋرازيالىق ۇشتىكتىڭ ۇشار باسىنداعى مىرزالار قازاق جۇرتىنا قارايلاسقان جوق. اسىرەسە، ماشكەەۆيچتەر پاراللەل پاسپورتتارىنا ءھام ەكس-پرەزيدەنت نازارباەۆ كومانداسىنا ارقا سۇيەپ، قازاقتىڭ قازبا-بايلىعىنان تۇسكەن قىرۋار قاراجاتتى شەتەل اسىردى. سول ءۇشىن دە ەۋرازيالىق ۇشتىككە قازاق ەلى وكپەلى. وكپەسىن ايتقان قازاققا، قازاقستانعا ماشكەەۆيچتەر اۋەلى مىنەز كورسەتىپ: «قاجەت بولسا، بيزنەس-اكتيۆتەردى ساتىپ، ەلدەن كەتۋ قيىن ەمەس»، - دەگەنى دە ەسىمىزدە.

سۋرەت: egemen.kz

شۋحرات يبراگيموۆ: ينۆەستيتسيانى ۇلتتىق ەكونوميكاعا سالامىن!

دەسە دە، قازىر ERG (ەۋرازيالىق توپ) باسشىلىعى اۋىستى. «Eurasian Resources Group» (ERG) ديرەكتورلار كەڭەسىنىڭ توراعاسى بولىپ تاعايىندالعان شۋحرات يبراگيموۆ تاعايىندالدى. شۋحرات يبراگيموۆ باسشىلىققا كەلە-سالا: «ۇلتتىق ەكونوميكاعا ينۆەستيتسيا سالۋدى – باستى باسىمدىققا اينالدىرامىن»، - دەپ قازاق تىلىندە سۇحبات بەردى.

«قازاقستان ازاماتى رەتىندە ءوز ەلىمە، ۇلتتىق ەكونوميكاعا ينۆەستيتسيا سالۋعا باسىمدىق بەرەمىن. ءبىزدىڭ كاسىپورىنداردىڭ كوبى جانە باسىم قۋاتتىلىق قازاقستاندا ورنالاسقان. سوندىقتان بوگدە نىساندار ۇلەسىن تومەندەتە وتىرىپ وتاندىق ءوندىرىستى دامىتۋ جانە جاڭعىرتۋ – بىرەگەي تاڭداۋىمىز. قازاقستان زاۋىتتارىنا ERG ارقاشان باسىمدىق بەرگەن. مەنىڭ دە باستى ماقساتىم – ەلدەگى ءوندىرىستى ۇلعايتۋ. ءيا، ءبىز كومپانيانىڭ الدىڭعى ونجىلدىقتاعى دامۋ باعدارلاماسىن الماستىراتىن جاڭا قۇندىلىق، جاڭا ستراتەگيامەن جۇمىس ىستەيمىز. بۇل ستراتەگيانى «يندۋستريالدى مودەرنيزمنىڭ» ءبىر سيپاتى دەسەم بولادى، ياعني بايىرعى ءوندىرىس ورىندارىن قايتا جاراقتاندىرۋ جانە ءبىزدىڭ كومپانيادا بار باسەكەلى ارتىقشىلىقتى كۇشەيتەتىن جاڭا جوبالاردى قۇرۋ. سونىڭ ناتيجەسىندە مەملەكەت باسشىسى قاسىم-جومارت توقاەۆ ايتقان «ەكونوميكانىڭ ونەركاسىپتىك نەگىزىن» قالىپتاستىرامىز»، - دەدى شۋحرات ءادىلجانۇلى (دەرەككوزى: egemen.kz. 22.10.2024).

تاقىرىپقا تۇزدىق: وسى تۇستا ەۋرازيالىق ۇشتىكتىڭ وزگە دە ويىنشىلارىنا قاتىستى ورىس ءتىلدى باق-تا الىپ-قاشپا اڭگىمەلەردىڭ شەتى كورىنە باستادى. ماشكەەۆيچ پەن شوديەۆتەر اۋلەتى «ينۆەستيتسيانى قازاقستان ەكونوميكاسىنا سالامىن»، - دەگەن شۋحرات يبراگيموۆتىڭ باستاماسىن ىنتا-شىنتاسىمەن قولداي قويماسا كەرەك. ماشكەەۆيچ پەن شوديەۆتەر اۋلەتى ءوز ۇلەستەرىن وزگە شەتەلدىكتەرگە ساتىپ كەتۋ جايىن تالقىلاي باستاعانى ايتىلۋدا. ەگەر سولاي بولسا، الداعى ۋاقىتتا ەستىپ-بىلە جاتارمىز...

ازىرگە، «Eurasian Resources Group» (ERG) ديرەكتورلار كەڭەسىنىڭ توراعالىعىن تىزگىندەگەن شۋحرات ءادىلجانۇلى: «مەنىڭ عانا ەمەس، جاس بۋىننىڭ كوزقاراسى تۇرعىسىنان قاراساق، ءبىز بيزنەسكە بار نارسەنى جالعاستىرۋ ءۇشىن عانا ەمەس، جاڭا قۇندىلىقتار مەن تىڭ باعىتتار قالىپتاستىرۋ ءۇشىن كەلەمىز. الەم قاتتى وزگەردى. بىرەر جىل بۇرىن ويىمىزعا دا كەلمەگەن تاۋەكەلدەر مەن قاتەرلەر پايدا بولىپ جاتىر. زاماناۋي ءارى تابىستى كومپانيا رەتىندە مۇنداي قاۋىپ-قاتەردى بيزنەستى جاقسارتا ءتۇسۋدىڭ مۇمكىندىگى دەپ تۇسىنەمىز. كەم-كەتىگىمىزدى جويىپ، ارتىق تۇسىمىزدى نىعايتا تۇسەمىز. وزگەرىس – دامۋدىڭ اجىراماس بولىگى»، - دەپ وتىر.

ونىڭ قالاي ءجۇرىپ جاتقانىن «شۇباركول كومىر» كەنىنە اياقتاي بارىپ، كوز جەتكىزدىك. ونداعى ءوندىرىس قارقىنىنا، جۇمىسشىلارعا جاسالعان قامقورلىق پەن قولايلى جاعدايلارعا كوزىمىز تويىپ قايتتى...

نۇرگەلدى ابدىعانيۇلى

Abai.kz