مينيستر اقمارال ءالنازاروۆا: «حالىقتىڭ قالتاسىنان شىعاتىن شىعىنداردىڭ 51-52%-ى ءدارى-دارمەك ساتىپ الۋعا جۇمسالادى»

قر دەنساۋلىق ساقتاۋ ءمينيسترى اقمارال ءالنازاروۆا Jibek Joly تەلەارناسىنداعى ۋادە جوباسىنا ارنايى سۇحبات بەرىپ، دەنساۋلىق ساقتاۋ سالاسىنداعى وزەكتى ماسەلەلەردى تالقىلادى.

سۇحبات بارىسىندا مينيستر ءدارىحانا بيزنەسىنىڭ قارقىندى دامىپ جاتقانىنا نازار اۋداردى.

«بۇگىنگى تاڭدا ءدارىحانالاردى ۇستاپ تۇرۋ، وسى بيزنەسكە كىرۋ وتە پايدالى بولىپ تۇر. سەبەبى ءدارى-دارمەكتەردىڭ باعاسىن رەتتەۋ بۇيرىقتارى اينالىپ كەلىپ دەنساۋلىق ساقتاۋ مينيسترلىگىنە كەلەدى. ءبىزدىڭ ميسسيامىز – ءنورماتيۆتى قۇقىقتىق اكتىلەردى حالىق ءۇشىن، ەمدەۋ مەكەمەلەرى ءۇشىن جاساۋ»، – دەدى اقمارال ءالنازاروۆا.

مينيستر حالىقتىڭ جەكە شىعىندارىنىڭ قۇرىلىمىنا ناقتى تالداۋ جاسالعانىن اتاپ ءوتتى.

«حالىقتىڭ قالتاسىنان شىعاتىن شىعىنداردىڭ 51-52%-ى ءدارى-دارمەكتەردى ساتىپ الۋعا جۇمسالادى. 15-20%-ى ەمدەلۋگە، 30%-ى لابوراتوريالىق قىزمەتتەرگە كەتەدى. سوندىقتان ءبىزدىڭ نەگىزگى ماقساتىمىز – حالىقتىڭ قالتاسىنان شىعاتىن شىعىنداردى ازايتۋ», – دەدى مينيستر.

سۇحبات بارىسىندا ۋادە جوباسىنىڭ جۇرگىزۋشىسى، جۋرناليست ەربولات مۇحامەدجان ءدارىحانا بيزنەسىنىڭ دامۋىنا بايلانىستى پىكىر ءبىلدىردى.

«كەز-كەلگەن قالادا تۇرعىن ءۇي سالىنسا، بالاباقشا نەمەسە مەكتەپ ەمەس، الدىمەن ءدارىحانا پايدا بولادى. ءتىپتى، وسى سالاداعى كاسىپكەرلەردىڭ دەپۋتات بولىپ وتىرعانىن دا بىلەمىز»، – دەدى ول.

سۇحباتتا ءدارى-دارمەكتەردىڭ باعاسىن رەتتەۋ، حالىققا قولجەتىمدى مەديتسينالىق قىزمەت كورسەتۋ جانە دەنساۋلىق ساقتاۋ جۇيەسىن جەتىلدىرۋ تاقىرىپتارى جان-جاقتى تالقىلاندى.

سۇحباتتىڭ تولىق نۇسقاسى:

Abai.kz