ءبىر ەلدە وتە ەڭبەكقور، ءارى كوڭىلدى قۇمىرسقا ءومىر ءسۇرىپتى. ءار كۇن سايىن كۇنمەن تالاسا تۇرىپ، كوتەرىڭكى كۇيمەن اندەتىپ فيرماداعى جۇمىسىنا كەلەدى. جۇمىسىن وتە جاقسى كورەتىن، ءارى جاقسى كوڭىل-كۇيمەن باستالعان سوڭ جۇمىسى دا ءونىمدى ەدى. ءاردايىم جۇزىنەن كۇلكى كەتپەي ماڭايىنا كوتەرىڭكى كۇي سىيلاپ، ارىپتەستەرىمەن ءجيى ازىلدەسۋدى دە ۇمىتپايدى. قۇمىرسقانىڭ ارقاسىندا فيرمانىڭدا تاسى ورگە دومالاپ، العا ىلگەرىلەدى.

ءبىر كۇنى قۇمىرسقا ەڭبەك ەتىپ جاتقان فيرمانىڭ باس ديرەكتورى ارا، اياق استىنان قۇمىرسقانىڭ وسىنشا تابىسقا جالعىز ءجۇرىپ جەتۋى وتە كۇدىكتى، جانە ولاي بولۋى مۇمكىن ەمەس دەگەن ۇيعارىمعا كەلدى. سوندىقتان، قۇمىرسقانىڭ كۇندەلىكتى اتقارعان جۇمىسىن قاداعالاپ وتىراتىن باقىلاۋشى لاۋازىمى اشىلدى. باقىلاۋشى بولىپ — تەزەك قوڭىزى تاعايىندالدى. تەزەك قوڭىزى ءوزىنىڭ مىندەتىنە بىلەك سىبانا كىرىسىپ، قۇمىرسقادان كۇندەلىكتى اتقارىلعان جۇمىسىنا ەسەپ بەرىپ وتىرۋىن تالاپ ەتە باستادى.

ەندى فيرمادا قۇمىرسقانىڭ بەرگەن ەسەبىن تەزەك قوڭىزىنا جۇيەلەپ-رەتتەپ بەرىپ، قوسىمشا تەلەفونعا جاۋاپ بەرىپ وتىراتىن سەكرەتار لاۋازىمىنا دەگەن سۇرانىس پايدا بولدى. بۇل لاۋازىمدى ورمەكشى يەمدەنەدى.

ال كوڭىلدى ءارى ەڭبەكقور قۇمىرسقا ءبىر ءسات دامىل تاپپاي ءوز جۇمىسىن جالعاستىرا بەردى.

ارا ءوز كەزەگىندە تەزەك قوڭىزىنىڭ بەرگەن ەسەبىنە اسا ريزا بولعاندىقتان ماراپاتتاپ-كوتەرمەلەپ قويۋدى ەش ۇمىتپادى. سونىمەن قاتار، فيرمانىڭ بولاشاق دامۋ ساتىسىنا بولجام جاساۋ تۋرالى ۇسىنىس تاستادى. تەزەك قوڭىزىنا قوسىمشا تاپسىرما جۇتەلگەندىكتەن وعان اسسيستەنت-كومەكشى الۋ قاجەتتىلىگى تۋىندادى. اسسيستەنتتىك قىزمەتكە تاراقان شاقىرىلدى. اسسيستەنتتىڭ قىزمەتىنە قاجەتتى تەحنيكالار بىردەن ساتىپ الىندى.

كەنەتتەن ءاردايىم كوڭىلدى جۇرەتىن قۇمىرسقا كۇن وتكەن سايىن جيىلەپ كەتكەن ەسەپ بەرۋ مەن تاپسىرمانىڭ تىم كوبەيىپ كەتكەنىن ايتىپ، شاعىمدانا باستادى. كوڭىلسىزدىك باسىپ، جۇزىنەن كۇلكى ازايدى.

وسى ساتتە فيرمانىڭ باس ديرەكتورى ارا شۇعىل تۇردە ءبىر شارا قولدانىلماسا جاعدايدىڭ كۇرت قيىندايتىنىن سەزدى. دەرەۋ جينالىس اشىلىپ، اقىلداسا كەلە، قۇمىرسقا جۇمىس جاساپ جاتقان جەردەن تۇتاس دەپارتامەنت اشۋعا پارمەن بەرىلدى. دەپارتامەنت اشىلعان سوڭ، دەمەك ونىڭ باسشىسى بولۋ كەرەك. دەپارتامەنت باسشىلىعىنا شەگىرتكە قونجيدى. دەپارتامەنت باسشىسىنىڭ كابينەتىنە لاۋازىمىنا ساي بولۋى ءتيىس دەپ تابىلىپ، سوڭعى زاماناۋي ۇلگىمەن جابدىقتالدى.

ءبارى ريزا. تەك قۇمىرسقانىڭ عانا جۇزىنەن كۇلكى مۇلدە جوعالدى. مىنەزى وزگەرىپ، ءجيى اشۋلانىپ، كۇن وتكەن سايىن ەشكىممەن تىلدەسپەي تۇيىقتالا بەردى.

كۇندەردىڭ كۇنىندە فيرما ديرەكتورى كەزەكتى ەسەپتەردى تەكسەرە كەلە، قۇمىرسقا ەڭبەك ەتىپ جاتقان دەپارتامەنت قىزمەتىنىڭ بۇرىنعىداي ەمەس، تابىسىنىڭ تومەندەگەنىن ءتۇسىندى. تاعى جينالىس اشىپ، اقىلداسا كەلە، دەپارتامەنتتىڭ جۇمىسىنىڭ تومەندەپ كەتۋىنە تالداۋ جاساۋ ءۇشىن ۇكى شاقىرىلدى. ءۇش اي تالداۋ جاساعان ۇكى، دەپارتامەنتتە ەش پايداسى جوق قوسىمشا قىزمەتكەرلەر سانى كوپ دەگەن قورىتىندىعا كەلدى. كەڭەسشى ماماننىڭ كەڭەسىنە قۇلاق اسقان باس ديرەكتور قىزمەتكەر سانىن قىسقارتۋعا شەشىم قابىلدادى. ءتىزىمنىڭ باسىنا بىردەن قۇمىرسقانىڭ ەسىمى جازىلدى، ويتكەنى، كەيىنگى كەزدە ۇجىمدا تەك قۇمىرسقا عانا ءار نارسەگە كوڭىلى تولماي ۇنەمى نارازى بولىپ كۇڭكىلدەپ جۇرەتىن ەدى. سول...

ەرلان شاياحمەتۇلى

ينتەرنەتتەن اۋدارىلدى.

Abai.kz