ولجاس بەكتەنوۆ ساراپشىلارمەن ەكونوميكانى ودان ءارى دامىتۋ ماسەلەلەرىن تالقىلادى. بۇل تۋرالى ۇكىمەتتىڭ ءباسپاسوز قىزمەتى حابارلادى. 

پرەمەر-مينيستر ولجاس بەكتەنوۆ ەكونوميكا جانە كاسىپكەرلىك سالاسىنداعى ساراپشىلار قاۋىمداستىعىنىڭ وكىلدەرىمەن كەزدەستى.

كەزدەسۋدىڭ باستى ماقساتى – ەكونوميكانىڭ تۇراقتى وسۋىنە قول جەتكىزۋ بويىنشا ۇكىمەتتىڭ ەكونوميكالىق بلوگىنىڭ شارالارى مەن تاسىلدەرىن تالقىلاۋ. پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ەلىمىزدەگى قازىرگى ەكونوميكالىق جاعداي تۋرالى بايانداپ، ونەركاسىپتى دامىتۋ، ينفراقۇرىلىمدى جاڭعىرتۋ، وڭىرلەردە ءوسىمنىڭ جاڭا مۇمكىندىكتەرىن ىسكە قوسۋ جونىندەگى مىندەتتەردى شەشۋ ءۇشىن سالىق-بيۋدجەت رەفورماسىن جۇرگىزۋ تاسىلدەرىن ايتتى.

كەزدەسۋگە قاتىسۋشىلار مەملەكەتتىك قارجىنى تۇراقتاندىرۋ جانە ولاردى ءتيىمدى پايدالانۋ شارالارى بەكىتىلگەن جاڭا سالىق جانە بيۋدجەت كودەكستەرى جوبالارىن تالقىلادى.

كەزدەسۋ بارىسىندا «اتامەكەن» ۇكپ تورالقا توراعاسى رايىمبەك باتالوۆ، «قازاقستان ماشينا جاساۋشىلار وداعى» زتب باسقارما توراعاسى مەيرام پىشەمباەۆ، «تاۋ-كەن ءوندىرۋ جانە تاۋ-كەن مەتاللۋرگيا كاسىپورىندارىنىڭ رەسپۋبليكالىق قاۋىمداستىعى» زتب اتقارۋشى ديرەكتورى نيكولاي رادوستوۆەتس، «قازاقستاننىڭ قۇرىلىس سالۋشىلار قاۋىمداستىعى» زتب پرەزيدەنتى ۆيكتور ميكريۋكوۆ، «اتامەكەن» ۇكپ تورالقاسى فارماتسەۆتيكالىق، مەديتسينالىق ونەركاسىپ جانە مەديتسينالىق قىزمەتتەر كوميتەتىنىڭ توراعاسى نۇرجان وتارباەۆ، «قازاقستان قارجىگەرلەرىنىڭ قاۋىمداستىعى» زتب كەڭەسىنىڭ توراعاسى ەلەنا باحمۋتوۆا، «KAZENERGY» قازاقستان مۇناي-گاز جانە ەنەرگەتيكا كەشەنى ۇيىمدارىنىڭ قاۋىمداستىعى» زتب توراعاسى ماعزۇم مىرزاعاليەۆ ۇسىنىلىپ وتىرعان وزگەرىستەردىڭ ەكونوميكانىڭ ءتۇرلى سالالارىنا اسەرى تۋرالى ايتتى.

ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى ديرەكتورلار كەڭەسىنىڭ توراعاسى جاقسىبەك قۇلەكەەۆ، «NAC Analytica» كورپوراتيۆتىك قورى باسقارماسىنىڭ توراعاسى راسۋل رىسمامبەتوۆ، «Dasco Consulting group» جشس باسقارۋشى سەرىكتەسى دارمەن سادۋاقاسوۆ، «Fortune Partners» جشس باس ديرەكتورى، MNU سالىق قۇقىعى مەكتەبىنىڭ باسشىسى دانا توقمۋرزينا، قم مەملەكەتتىك قارجى جونىندەگى قوعامدىق كەڭەسىنىڭ توراعاسى رۋستام ءجۇرسىنوۆ، «كوممەنتاري» تالداۋ توبىنىڭ جەتەكشىسى، ەكونوميست ەلدار شامسۋتدينوۆ بايىپتى پىكىرلەرىن ورتاعا سالدى. سونداي-اق تالقىلاۋعا «تالاپ» قولدانبالى زەرتتەۋلەر ورتالىعىنىڭ ديرەكتورى راحىم وشاقباەۆ، «DESHT» تالداۋ ورتالىعىنىڭ جەتەكشىسى قۋانىش جايىقوۆ، ەكونوميست عالىمجان ايتقازين، تاۋەلسىز قارجى ساراپشىسى اندرەي چەبوتارەۆ، «Visor Kazakhstan» ينۆەستيتسيالىق كومپانياسىنىڭ باسقارۋشى سەرىكتەسى الماس چۋكين جانە باسقالار قاتىستى.

پرەمەر-مينيستر كەزدەسۋگە قاتىسۋشىلارعا سىندارلى ديالوگ ءۇشىن العىس ءبىلدىرىپ، ۇلتتىق ەكونوميكا، قارجى مينيسترلىكتەرىنە سالىق-بيۋدجەت سالاسىن رەفورمالاۋ ماسەلەلەرى بويىنشا ايتىلعان ۇسىنىستاردى پىسىقتاۋدى تاپسىردى.

«پرەزيدەنت ناقتى سەكتوردى دامىتۋدى كۇشەيتە وتىرىپ، ەكونوميكا قۇرىلىمىن وزگەرتۋ مىندەتىن قويدى. سوندىقتان تالقىلاناتىن رەفورمالار ەلىمىز ءۇشىن ماڭىزدى. سالىق-بيۋدجەت رەفورماسى ەكونوميكانى ودان ءارى دامىتۋ جونىندەگى جۇمىستى جەتىلدىرۋدىڭ پارمەندى تەتىگى بولماق»، — دەپ اتاپ ءوتتى ولجاس بەكتەنوۆ.

ۇكىمەت ەكونوميكالىق ءوسۋدى ىنتالاندىرۋدىڭ بارىنشا ءتيىمدى شارالارىن پىسىقتاۋ ءۇشىن ساراپشىلارمەن بەلسەندى تۇردە جۇمىس ىستەۋدى جالعاستىرۋدا.

Abai.kz