فرانس پرەسس اگەتتىگىنىڭ جازۋىنشا، اقش پرەزيدەنتى ترامپ فلوريدانىڭ وكىلدەر پالاتاسىنا سايلانعان رەسپۋبليكاشىل وكىلدەرى الدىندا سويلەگەن سوزىندە: "ماعان تاعىدا سايلاۋعا تۇسۋگە رۇقسات بەرىلمەيدى دەپ ويلايمىن. سولاي ما مايك؟ مەن ءسىزدى مۇنداي قىزۋ پىكىرتالاستىڭ ورتاسىندا قالدىرمايمىن", - دەگەن وكىلدەر پالاتاسىنىڭ سپيكەرى مايك دجونسونعا. ترامپ سونىمەن بىرگە: "مەن كەلەسى سايلاۋعا جەتەرلىك اقشا جينادىم. بىراق ونى پايدالانا الاتىنىما 100 پايىز سەنىمدى ەمەسپىن" - دەپ تە ايتقان.

بىرەر كۇن بۇرىن ترامپتى قولدايتىن تەننەسسي شتاتىنىڭ كونگرەسمەنى اقش كونستيتۋتسياسىنا وزگەرىس ەنگىزىپ، نەگىزگى زاڭدا بەلگىلەنگەن  ءتورت جىلدان ەكى رەتتىك پرەزيدەنتتىك مەرزىمدى - ءۇش رەت سايلانۋعا بولاتىن ەتىپ تۇزەتۋدى ۇسىنعان.

ەكىنشى مەرزىمىن ەندى عانا باستاعان ترامپتىڭ "بيلىككە دەگەن امبيتسياسى بۇرىننان بەلگىلى بولعان" - دەپ جازادى "نيۋ-يورك تايمس" گازەتى..

وتكەن جىلى مامىر ايىندا وتكەن "ۇلتتىق مىلتىق قاۋىمداستىعىنىڭ" (NRA) كونۆەنتسياسىندا سويلەگەن سوزىندە  "پرەزيدەنتدىكتىڭ ەكى نەمەسە ءۇش مەرزىمى تۋرالى سۇراۋىمىز كەرەك-اۋ؟!" - دەپ ويىن استارلاي جەتكىزگەن. 78 جاستاعى ميللياردەر شىلدەدە كونسەرۆاتيۆتى حريستيانداردىڭ جينالىسىندا: "مەن سايلاۋدا جەڭىسكە جەتسەم، ەندى قايتىپ داۋىس بەرىپ اۋرە بولمايسىڭدار" -  دەگەن...

قاراشا ايىندا پارتيالاستارىنا: "مەنىڭ تاعى دا سايلاۋعا تۇسۋگە مۇمكىندىگىم جوق."ترامپ پرەزيدەنتتىكتى كەرەمەت اتقاردى، قايتا سايلاۋدىڭ جولىن تابايىق"  دەپ سەندەر قولقا سالعاندا عانا، مۇمكىن",-  دەگەن.

1951-جىلى راتيفيكاتسيالانعان اقش كونستيتۋتسياسىنىڭ 22-ءشى تۇزەتۋىندە "ەشبىر ادام پرەزيدەنت بولىپ ەكى رەتتەن ارتىق سايلانا المايدى" دەپ بەكىتىلگەن.

ترامپتى قولدايتىن كونگرەسمەننىڭ كونستيتۋتسياعا پرەزيدەنتتىك مەرزىمگە بايلانىستى وزگەرىس ەنگىزۋ باستاماسى قولداۋ تاپپايتىن سياقتى. اقش كونستيتۋتسياسىنا تۇزەتۋلەر ەنگىزۋ ءۇشىن كونگرەستىڭ ۇشتەن ەكى داۋىسىن الۋ كەرەك، رەسپۋبليكاشىلدار ول مەجەگە جەتە الماۋى مۇمكىن، ودان بولەك اقش-تىڭ كەمىندە 38 شتاتىنىڭ ماقۇلداۋى كەرەك، بۇل دا قيىن شارۋا.

Abai.kz