Bloomberg-ءتىڭ جازۋىنشا: ترامپتىڭ بەيبىت جوسپارى - سوعىستى ۋاقىتشا توقتاتۋ. ياعني، تاراپتار مايدان دالاسىندا قاي جەرگە دەيىن جەتتى، سول جەردە توقتايدى.

ودان بولەك:

* رەسەي وككۋپاتسيالاعان تەرريتوريالار ماسكەۋدىڭ باقىلاۋىندا قالادى. بىراق، ول جەرلەردىڭ ستاتۋسى بەلگىلەنبەيدى;

* ۋكراينا رەسەيدىڭ قايتا شابۋىلداۋىن مۇلدە بولدىرمايتىنداي قاۋىپسىزدىك كەپىلىن الادى;

* ۇرىس قيمىلدارى اياقتالعان سوڭ، ۋكراينادا پرەزيدەنتتىك سايلاۋ وتكىزىلەدى.

قوسىمشا: بەيبىت جوسپاردى رەسمي تۇردە ترامپتىڭ ۋكراينا-رەسەي بويىنشا ارنايى وكىلى كيت كەللوگ تانىستىرماق! ەگەر رەسەي كەلىسىمگە كونبەسە، اقش جويقىن ەكونوميكالىق سوققى جاسايدى!

اقش-تىڭ بەيبىت جوسپارىنا قاتىستى اق ءۇي شەندىلەرىنىڭ پىكىرى قاققا جارىلعان. كيت كەللوگ باستاعان ءبىر توپ رەسەيگە قىسىمدى كۇشەيتۋ كەرەكتىگىن العا تارتسا، ەكىنشى تاراپ بۇعان قارسى پىكىردە.

بريتان ءجۋرناليسى پيرس مورگانعا سۇحبات بەرگەن ۋكراينا پرەزيدەنتى ۆلاديمير زەلەنسكي رەسەي پرەزيدەنتى پۋتينمەن جۇزبە-ءجۇز جولىعىپ، كەلىسسوز وتكىزۋگە كەتارى ەمەس ەكەنىن ايتقان.

پرەزيدەنت زەلەنسكي: «ەگەر بۇل بەيبىتشىلىككە قول جەتكىزۋدىڭ، سوعىستى توقتاتۋدىڭ، ميلليونداعان ادامنىڭ ءومىرىن ساقتاپ قالۋدىڭ جالعىز جولى بولسا، ءسوزسىز، مەن پۋتينمەن جۇزبە-ءجۇز كەلىسسوز وتكىزۋگە دايىنمىن! مەن وعان جىلى ەمەسپىن. ونى جاۋىم دەپ ەسەپتەيمىن. ول دا مەنى جاۋ سانايدى. بىراق، بۇل ماسەلەدە مەنىڭ وعان كوزقاراسىمنىڭ قالاي ەكەندىگى ماڭىزدى ەمەس»، - دەيدى.

رەسەي اتىنان بۇل جولى رف پرەزيدەنتىنىڭ ءباسپاسوز حاتشىسى دميتري پەسكوۆ سويلەپ: «ۆلاديمير زەلەنسكي ءىس جۇزىندە لەگيتيمدى پرەزيدەنت ەمەس. سوعان قاراماستان، رەسەي زەلەنسكيمەن كەلىسسوز جۇرگىزۋگە دايىن. زەلەنسكيدىڭ پرەزيدەنتتىگىنىڭ زاڭدىلىعى جاعىنان ءبىرسىپىرا ماسەلە بار. ونى ءبىزدىڭ پرەزيدەنتىمىز ۆلاديمير پۋتين دە بىرنەشە مارتە ايتتى. سولاي بولسا دا، ءبىز كەلىسسوزدەرگە اشىقپىز»، - دەدى پەسكوۆ.

Abai.kz