وسى اپتادا وتكەن ءماجىلىستىڭ جالپى وتىرىسىنان كەيىن قورعانىس ءمينيسترىنىڭ ورىنباسارى شايح-حاسان جازىقباەۆ كەنەسارى حان، سونىمەن بىرگە باسقا دا قازاق باتىرلارىنىڭ سوعىس تاكتيكاسى زەردەلەنىپ جاتقانىن ءمالىم ەتتى.

- بۇگىندە ءبىز كەنەسارى حاننىڭ سوعىس تاسىلدەرىن زەردەلەپ جاتىرمىز. ءار ساراپشىنىڭ ءوز ويى بار. كەنەسارى حان بەينەسىنىڭ قازاق اسكەرىنىڭ العىشارتى بولاتىنىن ۋاقىت كورسەتەدى. ودان بولەك ساعادات نۇرماعامبەتوۆ، باۋىرجان مومىشۇلى بار. ەرتە تاريحتاعى، ورتا تاريحتاعى، كەيىنگى تاريحتاعى سوعىس تاكتيكالارىن زەردەلەپ جاتىرمىز، - دەدى شايح-حاسان جازىقباەۆ.

انىعىندا ەكىنشى دۇنيەجۇزىلىك سوعىستا ەرەكشە قولباسشىلىق تالانتىمەن الەمگە ماشوقر بولعان باۋىرجان مومىشۇلى مەن ساعادات نۇرماعامبەتتىڭ ۇرىس تاسىلدەرى تاڭسىق ەمەس، ەجەلدەن قولعا الىنعان شارۋا دەسەك بولادى. ەكى باتىردىڭ اتىندا اسكەري وقۋ ورىندارى بار.

دەسە دە كەنەسارىنىڭ ءجونى بولەك. باس سۇيەگى ءالى كۇنگە رەسەيدە جاتىر.

2023 جىلى سول كەزدەگى ءماجىلىس دەپۋتاتى باقىتبەك سماعۇل كەنەسارى حاننىڭ باس سۇيەگىن رەسەيدەن ەلگە قايتارۋ ماسەلەسىن كوتەرگەن ەدى. ودان بەرى دە ەكى جىل ءوتتى.

بۇعان دەيىن اسكەري قاۋىپسىزدىك جونىندەگى ساراپشى ەمين دجابباروۆ «كەنەسارى حان - قازاق ارمياسىنىڭ سيمۆولىنا اينالۋى كەرەك» دەگەن بولاتىن.

- كەنەسارى حاننىڭ بارلاۋشىلارى بولعان جوق دەگەنگە اسكەري مامان رەتىندە سەنبەيمىن. ول قانداي دا ءبىر اقپاراتتى جەتكىزۋ كەرەك كەزدە نەنى قولداندى؟ قانداي كيىز ۇيدە كەزدەستى؟ قانداي دا ءبىر سيمۆولى نەمەسە ءبىر ەرەكشەلىگى بولدى ما؟ قانداي قۇپياسوزدەردى قولداناتىن؟ ونىڭ قولاستىنداعى بولىمشەلەر قالاي اتالدى؟ قالاي ولارمەن حات الماسىپ وتىردى؟ وزىمىزگە كەرەك سيمۆوليكانى نەگە سول كەزدەن المايمىز؟ ءبىزدىڭ تاريح نەگە كەڭەس وداعىنان باستالادى؟ سونىڭ ءبارىن كوتەرۋ كەرەك”، دەيدى اسكەري ساراپشى Dope Soz-گە بەرگەن سۇحباتىندا. مينيسترلىك وكىلىنىڭ جوعارداعى ءسوزى سوعان جاۋاپ رەتىندە ايتىلدى.

«قازاقستانداعى اسكەري جوعارعى وقۋ ورىندارىنداعى كۋرسانتتار ءبىرىنشى كۋرسقا كەلگەننەن باستاپ ورىسشا وقۋعا ءماجبۇر. اسكەري وقۋلىقتاردىڭ ءبارى ورىسشا وقىلادى. اۋىل بالالارى ونى قانشالىق يگەرىپ جاتقانىن كىم بىلەدى. قازاق ارمياسىن قازاقشا وقىتۋ قاشان باستالادى؟»، دەگەن ءتىلشى سۇراعىنا:

- قازاق ارمياسىن قازاقشا وقىتۋ باستالىپ كەتكەن. بۇگىنگى تاڭدا بارلىق وقۋ ورىندارىندا 70 پايىز قازاق تىلىندە ءبىلىم بەرىلەدى. ال وقۋلىقتارعا كەلەتىن بولساق، ءاربىر تەحنيكانىڭ پايدالانۋ نۇسقاۋىعى بار. ول ءالى كۇنگە دەيىن قۇندىلىعىن جوعالتقان جوق. سوندىقتان ونداي وقۋلىقتار بار», - دەپ جاۋاپ بەردى جازىقباەۆ. 

كەڭەس كەزىندە «قاراقشى» اتانعان كەنەسارى حاننىڭ ۇرىس تاكتيكالارىنىڭ اسكەري وقۋلىقتارعا ەنۋى حالىق كۇتكەن جاڭالىق بولارى ءسوزسىز.

Abai.kz