الماتى قالاسى ورتالىقتاندىرىلعان كىتاپحانا جۇيەسىنىڭ №32 كىتاپحانا بولىمشەسىندە قازاقستاننىڭ حالىق جازۋشىسى مۇحتار ماعاۋيننىڭ 85 جىلدىعىنا ارنالعان «حالقى سۇيگەن قالامگەر» اتتى ادەبي سايىس ءوتتى.

بۇل شاراعا ش.ءۋاليحانوۆ اتىنداعى №12 مەكتەپ-گيمنازياسىنىڭ (ديرەكتورى لاريسا ۋاتايقىزى) 9 «ب» سىنىپ وقۋشىلارى بەلسەندى قاتىسىپ، جازۋشى شىعارماشىلىعى بويىنشا ءوز بىلىمدەرىن سىنعا سالدى.

ادەبي سايىس «ادەبيەت ۆاگونى» دەپ اتالىپ، قاتىسۋشىلاردى بەس ءتۇرلى «ستانتسيادان» تۇراتىن تانىمدىق ساياحاتقا جەتەلەدى. ءار ستانتسيادا وقۋشىلارعا مۇحتار ماعاۋيننىڭ ءومىرى، شىعارمالارى، ادەبيەتتەگى ورنى، كوركەمدىك شەبەرلىگى جانە تاريحي تانىمى جونىندە سۇراقتار قويىلىپ، شىعارماشىلىق تاپسىرمالار بەرىلدى. بۇل سىننان سۇرىنبەي ءوتۋ ءۇشىن تەرەڭ ءبىلىم، تاپقىرلىق پەن وي ۇشقىرلىعى قاجەت بولدى.

سايىستىڭ ءادىل باعاسىن ادەبيەتتانۋ سالاسىنىڭ بەدەلدى ماماندارى بەردى:

باقىت ورازايقىزى – قازاق ءتىلى مەن ادەبيەتى ءپانىنىڭ مۇعالىمى، ادەبيەتتانۋشى، پروفەسسور، پسيحولوگيا عىلىمدارىنىڭ كانديداتى.

ءومارالى الىبەكۇلى – ادەبيەتتانۋشى، سىنشى، دۇنيەجۇزى قازاق قاۋىمداستىعى بىرلەستىگىنىڭ الماتى قالاسى بويىنشا باستىعى.

ولار قاتىسۋشىلاردىڭ جاۋاپتارىن مۇقيات تىڭداپ، ارقايسىسىنىڭ وي-ورەسىن، ادەبيەتكە دەگەن سۇيىسپەنشىلىگىن، شىعارماشىلىق قابىلەتىن باعالادى.

بۇل سايىسقا قاتىسقان وقۋشىلار – بولاشاقتىڭ تالانتتى ادەبيەتشىلەرى مەن ءسوز ونەرىنە جانى جاقىن جاندار ەكەنىن كورسەتتى. ولاردىڭ دايىندىعى مەن ىنتاسىنا سىنىپ جەتەكشىسى دجايكباەۆا اراي بولاتحانوۆنا  ەرەكشە ماقتانىشپەن قارادى. «سەن تۇر، مەن اتايىن» دەيتىن ءبىلىمدى دە العىر شاكىرتتەر سايىس بارىسىندا وزدەرىنىڭ جان-جاقتى ىزدەنىسى مەن ادەبي تالعامىنىڭ جوعارى ەكەنىن دالەلدەدى.

بايگەگە تۇسكەن بارلىق وقۋشىلار مىقتى دايىندىقپەن كەلگەندىكتەن، جەڭىمپازداردى انىقتاۋ وڭاي بولمادى. دەگەنمەن، جۇلدەلى ورىندارعا تومەندەگى وقۋشىلار يە بولدى:

I ورىن – جارمۇحان تامەرلان.

II ورىن – سەيداحمەت ارسەن، ارىستانبەك الان.

III ورىن – نۇرلان ءامينا، ۇلاش ءىنجۋ، امانباي اليا.

ولاردىڭ ارقايسىسى ادەبي بىلىمدەرىن، تالداۋ قابىلەتتەرىن، كوركەم ويلاۋ دەڭگەيلەرىن جوعارى دارەجەدە كورسەتە ءبىلدى.

سايىس بارىسىندا وقۋشىلار مۇحتار ماعاۋيننىڭ قالامگەرلىك قۋاتىن، تاريحي تانىمىن، ۇلتتىق رۋحتى دارىپتەۋىن تەرەڭىرەك ءتۇسىنىپ، ادەبيەتكە دەگەن سۇيىسپەنشىلىكتەرىن ودان ءارى ارتتىردى. بۇل شارا جاس ۇرپاقتى ادەبيەتكە باۋلىپ، قازاق رۋحانياتىنىڭ اسىل مۇرالارىن دارىپتەۋگە جاڭا سەرپىن بەردى. وسىنداي ءمان-ماڭىزى جوعارى سايىستار وقۋشىلاردىڭ شىعارماشىلىق قابىلەتىن شىڭداپ، ولاردىڭ بولاشاقتا قازاق ادەبيەتىنىڭ جاناشىرلارى بولۋىنا ىقپال ەتەرى ءسوزسىز.

ايجامال جولداسقىزى،

قالامگەر، كىتاپحاناشى

Abai.kz