قاراعاندىدا قازاقستان حالقى اسسامبلەياسىنىڭ 30 جىلدىعىن مەرەكەلەۋ باستالدى. مەرەيتويلىق كۇنگە جانە جۇمىسشى كاسىپتەرى جىلىنا وراي اقساقالدار كەڭەسى «ادال ازامات» جوباسىن ۇسىندى. جەڭىمپازدار جەتى نوميناتسيا بويىنشا ماراپاتتالدى. لاۋرەاتتار – ءارتۇرلى ماماندىق يەلەرى، ولار وزدەرىنىڭ كۇندەلىكتى ەڭبەگىمەن ءوڭىردىڭ جانە جالپى ەلدىڭ دامۋىنا ەلەۋلى ۇلەس قوسۋدا.

– ءبىز بارشاعا ماڭىزدى كۇن – قازاقستان حالقى اسسامبلەياسىنىڭ 30 جىلدىعىن اتاپ وتەمىز. قوعامداعى بىرلىك پەن بەيبىتشىلىك ءبىزدىڭ بارلىق جەتىستىكتەرىمىزدىڭ باستى كەپىلى بولعان جانە بولىپ قالا بەرەدى. اسسامبلەيانىڭ بارلىق قۇرىلىمدارى ەلىمىزدىڭ الەۋمەتتىك جانە قوعامدىق دامۋىنا وزدەرىنىڭ باعا جەتپەس ۇلەستەرىن قوسۋدا. بىراق، مەنىڭ ويىمشا، اقساقالدار كەڭەسىنىڭ ەرەكشە ورنى بار. اقساقالدار – ءبىزدىڭ حالقىمىزدىڭ دانالىعى، اقىلى، تاجىريبەسى عوي! – دەپ قاراعاندى وبلىسىنىڭ اكىمى ەرماعانبەت بولەكپاەۆ مەرەكەنىڭ سىيلى مەيماندارىن قۇرمەتپەن قارسى الدى.

قحا توراعاسىنىڭ ورىنباسارى، قر ءپا قحا حاتشىلىعىنىڭ مەڭگەرۋشىسى مارات ءازىلحانوۆ مەرەيتويلىق جىلدا 400-دەن استام ءىرى ءىس-شارا جوسپارلانىپ وتىرعانىن حابارلادى.

– بىرلىك پەن ەڭبەك  – ءبىزدىڭ قوعامىمىزدىڭ گۇلدەنۋىنىڭ نەگىزى. بۇل ءىس-شارالار ادامدار اراسىندا، ونىڭ ىشىندە ەڭبەك ادامىنىڭ جانىندا بولۋعا باعىتتالعان. ەڭبەك ادامدارىن قۇرمەتتەۋگە ارنالعان بۇگىنگى جوبا  – سولاردىڭ ءبىرى، – دەپ اتاپ ءوتتى ول.

ءوز قىزمەتىنىڭ ۇزدىكتەرىن قوعامدىق كوميسسيا تاڭدادى.

باس ماراپاتقا ەڭبەك ارداگەرى، بۇقار جىراۋ اۋدانىنىڭ قۇرمەتتى تۇرعىنى نەسىبەلدى دوسانوۆا يە بولدى. ول 17 جاسىندا ساۋىنشى بولىپ جۇمىسقا كىرىسىپ، 40 جىلداي ەڭبەك ەتتى. كوپ بالالى وتباسىندا ۇلكەندەردىڭ ءبىرى بولىپ، بەس بالانى ءوزى ءوسىردى. بۇگىندە نەسىبەلدى اپانىڭ 11 نەمەرە مەن 16 شوبەرەسى بار. ۇزاق ءومىر سۇرگەن انا كوپتەگەن ماراپاتتارعا يە بولعان. ول ەكى «ەڭبەك قىزىل تۋ» وردەنىن ەڭ قۇندى ماراپات دەپ سانايدى.

«ەرەن ەڭبەك يەسى» نوميناتسياسىن كەنشى، «شاحتەر داڭقى» يەگەرى نۇرلان ساتماعامبەتوۆ يەلەندى.

– ۇلى وتان سوعىسى كەزىندە مەنىڭ اجەم شاحتادا جۇمىس ىستەپ، كومىر ءوندىرىپ، ەرلەردىڭ ەڭبەگىن ءوز موينىنا الدى. اسكەردەن كەيىن ۋچيليششەدە وقىپ، «ستاحانوۆسكايا» شاحتاسىندا جۇمىس ىستەي باستادىم. مىنە، 36 جىلدان بەرى جەر استىندا ەڭبەك ەتىپ كەلەمىن. قازىر ءتۇسىپ كۇزەمباەۆ اتىنداعى شاحتادا بريگادا باسقارامىن. ءوز تاجىريبەمدى جاس جۇمىسشىلارعا ۇيرەتۋدەمىن، – دەدى لاۋرەات. – بۇگىن ماراپاتتالعانىم قۋانتادى. مۇنى كۇتپەگەن ەدىم. ءبىزدىڭ بريگادا كوپۇلتتى: وندا 37 ادام جانە بارلىعى ءتۇرلى ۇلت وكىلدەرى.

«ەرجۇرەك قۇتقارۋشى» نوميناتسياسىندا قۇتقارۋشى ماعاربي بۇزىرقاەۆتى اتاپ ءوتتى. قاراعاندى قالاسىنىڭ № 10 ءورت ءسوندىرۋ ءبولىمى باستىعىنىڭ ورىنباسارى تۇرعىن ۇيلەرگە جاقىن ورنالاسقان كاسىپورىندا گاز تسيستەرناسىنىڭ جارىلىسى كەزىندە ءورتتى سوندىرۋگە باسشىلىق ەتتى. وشاقتان 53 گاز باللونى شىعارىلدى. جەدەل جانە كاسىبي ارەكەتتەردىڭ ارقاسىندا ادام ءولىمىنىڭ الدىن الۋ مۇمكىن بولدى.

ماراپاتتالعاندار اراسىندا ءبىلىم بەرۋ، مادەنيەت، پوليتسيا قىزمەتكەرلەرى، ەرىكتىلەر ليگاسىنىڭ جەتەكشىسى بار.

مىسالى، تەمىرتاۋلىق پەداگوگ ۆياچەسلاۆ ۆارزين ءوز قالاسىندا ءبىرىنشى بولىپ بالالارعا روبوت تەحنيكاسىن ۇيرەتىپ، ينفورماتيكادان اۆتورلىق باعدارلاما مەن فيزيكادان عىلىمي-ادىستەمەلىك كەشەن ازىرلەدى. رەسپۋبليكالىق جانە حالىقارالىق جارىستاردىڭ جەڭىمپازدارىن تاربيەلەدى.

ءا. ساعىنوۆ اتىنداعى قاراعاندى تەحنيكالىق ۋنيۆەرسيتەتىنىڭ 20 جاسار ستۋدەنتى، بولاشاق ساۋلەتشى ارينا بەكپاەۆا مەكتەپتەن بەرى ۆولونتەرلىكپەن اينالىسادى.

راسىمگە رەسپۋبليكانىڭ تۇكپىر-تۇكپىرىنەن قحا اقساقالدار كەڭەسىنىڭ توراعالارى، سونداي-اق كورنەكتى مەملەكەت جانە قوعام قايراتكەرلەرى، اتاپ ايتقاندا ءسات توقپاقباەۆ، جامبىل ارتىقباەۆ، بۇركىتباي اياعان، ەتنوسارالىق قاتىناستاردى دامىتۋ كوميتەتىنىڭ توراعاسى عالىم شويكين كەلدى.

سالتاناتتى بولىمنەن كەيىن اقساقالدار كەڭەسىنىڭ رەسپۋبليكالىق وتىرىسى ءوتتى. اڭگىمە جاستاردى تاربيەلەۋدىڭ، وتباسى ينستيتۋتىن نىعايتۋدىڭ، ءداستۇرلى قۇندىلىقتاردىڭ ماڭىزدىلىعى تۋرالى بولدى. قاتىسۋشىلار سونداي-اق قازاقستان حالقى اسسامبلەياسىنىڭ اقساقالدار كەڭەسى باستاماسىمەن قولعا الىنعان «ادال ازامات» جوباسىن تالقىلادى.

Abai.kz