ۇكىمەت رەزەرۆىنەن وتاندىق شارۋالاردى قولداۋ ءۇشىن 116 ملرد تەڭگەدەن استام قاراجات ءبولىندى. پرەمەر-مينيستر ولجاس بەكتەنوۆ ءتيىستى قاۋلىعا قول قويدى.

قۇجات 2025 جىلعى 28 قاڭتاردا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسىنىڭ كوكتەمگى ەگىس پەن جيىن-تەرىم جۇمىستارىنا كەمىندە 700 ملرد تەڭگە كولەمىندە جەڭىلدەتىلگەن قارجىلاندىرۋدى قامتاماسىز ەتۋ بويىنشا بەرگەن تاپسىرماسىن ورىنداۋ شەڭبەرىندە قابىلداندى.

اتاپ ايتقاندا، اۋىل شارۋاشىلىعى تاۋار وندىرۋشىلەرىن قولجەتىمدى نەسيە ارقىلى قولداۋ جانە شارۋالاردىڭ قارجىلىق جاعدايىن تۇراقتاندىرۋ ماقساتىندا قاۋلىعا سايكەس ۇكىمەت رەزەرۆىنەن شامامەن 116 ملرد 772 ملن تەڭگە ءبولۋ قاراستىرىلعان.

قاراجاتتى 2025 جىلعى كوكتەمگى ەگىس جانە جيىن-تەرىم جۇمىستارىن ساپالى جۇرگىزۋ، سونداي-اق وتاندىق وندىرىستەگى اۋىل شارۋاشىلىعى تەحنيكاسىن ساتىپ الۋ ءۇشىن اوك سۋبەكتىلەرىن قارجىلاندىرۋعا باعىتتاۋ جوسپارلانعان. بۇل ءارى قاراي ەلىمىزدە وندىرىلگەن جانە قۇراستىرىلعان اۋىل شارۋاشىلىعى تەحنيكاسىن ساتىپ الۋدى قارجىلاندىرۋعا، كەيىن ونى ليزينگكە بەرۋگە، سونداي-اق «دامۋ» كاسىپكەرلىكتى دامىتۋ قورى» اق تاراپىنان نەسيە شارتتارىن كەپىلدەندىرۋ كەزىندە كوميسسيانى ارزانداتۋ ءۇشىن «اگرارلىق نەسيە كورپوراتسياسى» اق مەن «قازاگروقارجى» اق وبليگاتسيالارى بويىنشا كۋپوندىق سىياقىنى سۋبسيديالاۋ ارقىلى جۇزەگە اسىرىلادى.

ەسكە سالا كەتەيىك، مەملەكەت باسشىسىنىڭ 2024 جىلعى 7 اقپاندا وتكەن قر ۇكىمەتىنىڭ كەڭەيتىلگەن وتىرىسىندا بەرگەن تاپسىرمالارىن ورىنداۋ شەڭبەرىندە ۇكىمەت 2025 جىلعى كوكتەمگى ەگىس جانە جيىن-تەرىم جۇمىستارىن قارجىلاندىرۋدىڭ كولەمىن ارتتىرۋ ماقساتىندا العاشقى 100 ملرد تەڭگەنى 2024 جىلدىڭ جەلتوقسانىندا بولگەن بولاتىن.

Abai.kz