قارجىلىق مونيتورينگ اگەنتتىگى باس پروكۋراتۋرانىڭ ۇيلەستىرۋىمەن جانە ۇلتتىق قاۋىپسىزدىك كوميتەتىمەن بىرلەسە وتىرىپ، ىزدەۋدە بولعان سادۋاقاسوۆ ت.ح.-نى قازاقستان رەسپۋبليكاسىنىڭ اۋماعىنا جەتكىزدى.

قارجىلىق مونيتورينگ اگەنتتىگىنىڭ مالىمەتىنشە، سادۋاقاسوۆ اسا ءىرى كولەمدە الاياقتىق جاسادى جانە لاۋازىمدى تۇلعالارعا پارا بەرۋگە يتەرمەلەدى دەگەن كۇدىككە ىلىنگەن.

"2023 جىلعى شىلدە ايىندا سادۋاقاسوۆ ت.ح. مەن ادۆوكات قۇرمانباەۆ س.ن. وزدەرىنىڭ قىزمەتتىك بايلانىستارىن پايدالانىپ، دولگالەۆ ۆ.ي.-ءدىڭ ىسكەرلىك سەرىكتەستەرىنە قاتىستى سوتقا دەيىنگى تەرگەۋ باستاۋ ماسەلەسىن شەشۋدى ۇسىنعان.

اتالعان ماسەلەنى شەشۋ ءۇشىن سادۋاقاسوۆ ت.ح. مەن قۇرمانباەۆ س.ن.-عا زاڭسىز سىياقى رەتىندە 225 ملن تەڭگە بەرۋ جونىندە كەلىسىم جاسالعان. الايدا كۇدىكتىلەر پارانىڭ العاشقى بولىگى – 90 ملن تەڭگەنى العاننان كەيىن بۇل قاراجاتتى ءوز پايداسىنا جاراتقان جانە ءوز مىندەتتەمەلەرىن ورىنداماعان.

كەيىن سادۋاقاسوۆ ت.ح. قىلمىستىق جاۋاپكەرشىلىككە تارتىلۋدان قاۋىپتەنىپ، سوتتان جاسىرىنعان", - دەلىنگەن حابارلامادا.

حابارلامادا سادۋاقاسوۆتىڭ مەملەكەتتىك شەكارانى زاڭسىز كەسىپ وتكەنى، ونى وزبەكستان رەسپۋبليكاسىنىڭ شەكارا قىزمەتى وكىلدەرى ۇستاعانى ايتىلعان. سونداي-اق وعان قاتىستى شەكارانى زاڭسىز كەسىپ وتكەنى ءۇشىن قىلمىستىق ءىس قوزعالعان.

Abai.kz