“اۋىل" پارتياسى ساياسي كەڭەسى تورالقاسىنىڭ وتىرىسىندا جيگۋلي دايراباەۆتى پارتيا توراعاسىنىڭ ورىنباسارى قىزمەتىنەن بوساتۋ تۋرالى ءبىراۋىزدان شەشىم قابىلداندى.

سونداي-اق پارتيا ساياسي كەڭەسىنىڭ تورالقا وتىرىسىندا اقتوبە وڭىرلىك فيليالىنىڭ پارتيا جارعىسىن بۇزعانى تالقىلانىپ، وبلىستىق فيليال باسشىسىنا قاتاڭ سوگىس جاريالاندى.

جيگۋلي دايراباەۆ – ۇزاق جىلدار بويى اۋىل شارۋاشىلىعى سالاسىندا قىزمەت اتقارعان، ءماجىلىس دەپۋتاتى بولعان تاجىريبەلى ساياساتكەر. ونىڭ ەڭبەك جولى اۋىل شارۋاشىلىعى مەن مەملەكەتتىك قىزمەتتىڭ ءارتۇرلى سالالارىندا وتكەن.

پارتيا تاراپىنان ونىڭ قىزمەتتەن بوساتىلۋ سەبەبى تولىق اشىپ كورسەتىلمەسە دە، بۇل شەشىم ءبىراۋىزدان قابىلدانعانى اتاپ ءوتىلدى.

ايتا كەتەيىك، 26 اقپان كۇنى ءماجىلىستىڭ وتىرىسىندا  جيگۋلي دايراباەۆ سولتۇستىك قازاقستانعا بارىپ، باسقا مەملەكەتتە جۇرگەندەي سەزىنگەنىن ايتقان ەدى. مادەنيەت جانە ءبىلىم بەرۋ ماسەلەلەرى بويىنشا زاڭدارعا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن تالقىلاۋ بارىسىندا دەپۋتات  تىل ماسەلەسىن كوتەردى.

“يدەولوگياعا جاۋاپتى ازاماتتارعا سۇراق: بىزدە سولتۇستىك وڭىرلەردە ەلدىمەكەندەردىڭ، كوشەلەردىڭ اتاۋى قاشان مەملەكەتتىك تىلىمىزگە اۋىسادى؟ ماسقارا عوي، اينالايىندار، 34 جىلدان بەرى تاۋەلسىز قازاقستان مەملەكەتىندە ءومىر ءسۇرىپ جاتىرمىز. سولتۇستىك ايماققا سەنبىدە بارىپ قايتتىم. كىرسەم، باسقا ءبىر مەملەكەتتە جۇرگەن سياقتى سەزىنەسىڭ. ءبىزدىڭ ەشكىمگە وكپەمىز جوق. بىراق ءبىز قازاق ۇلتى مەملەكەت قۇراۋشى ۇلتپىز. نەگە بىزدە قازاقشا بولمايدى؟ كىم كەدەرگى؟ قاي جاققا سىزدەر قاراپ وتىرسىزدار؟ جان اۋىرادى كورگەندە”، – دەدى جيگۋلي دايراباەۆ.

مادەنيەت جانە اقپارات ۆيتسە-ءمينيسترى ايبەك سىدىقوۆ بۇدان بۇرىن مەملەكەت باسشىسىنىڭ تاپسىرماسىمەن تابيعي اپاتتار مەن باسقا دا فاكتورلارعا بايلانىستى اتاۋدى وزگەرتۋ پروتسەسى توقتاتىلعانىن ايتقان بولاتىن. بىراق  2024–2025 جىلدارعا ارنالعان جول كارتاسىندا بۇل ماسەلە باسىمدىققا يە بولىپ، ەلدى مەكەندەرگە جاڭا اتاۋلار بەرۋ جوسپارلانۋدا.

جيگۋلي دايراباەۆ 2015 جىلدان باستاپ – قازاقستان فەرمەرلەر وداعىنىڭ جامبىل وبلىستىق فيليالىنىڭ توراعاسى، 2019 جىلدان باستاپ – قازاقستان فەرمەرلەر قاۋىمداستىعىنىڭ توراعاسى، 2021 جىلى – جەر رەفورماسى جونىندەگى رەسپۋبليكالىق كوميسسيا توراعاسىنىڭ ورىنباسارى قىزمەتىن اتقاردى.

2023 جىلدان باستاپ – «اۋىل» پارتياسى اتىنان ءماجىلىستىڭ VIII شاقىرىلىمىنىڭ دەپۋتاتى، 2022 جىلى – قازاقستان پرەزيدەنتتىگىنە كانديدات بولدى. 

سونداي-اق، ول «اتامەكەن» ۇلتتىق كاسىپكەرلەر پالاتاسىنىڭ اگروونەركاسىپ كەشەنى كوميتەتىن باسقارعان.

دايراباەۆ اۋىل شارۋاشىلىعى مەن جەر رەفورماسى سالاسىنداعى قىزمەتىمەن دە تانىمال.

ەسكە سالايىق، 2023 جىلدىڭ ساۋىرىندە جيگۋلي دايراباەۆتىڭ ۇلدارى - مارات دايراباەۆ پەن ديدار مولداقالىق مەملەكەتتىك سۋبسيديالاردى ۇرلاۋمەن بايلانىستى الاياقتىق ءۇشىن سوتتالعان بولاتىن.

تاراز سوتى ولاردى «البيون» سورتىنىڭ قۇلپىناي كوشەتتەرىن ساتىپ الۋعا بولىنگەن قاراجاتتى جىمقىردى دەپ ايىپتى. مەملەكەتكە كەلتىرىلگەن جالپى شىعىن 550 ميلليون تەڭگەدەن استامدى قۇرادى. ەكەۋى دە مۇلكى تاركىلەنىپ، شارتتى تۇردە بەس جىلعا باس بوستاندىعىنان ايىرىلعان ەدى.

دەپۋتاتتىڭ ۇلدارىمەن بىرگە جامبىل وبلىستىق اۋىل شارۋاشىلىعى باسقارما باستىعىنىڭ بۇرىنعى ورىنباسارى ەرلان قۇلكەەۆ پەن كاسىپكەر ەلجان ەلىباي دا تەرگەۋگە الىندى. قۇلكەەۆ ءومىر بويىنا مەملەكەتتىك قىزمەتتە قىزمەت اتقارۋعا تىيىم سالىنىپ، التى جىلعا، ال ەلىباي مۇلكى تاركىلەنىپ، بەس جىلعا باس بوستاندىعىنان ايىرىلدى.

Adyrna.kz دەرەككوزى

Abai.kz