بۇگىن قازاقستان پرەزيدەنتى قاسىم-جومارت توقاەۆ بىرقاتار اۋىس-تۇيىستەر جاسادى. پرەزيدەنت جارلىقتارى اقوردا تەلەگرام ارناسىندا جاريالاندى.

سونىمەن، كىمدەر قانداي قىزمەتتەرگە تاعايىندالدى؟ قاراڭىز:
«مەملەكەت باسشىسىنىڭ جارلىعىمەن قانات بيسيمبايۇلى شارلاپاەۆ قازاقستان رەسپۋبليكاسى پرەزيدەنتىنىڭ ەكونوميكالىق ماسەلەلەر جونىندەگى كومەكشىسى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى»، - دەلىنگەن جارلىقتا.

«مەملەكەت باسشىسىنىڭ جارلىعىمەن اسەت ارمانۇلى ەرعاليەۆ قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى»، - دەلىنگەن جارلىقتا. بۇل قىزمەتتى وسىعان دەيىن جاندوس شايماردانوۆ اتقارىپ كەلگەن. ول قىزمەتىنەن بوساتىلدى.

«مەملەكەت باسشىسىنىڭ وكىمىمەن اباي سەرىكۇلى قايىربەكوۆ قازاقستان رەسپۋبليكاسى ىشكى ىستەر ءمينيسترىنىڭ ورىنباسارى – قىلمىستىق-اتقارۋ جۇيەسى كوميتەتىنىڭ توراعاسى لاۋازىمىنا تاعايىندالدى»، - دەلىنگەن جارلىقتا.

مەملەكەت باسشىسىنىڭ جارلىعىمەن ەرسايىن قايىرعازىۇلى ناعاسپاەۆ قازاقستان رەسپۋبليكاسىنىڭ ونەركاسىپ جانە قۇرىلىس ءمينيسترى لاۋازىمىنا تاعايىندالدى.

Abai.kz