«ءبىز ەلدى تۇزەۋدى بالا وقىتۋ ءىسىن تۇزەۋدەن باستاۋىمىز كەرەك» دەپ ۇلت ۇستازى احمەت بايتۇرسىنۇلى ايتقانداي، وقۋشىلاردىڭ وزىق بىلىممەن قاتار ونەگەلى تاربيە الۋى اسا ماڭىزدى.

ال ۇرپاق تاربيەسىنىڭ باسىندا اتا-انا، ۇستاز تۇرارى حاق. ماقسات مۇددەسى ورتاق ەكى تاراپتىڭ ىنتىماقتاستىعى بالا تاربيەسىن ءبىر باعىت، ءبىر مازمۇندا تاربيەلەۋگە، وتباسىلىق قارىم-قاتىناستىڭ نىعايۋىنا ءوز سەپتىگىن تيگىزبەك. وسى ورايدا سەمەيدەگى فيزيكا-ماتەماتيكا باعىتىنداعى نازارباەۆ زياتكەرلىك مەكتەبى تاربيە جۇمىسى بويىنشا  تاجىريبە تاراتۋ ماقساتىندا «وتباسى مەن مەكتەپ ىنتىماقتاستىعى – وقۋشى تابىسىنىڭ ماڭىزدى شارتى» اتتى اتا-انالار باستامالارىنىڭ پانوراماسى مەن كوشباسشىلار فورۋمىن ۇيىمداستىردى.

قوس ءىس-شاراعا 150-گە جۋىق قاتىسۋشى جينالدى. ولاردىڭ قاتارىندا تىرەك مەكتەپتەرى مەن يۋنەسكو قۇرامىنداعى مەكتەپتىڭ كوشباسشى وقۋشىلارى، مەكتەپ ديرەكتورلارىنىڭ تاربيە ءىسى جونىندەگى ورىنباسارلارى مەن ۇستازدارى، NIS سەمەي مەكتەبىنىڭ اتا-انالارى بار.

اشىلۋ سالتاناتىندا مەكتەپ ديرەكتورى ناركەن بۋركەنوۆ، اباي وبلىسى بويىنشا يۋنەسكو كلۋبتارىنىڭ وڭىرلىك ۇيلەستىرۋشىسى كۇلعازى رگەلوۆا، اتا-انالار كوميتەتىنىڭ ءتورايىمى اسەم جارىلعاسينا ءسوز سويلەپ، وتباسى مەن مەكتەپ اراسىنداعى قارىم-قاتىناستىڭ وقۋشى دامۋىنداعى ءرولىن اتاپ ءوتتى.

اتا-انالار باستامالارىنىڭ پانوراماسى جاسوسپىرىمدەر مەن ەرەسەكتەر اراسىنداعى قارىم-قاتىناس مادەنيەتى، بالالاردىڭ تۇلعالىق دامۋىنا قولداۋ كورسەتۋ مەن قازىرگى زامانعى ۇردىستەردىڭ وقۋشىلارعا اسەرى جايلى ماڭىزدى ماسەلەلەرگە باعىتتالعان 3 سەكتسيا بويىنشا جۇمىس ىستەدى.

- ءبىز تىرەك مەكتەبى رەتىندە بىرنەشە جىل قاتارىنان سەمەيدەگى زياتكەرلىك مەكتەپپەن بىرلەسە جۇمىس جاساپ، تاعلىمدامالار ارقىلى بىلىكتىلىگىمىزدى ارتتىرىپ كەلەمىز. بۇگىن، مىنە، وسى مەكتەپتەگى اتا-انالار قاۋىمداستىعىنىڭ ەرەكشەلىكتەرىنە، جاڭا باستامالارىنا كۋاگەر بولدىق. پانوراما ارقىلى قوس تاراپتىڭ ءوزارا ءىس-قيمىلىن، ءجاسوسپىرىم شاقتاعى بالالارعا قولداۋدىڭ ماڭىزدىلىعىن، جاڭا تەندەنتسيالاردىڭ وقۋشىلارعا اسەرى جايلى پىكىر الماسىپ، كەلەشەكتە مەكتەبىمىزدە وسى باعىتتاعى جۇمىستاردى جانداندىرۋ بويىنشا مول تاجىريبە جينادىق، - دەپ اتاپ ءوتتى قوجاگەلدى باتىر اتىنداعى ورتا مەكتەبى ديرەكتوردىڭ تاربيە ءىسى جونىندەگى ورىنباسارى امانگۇل سۇلتانبەكوۆا.

مەكتەپ پرەزيدەنتتەرى مەن ورىنباسارلارى باس قوسقان كوشباسشىلار فورۋمىندا  تايم-مەنەدجمەنت، ۆيرتۋالدىق كوشباسشىلىق، كوممۋنيكاتسيالىق داعدىلار جانە توپتىق جۇمىس سياقتى ماڭىزدى تاقىرىپتار تالقىلاندى.

Abai.kz