پوليتسيا قىزمەتكەرلەرىنىڭ بارلىق ارەكەتى كريزيستىك جاعدايلار جونىندەگى رەگلامەنت پەن نۇسقاۋلىققا قاتاڭ سايكەستىكتە ءوتتى.

ارنايى بولىمشەنىڭ بۇرىنعى كومانديرى ۇسەن ابىلباەۆ بۇگىن الماتى اۋەجايىندا بولعان رەزونانستىق وقيعاعا وسىلاي پىكىر ءبىلدىردى. ونىڭ ايتۋىنشا، مۇنداي جاعدايدا پسيحولوگ-كەلىسسوز جۇرگىزۋشى ءبىرىنشى بولىپ بايلانىس ورناتۋى ءتيىس.

پوليتسيا قىزمەتكەرلەرى اينالاداعى ازاماتتاردىڭ قاۋىپسىزدىگىن قامتاماسىز ەتۋ ءۇشىن بارلىق ساقتىق شارالارىن قابىلدادى. "قۇقىق قورعاۋ قىزمەتى تۋرالى" زاڭنىڭ 60-بابىنا، قر قىلمىستىق كودەكسىنىڭ 32-بابىنا ("قاجەتتى قورعانىس") جانە 34-بابىنا ("اسا قاجەتتiلiك") سايكەس ولار قارۋ قولدانا المادى، اسىرەسە جابىق كەڭىستىكتە. سونداي-اق، ولار قىزمەتتىك قارۋ-جاراقپەن جابدىقتالعاندىقتان، تۇتقىن ورنىنا ءوزىن ۇسىنۋ مۇمكىن بولمادى، – دەدى ۇسەن ابىلباەۆ.

ونىڭ ايتۋىنشا، مۇسا ءابدىرايىم پوليتسيامەن بىرلەسە ارەكەت ەتكەن. بۇل جاعدايدا ەڭ باستى مىندەت – جاعدايدىڭ ۋشىعۋىنا جول بەرمەۋ بولعان.

جابىق عيماراتتا قارۋ قولدانۋ ودان دا اۋىر زارداپتارعا اكەلۋى مۇمكىن ەدى. باقىتىمىزعا وراي، بۇل ازامات ءدال سول جەردە بولدى. ول وتە باتىل، ەرجۇرەك ادام ەكەن. مۇنداي شەشىمدى كەز كەلگەن ادام قابىلداي الماس ەدى. ول قىزدى بوساتىپ، ونىڭ ورنىنا ءوزى تۇتقىن رەتىندە بەرىلدى. ۆيدەودان كورىنىپ تۇرعانداي، قىلمىسكەر باسقالارمەن كەلىسسوز جۇرگىزە باستاعان ساتتە ەر ادام دەر كەزىندە ارەكەت ەتىپ، پىشاقتى تارتىپ الدى. بۇل ونىڭ جىلدام ويلاۋ قابىلەتىنىڭ ارقاسىندا مۇمكىن بولدى، – دەپ ءتۇسىندىردى ۇسەن ابىلباەۆ.

ايتا كەتەيىك، بۇگىن ساعات 11:45 شاماسىندا الماتى اۋەجايىنىڭ ىشكى رەيستەر تەرمينالىنا جولاۋشى كىرگەن. اۆياتسيالىق قاۋىپسىزدىك قىزمەتىنىڭ قىزمەتكەرلەرى ودان قۇجاتتارىن كورسەتۋدى سۇراعان. الايدا، ول تەكسەرۋ قىزمەتكەرىنىڭ شاشىنان ۇستاپ الىپ، پىشاقپەن قورقىتا باستاعان.

وسى كەزدە وقيعا كۋاگەرى ءوزىن تۇتقىن ورنىنا ۇسىندى. كەيىن ول پىشاقتى تارتىپ الىپ، قىلمىسكەردى زالالسىزداندىردى. وسى وقيعا بويىنشا قىلمىستىق ءىس قوزعالدى.

كەيىنىرەك پوليتسيا ۇستالعان ازاماتتىڭ بۇرىن اۆتوبۋس ىشىندە ايەلگە شابۋىل جاساعانى ءۇشىن سوتتالعانىن دا راستادى.

مەملەكەت باسشىسىنىڭ جارلىعىمەن ەكسترەمالدى جاعدايدا كورسەتكەن ەرلىگى مەن جانقيارلىعى ءۇشىن مۋسا سايرانبايۇلى ابدرايم "ەرلىگى ءۇشىن" مەدالىمەن ماراپاتتالدى.

بۇدان بولەك الماتى اۋەجايىندا ەرلىك جاساعان ادام تانىمال ءانشى باعلان ءابدىرايىموۆتىڭ تۋىسى بولىپ شىقتى.

دەرەككوزى: baq.kz

Abai.kz