«ادىلەت» پارتياسىنىڭ فيليالدارى قازاقستاننىڭ بارلىق وڭىرىندە قۇرىلادى
«ادىلەت» پارتياسىنىڭ II سەزىندە قابىلدانعان نەگىزگى شەشىمدەردىڭ ءبىرى پارتيانىڭ وڭىرلىك فيليالدارىن قازاقستاننىڭ بارلىق وڭىرىندە قۇرۋ جانە ەسەپتىك تىركەۋدەن وتكىزۋ، سونداي-اق «ادىلەت» پارتياسى فيليالى تۋرالى ەرەجەنى بەكىتۋ بولدى.
سەزد دەلەگاتتارى قازاقستاننىڭ بارلىق وبلىستارىن جانە رەسپۋبليكالىق ماڭىزى بار قالالاردى قامتيتىن تولىققاندى وڭىرلىك جەلىنى قالىپتاستىرۋ تۋرالى شەشىمدى بىرلەسكەن شەشىممەن ماقۇلدادى. بۇل قادام پارتيانىڭ ۇيىمدىق دامۋىنىڭ جاڭا كەزەڭىن باستاپ، ونىڭ وڭىرلەردەگى تۇراقتى قىزمەتىن قامتاماسىز ەتۋگە مۇمكىندىك بەرەدى.
پارتيا فيليالى تۋرالى ەرەجە جوباسىن تانىستىرعان پارتيا ساياسي كەڭەسى بيۋروسىنىڭ مۇشەسى جانە سەزد حاتشىسى گۇلزيرا اتاباەۆا قۇجاتتىڭ قابىلدانۋى پارتيانىڭ ۇيىمدىق نەگىزىن قالىپتاستىرۋدى اياقتاپ، وڭىرلىك قۇرىلىمداردىڭ قىزمەتىن ۇيىمداستىرۋدىڭ بىرىڭعاي قاعيداتتارىن ايقىندايتىنىن اتاپ ءوتتى. ونىڭ ايتۋىنشا، فيليالدار اۋماقتىق قاعيدات بويىنشا قۇرىلىپ، ءبىرتۇتاس پارتيالىق جۇيەنىڭ قۇرامداس بولىگى رەتىندە جۇمىس ىستەيدى.
«فيليال تۋرالى ەرەجە – پارتيانىڭ وڭىرلەردەگى جۇمىسى قالاي ۇيىمداستىرىلاتىنىن، اۋماقتىق قۇرىلىمداردىڭ قالاي قالىپتاساتىنىن، جەرگىلىكتى جەرلەردە شەشىمدەردىڭ قالاي قابىلداناتىنىن، سونداي-اق ءتارتىپ، باقىلاۋ جانە جاۋاپكەرشىلىك قالاي قامتاماسىز ەتىلەتىنىن ايقىندايتىن نەگىزگى قۇجاتتاردىڭ ءبىرى»، – دەدى گۇلزيرا اتاباەۆا.
پارتيا ساياسي كەڭەسىنىڭ مۇشەسى بۋريحان نۇرمۇحامەدوۆتىڭ ايتۋىنشا، مەملەكەتتىك تىركەۋ كەزەڭى اياقتالعاننان كەيىن پارتيا پراكتيكالىق ۇيىمدىق قۇرىلىس كەزەڭىنە كوشەدى.
«پارتيانىڭ بولاشاعى وڭىرلەردەگى جۇمىستىڭ ناتيجەسىنە تىكەلەي بايلانىستى. ازاماتتاردىڭ سەنىمى دە ءدال سول جەردە قالىپتاسادى. حالىق پارتيانى ناقتى ىستەرى، باستامالارى مەن ناتيجەلەرى ارقىلى باعالايدى. سوندىقتان وڭىرلىك قۇرىلىمداردى نىعايتۋ ءبىزدىڭ باستى مىندەتتەرىمىزدىڭ ءبىرى بولىپ تابىلادى»، – دەپ اتاپ ءوتتى بۋريحان نۇرمۇحامەدوۆ.
«دالا قىراندارى» جاستار پاتريوتتىق قوزعالىسىنىڭ وكىلى ءمادي رىمجانوۆ پارتيانىڭ دامۋىندا مىقتى وڭىرلىك ۇيىمداردىڭ ەرەكشە ءرول اتقاراتىنىن ايتتى.
«كەز كەلگەن ساياسي ۇيىمنىڭ شىنايى كۇشى ونىڭ حالىقپەن بىرگە بولا الۋىمەن، ولاردىڭ سۇرانىستارىن ەستۋىمەن جانە ەلىمىزدىڭ ءار وڭىرىندە ولاردىڭ مۇددەلەرىن ءتيىمدى بىلدىرە الۋىمەن ايقىندالادى»، – دەدى ءمادي رىمجانوۆ.
پارتيا ساياسي كەڭەسىنىڭ مۇشەسى دميتري پاۆلەنكونىڭ سوزىنشە، فيليالداردى قۇرۋ پارتيانىڭ ءتيىمدى جۇمىس ىستەۋى مەن ودان ءارى دامۋىنىڭ ماڭىزدى شارتى بولىپ تابىلادى.
«پارتيانىڭ وڭىرلىك جەلىسى ورتالىق پەن جەرگىلىكتى جەرلەردەگى ازاماتتار اراسىنداعى تىكەلەي بايلانىستى قامتاماسىز ەتەدى. بۇل كەز كەلگەن ساياسي كۇشتىڭ تۇراقتى دامۋى مەن ءتيىمدى جۇمىسىنىڭ بەرىك نەگىزى بولىپ تابىلادى»، – دەدى دميتري پاۆلەنكو.
ەرەجەنىڭ جەكە ءبولىمى اشىقتىق، ەسەپتىلىك جانە ىشكى باقىلاۋ ماسەلەلەرىنە ارنالعان. قۇجاتقا سايكەس، وڭىرلىك بولىمشەلەر قابىلداناتىن شەشىمدەردىڭ اشىقتىعى مەن پارتيا مۇشەلەرى جانە قوعام الدىنداعى جاۋاپكەرشىلىك قاعيداتتارى نەگىزىندە جۇمىس ىستەيتىن بولادى.
داۋىس بەرۋ قورىتىندىسى بويىنشا دەلەگاتتار پارتيا فيليالدارىن قۇرۋ تۋرالى شەشىمدى قولداپ، «ادىلەت» پارتياسى فيليالى تۋرالى ەرەجەنى ماقۇلدادى.
Abai.kz
