بۇگىن مادەنيەت جانە اقپارات مينيسترلىگى «قالا حيكايالارى» اتتى رەسپۋبليكالىق ادەبي بايقاۋىن جاريالادى.
بۇل بايقاۋ تاقىرىبى، مازمۇنى مەن جۇلدە قورىنىڭ كولەمى جاعىنان ادەبي ورتادا ەرەكشە نازار اۋدارتاتىن باستاما بولىپ وتىر.
بايقاۋ ەرەجەسىنە سايكەس، باس جۇلدە يەگەرى 100 مىڭ اقش دوللارىن، ءى ورىن العان اۆتور 75 مىڭ اقش دوللارىن، ءىى ورىن يەگەرى 50 مىڭ اقش دوللارىن، ال ءىىى ورىن العان قالامگەر 30 مىڭ اقش دوللارىن يەلەنەدى. بۇعان قوسا، ۇزدىك شىعارمالار 15 مىڭ دانامەن باسىلىپ، ەلىمىزدىڭ كىتاپحانالارىنا تاراتىلادى. بۇل – اۆتور ءۇشىن تەك قارجىلىق قولداۋ عانا ەمەس، وقىرمانعا كەڭىنەن جول تارتۋدىڭ دا ۇلكەن مۇمكىندىگى.
وسى بايقاۋ جاريالانا سالىسىمەن الەمدىك ادەبي سىيلىقتاردىڭ جۇلدە قورىمەن سالىستىرىپ، زەرتتەپ كوردىم. ناتيجەسىندە، «قالا حيكايالارى» بايقاۋىنىڭ جۇلدە قورى ايرىقشا جوعارى ەكەنى دالەلدەندى. ماسەلەن، الەمدەگى ەڭ بەدەلدى ادەبي ماراپاتتاردىڭ ءبىرى سانالاتىن پۋليتتسەر سىيلىعىنىڭ جەڭىمپازدارى 15 مىڭ اقش دوللارىن الادى.
بۇل جۇلدە اقش ادەبيەتى مەن جۋرناليستيكاسىنداعى ەڭ جوعارى ماراپاتتاردىڭ ءبىرى ەكەنىن ەسكەرىڭىز. ونىڭ اقشالاي كولەمى ەلىمىزدە جاريالانعان جاڭا بايقاۋدىڭ باس جۇلدەسىنەن شامامەن جەتى ەسە از.
ال اعىلشىن تىلىندەگى كوركەم ادەبيەت سالاسىنداعى ەڭ تانىمال ماراپاتتاردىڭ ءبىرى – بۋكەر سىيلىعىنىڭ جۇلدە كولەمى 50 مىڭ فۋنت ستەرلينگتى قۇرايدى. قازىرگى باعام بويىنشا بۇل شامامەن 65-70 مىڭ اقش دوللارىنا تەڭ. دەمەك، «قالا حيكايالارى» بايقاۋىنىڭ باس جۇلدەسى بۋكەر سىيلىعىنان دا جوعارى.
سول سياقتى اقش-تاعى بەدەلدى ۇلتتىق كىتاپ سىيلىعىنىڭ (National Book Award) جەڭىمپازدارى نەبارى 10 مىڭ اقش دوللارىن الادى. بۇل كورسەتكىش ءبىزدىڭ بايقاۋدىڭ باس جۇلدەسىنەن ون ەسە تومەن.
سول ءۇشىن جۇلدە كولەمى جاعىنان العاندا، «قالا حيكايالارى» بۇگىندە الەمدەگى ەڭ تانىمال ادەبي ماراپاتتاردىڭ باسىم بولىگىنەن جوعارى تۇرعان ادەبي جوبالاردىڭ ءبىرى بولىپ وتىر.
ادەتتە الەمدەگى كوپتەگەن ادەبي سىيلىقتاردا بەدەل مەن اتاق قارجىلاي ماراپاتتان ماڭىزدىراق سانالادى. الايدا شىعارماشىلىقپەن اينالىساتىن قالامگەر ءۇشىن ۋاقىت پەن ەڭبەككە لايىقتى ماتەريالدىق قولداۋ كورسەتۋ دە اسا ماڭىزدى. وسى تۇرعىدان كەلگەندە، «قالا حيكايالارى» ادەبي بايقاۋى حالىقارالىق تاجىريبەدە سيرەك كەزدەسەتىن دەڭگەيدەگى ىنتالاندىرۋ ۇسىنۋدا.
قازىر الەمنىڭ كوپتەگەن ەلدەرى ادەبيەتتى قولداۋدىڭ جاڭا تەتىكتەرىن ىزدەپ جاتقان تۇستا ەلىمىزدە جاريالانعان بۇل بايقاۋ مەملەكەتتىك دەڭگەيدە ادەبي شىعارماشىلىققا بەرىلگەن جوعارى باعانىڭ كورىنىسى بولماق. بۇل باستاما جاڭا رومانداردىڭ جازىلۋىنا سەرپىن بەرىپ قانا قويماي، قازاقستاننىڭ ادەبي كەڭىستىگىندە جاڭا ەسىمدەردىڭ پايدا بولۋىنا، قازىرگى قالا ءومىرىنىڭ كوركەم شەجىرەسىن جاساۋعا ىقپال ەتپەك.
بۇل بايقاۋ قازاقستاندا ادەبيەت پەن مادەنيەتتى قولداۋعا باعىتتالعان مەملەكەتتىك ساياساتتىڭ ناقتى كورىنىسى دەۋگە دە تولىق نەگىز بار. ەڭ الدىمەن ەل پرەزيدەنتىنىڭ، سونداي-اق قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا عالىمقىزى بالاەۆانىڭ ادەبيەت پەن مادەنيەت سالاسىنا دەگەن قولداۋىنىڭ جوعارى ەكەنىن اڭعارتادى.
مۇنداي اۋقىمدى قولداۋ قازىرگى قازاق ادەبيەتىنىڭ جاڭا بەلەسكە كوتەرىلۋىنە، تالانتتى قالامگەرلەردىڭ شىعارماشىلىقپەن ەركىن اينالىسۋىنا جانە جاڭا دا مازمۇنى باي ساپالى تۋىندىلاردىڭ دۇنيەگە كەلۋىنە جول اشاتىنى ءسوزسىز.

Abai.kz