الماتىدا رەسپۋبليكالىق «تازا قازاقستان» باعدارلاماسى مەن قالالىق «الماتى – ورتاق ءۇيىمىز» باستاماسى اياسىندا جىلجىمالى ەكوحاب ۇيىمداستىرىلدى، دەپ حابارلايدى Almaty.tv.

قالا تۇرعىندارى پلاستيكتى قايتا وڭدەۋ ۇدەرىسىمەن تانىسىپ، ەكولوگيالىق جاۋاپكەرشىلىك تۋرالى كوبىرەك ماعلۇمات الدى جانە پلاستيكالىق بۇيىمداردى فاندوماتقا وتكىزىپ، اقشالاي سىياقى الۋ مۇمكىندىگىن سىناپ كوردى.

Eco Network جوباسىنىڭ نەگىزىن قالاۋشى ەۆگەني مۇحامەدجانوۆ مۇنداي باستامالار قالا تۇرعىندارىنا ەكولوگيالىق ادەتتەردى سىڭىرۋگە كومەكتەسەتىنىن اتاپ ءوتتى:

"فاندوماتتار – بۇل پلاستيك قالدىقتارىنان قۇتىلۋدىڭ ىڭعايلى ءادىسى عانا ەمەس، سونىمەن قاتار قورشاعان ورتاعا سانالى كوزقاراستى قالىپتاستىرۋدىڭ قۇرالى. ءبىز ادامداردىڭ قاراپايىم ارەكەتى دە ەكولوگيانى جاقسارتۋعا ۇلەس قوسا الاتىنىن تۇسىنگەنىن قالايمىز. قالدىقتاردى قايتا وڭدەۋ ءبىر رەتتىك ەمەس، كۇندەلىكتى ءومىردىڭ ءبىر بولىگىنە اينالۋى ءتيىس. الماتى ەكولوگيالىق بولاشاققا قاراي قادام جاساپ كەلەدى، جانە بۇل – تەك باستاماسى!" – دەدى ول.

ءىس-شارا قوناقتارىنىڭ اراسىندا 5-سىنىپ وقۋشىسى ءىلياس احمەتوۆ تە بولدى.

"ەگەر ءار اۋلادا وسىنداي اپپاراتتار ورناتىلسا، ەشكىم پلاستيك بوتەلكەلەردى جاي عانا قوقىسقا تاستاماس ەدى. ەكولوگيا تۋرالى بۇرىن ويلانباعان دوستارىمنىڭ ءوزى قىزىعا باستادى. ءبىز مەكتەپتەن كەيىن پلاستيك جيناپ، ونى وتكىزىپ تۇرۋعا كەلىستىك", - دەيدى ول.

بۇل ەكوحاب الماتىلىقتار اراسىندا ەكولوگيالىق ادەتتى ناسيحاتتاۋعا باعىتتالعان تاعى ءبىر ماڭىزدى قادام بولدى. ۇيىمداستىرۋشىلار مۇنداي شارالاردى قوعامدىق ورىنداردا عانا ەمەس، ساۋدا ورتالىقتارىندا، ساياباقتاردا جانە قالالىق الاڭداردا وتكىزىپ، مۇمكىندىگىنشە كوپ ادامدى قورشاعان ورتانى قورعاۋ ىسىنە تارتۋدى جوسپارلاپ وتىر.

Abai.kz