ارمەنيا مەن ازەربايجان اراسىنداعى تاۋلى قاراباققا بايلانىستى كەلىسسوزدەر اياقتالىپ، قوس تاراپ بەيبىتشىلىك پەن مەملەكەتارالىق قاتىناستار تۋرالى كەلىسىمشارتتىڭ ماتىنىنە كەلىسىم بەردى، دەپ حابارلايدى inbusiness.kz سايتى.  

بەيسەنبى كۇنى ارمەنيا مەن ازەربايجان شەنەۋنىكتەرى 40 جىلعا جۋىق جالعاسقان قاقتىعىسقا نۇكتە قوياتىن بەيبىت كەلىسىم ماتىنىمەن جۇمىستىڭ اياقتالعانىن مالىمدەدى.

ەرەۆان مەن باكۋ اراسىنداعى تاۋلى قاراباققا قاتىستى اۋماقتىق داۋ 1980 جىلداردىڭ اياعىنان بەرى جالعاسىپ كەلە جاتىر.

تاۋلى قاراباق اۆتونوميالىق ايماعى ازەربايجان كسر قۇرامىنا ەنگەن بولاتىن. 1991 جىلدىڭ قىركۇيەك ايىندا تاۋلى-قاراباق رەسپۋبليكاسى قۇرىلدى.

ەكى ەل اراسىنداعى اۋماقتىق داۋ بىرنەشە قارۋلى قاقتىعىستارعا ۇلاسقان ەدى.

وسىعان دەيىن ازەربايجان پرەزيدەنتى يلحام اليەۆ باكۋدە وتكەن فورۋمدا سويلەگەن سوزىندە "ارمەنيانىڭ كونستيتۋتسياسىندا ازەربايجانعا قاتىستى ەشقانداي اۋماقتىق تالاپتار قالماۋى ءتيىس" دەگەن بولاتىن.

"ارمەنيا ازەربايجانمەن اراداعى كەلىسىمنىڭ مەرزىمدەرى مەن ورنىن تالقىلاۋعا دايىن", - دەلىنگەن ارمەنيا سىرتقى ىستەر مينيسترلىگىنىڭ مالىمدەمەسىندە.

ارمەنيا پرەمەر-ءمينيسترى نيكول پاشينيان ازەربايجانمەن اراداعى بەيبىت كەلىسىم جوباسىن كەلىسۋ ماڭىزدى وقيعا ەكەنىن باسا ايتتى.

Abai.kz