11-14 ناۋرىز ارالىعىندا ەلىمىزدە "ميگرانت" رەسپۋبليكالىق جەدەل-پروفيلاكتيكالىق ءىس-شاراسى وتكىزىلىپ، ناتيجەسىندە كوشى-قون زاڭناماسىن بۇزۋدىڭ 10 مىڭعا جۋىق فاكتىسى انىقتالىپ، 1240 شەتەلدىك ازامات ەلدەن شىعارىلدى.

بۇل تۋرالى قر ىشكى ىستەر مينيسترلىگىنىڭ ءباسپاسوز قىزمەتى مالىمدەدى.

4,5 مىڭ شەتەلدىك ازامات ەلدە بولۋ مەرزىمىن بۇزعان. 2,5 مىڭى زاڭسىز ەڭبەك قىزمەتىمەن اينالىسقان. ونىڭ ىشىندە 60 زاڭسىز تاكسي جۇرگىزۋشىسى بار. اتاپ كەتسەك، بۇعان دەيىن جۇرگىزىلگەن ارنايى وپەراتسيا كەزىندە 700-گە جۋىق زاڭسىز تاكسي جۇرگىزۋشىسى انىقتالعان بولاتىن. 1240 شەتەلدىك سوت شەشىمىمەن ەلدەن شىعارىلىپ، ولارعا بەس جىلعا قازاقستانعا كىرۋگە تىيىم سالىندى. زاڭ بۇزۋشىلاردىڭ باسىم بولىگى جاقىن شەت مەملەكەتتەن كەلگەندەر. بىراق ودان بولەك بانگلادەش، ەگيپەت، يتاليا، نيگەريا جانە ماداگاسكار ازاماتتارى دا انىقتالدى. ىزدەۋدە جۇرگەن 20 شەتەلدىك ۇستالدى. 2200 قابىلداۋشى تۇلعا شەتەلدىكتەردىڭ كەلۋى تۋرالى پوليتسياعا حابارلاماعانى ءۇشىن اكىمشىلىك جاۋاپكەرشىلىككە تارتىلدى. ولارعا 12 ملن تەڭگە ايىپپۇل سالىندى. 500 قازاقستاندىق جۇمىس بەرۋشىگە شەتەلدىكتەردى زاڭسىز جۇمىسقا تارتقانى ءۇشىن 33 ملن تەڭگە ايىپپۇل سالىندى. ولاردىڭ ىشىندە بەس تۇلعا وسىنداي ارەكەتتى بۇرىن دا جاساعان. قازىر بۇل ازاماتتار قىلمىستىق جاۋاپكەرشىلىككە تارتىلىپ جاتىر. شەتەلدىكتەرگە جالعان قۇجاتتار راسىمدەگەن قازاقستان ازاماتتارىنا قاتىستى 12 قىلمىستىق ءىس قوزعالدى. مىسالى، استانا قالاسىندا ءبىر ۋنيۆەرسيتەت جاتاقحاناسىندا كومەندانت 56 ەڭبەك ميگرانتىنا ستۋدەنت رەتىندە ۋاقىتشا تۇرۋعا رۇقسات بەرگەن. الماتى وبلىسىندا نوتاريۋستىڭ كومەكشىسى شەتەلدىكتەردى "جوق" مەكەنجايلارعا تىركەۋ ءۇشىن جالعان سەنىمحاتتار راسىمدەگەن. شەتەلدىكتەردىڭ كەلۋى تۋرالى حابارلاما بەرۋ، جەكە سايكەستەندىرۋ ءنومىرىن الۋ، داكتورەگيستراتسيانى ءوتۋ جانە ۋاقىتشا تۇرۋعا رۇقسات راسىمدەۋ ءۇشىن مەملەكەت تولەم المايدى. زاڭ مەن ءتارتىپتى ساقتاۋعا شاقىرامىز، – دەپ اتاپ ءوتتى ءىىم كوشى-قون قىزمەتى كوميتەتىنىڭ توراعاسى اسلان اتالىقوۆ.

بارلىق فاكتىلەر بويىنشا سوتقا دەيىنگى تەرگەۋ جۇرگىزىلۋدە. ءىىم ميگراتسيالىق زاڭنامانى ساقتاۋعا جانە شەتەلدىك قوناقتار مەن قازاقستان ازاماتتارىن كوشى-قون ماسەلەلەرى بويىنشا زاڭسىز قىزمەت كورسەتەتىن كۇماندى تۇلعالارعا جۇگىنبەۋگە شاقىرادى.

دەرەككوزى: qaz365.kz

Abai.kz