جاپونيادا ءوتىپ جاتقان V ازيا پارا ويىندارىندا قازاقستان ۇلتتىق قۇراماسى تاريحي ناتيجەگە قول جەتكىزدى.

وتاندىق پارا سپورتشىلار جارىستىڭ العاشقى ءۇش كۇنىندە 10 التىن مەدال جەڭىپ الىپ، ازيا پارا ويىندارىنداعى بۇرىنعى ۇزدىك كورسەتكىشىن جاڭارتتى. قازىرگى ۋاقىتتا ۇلتتىق قۇرامانىڭ قورجىنىندا 32 مەدال بار. ونىڭ 10-ى التىن، 10-ى كۇمىس جانە 12-ءسى قولا.

ەل قورجىنىنا التىن جۇلدەلەردى پارا نىسانا كوزدەۋدەن ەركىن عابباسوۆ، پارا پاۋەرليفتينگتەن داۆيد دەگتيارەۆ، پارا دزيۋدودان يبراگيم نۇرماحانۇلى، بەكسۇلتان قۇلمىرزا، اقتولقىن سەيىلبەكوۆا، زارينا رايفوۆا، شۋكۋربەكوۆ جۋرقامىرزا، پارا جۇزۋدەن دياس كەنجەبەك، پارا ۆەلوسپورتتان نايل ەرمۇحانبەت پەن اناستاسيا كالاۋس سالدى.

بۇعان دەيىن قازاقستان قۇراماسىنىڭ ەڭ جوعارى ناتيجەسى 2023 جىلى قىتايدىڭ حانچجوۋ قالاسىندا وتكەن IV ازيا پارا ويىندارىندا تىركەلگەن ەدى. ول كەزدە وتاندىق سپورتشىلار 8 التىن، 12 كۇمىس جانە 21 قولا مەدال يەلەنىپ، جالپى سانى 41 جۇلدەگە قول جەتكىزگەن. وسىلايشا، بيىل ۇلتتىق قۇراما التىن مەدال سانى بويىنشا بۇرىنعى رەكوردتى جاڭارتىپ، ەل سپورتىنىڭ تاريحىندا جاڭا بەلەسكە كوتەرىلدى.

بۇگىنگى جارىس كۇنى ءالى اياقتالماعانىن جانە الدا بىرنەشە جارىس كۇنى بار ەكەنىن ەسكەرسەك، سپورتشىلاردىڭ جۇلدە قورجىنىن ودان ءارى تولىقتىرۋعا مۇمكىندىگى مول.

بۇل جەتىستىك ەلىمىزدە پارا سپورتتىڭ قارقىندى دامىپ كەلە جاتقانىن جانە سپورتشىلارىمىزدىڭ حالىقارالىق ارەناداعى باسەكەگە قابىلەتتىلىگىنىڭ ارتقانىن كورسەتەدى.

تاريحي ناتيجە سپورتشىلار مەن جاتتىقتىرۋشىلاردىڭ قاجىرلى ەڭبەگىنىڭ، سونداي-اق پارا سپورتتى دامىتۋعا باعىتتالعان جۇيەلى مەملەكەتتىك قولداۋدىڭ جەمىسى.

ايتا كەتەيىك، بيىلعى ازيا پارا ويىندارىندا قازاقستان نامىسىن 150 سپورتشى قورعاپ جاتىر. جارىس 24 قازانعا دەيىن جالعاسادى.

Abai.kz