تۇركپا-نىڭ XV پلەنارلىق وتىرىسى اياسىندا قۇرىلتاي توراعاسى ازەربايجان رەسپۋبليكاسى ميللي ءماجىلىسىنىڭ توراعاسى ساحيبا گافاروۆامەن كەزدەستى.

– بۇگىندە قازاقستان مەن ازەربايجان – عاسىرلار بويعى دوستىق پەن ورتاق قۇندىلىقتار بىرىكتىرگەن ستراتەگيالىق سەرىكتەستەر ءارى سەنىمدى وداقتاستار. ەلدەرىمىز اراسىندا سەنىمدى ساياسي ديالوگ ورناعان، ءوزارا ءتيىمدى ساۋدا-ەكونوميكالىق جانە ينۆەستيتسيالىق ىنتىماقتاستىق قارقىندى دامىپ، مادەني-گۋمانيتارلىق بايلانىستار كەڭەيىپ كەلەدى. ەكىجاقتى قارىم-قاتىناستىڭ تابىستى دامۋ قارقىنىن پرەزيدەنتتەرىمىز قاسىم-جومارت كەمەلۇلى توقاەۆ مەن يلحام گەيدارۇلى اليەۆ ايقىنداپ وتىر، – دەدى ايبەك دادەباي.

قۇرىلتاي توراعاسى قازاقستان مەن ازەربايجان اراسىنداعى قارىم-قاتىناستى نىعايتۋدا پارلامەنتارالىق ءوزارا ءىس-قيمىلدىڭ ماڭىزدى ءرولىن دە اتاپ ءوتتى. وسىعان بايلانىستى ول ەكى ەل پارلامەنتاريلەرىنىڭ ىنتىماقتاستىق توپتارى مەن سالالىق كوميتەتتەر دەڭگەيىندە، سونداي-اق پارلامەنتارالىق ۇيىمدار اياسىندا تۇراقتى بايلانىس ورناتۋ قاجەتتىگىن ايتتى.

اڭگىمە بارىسىندا ازەربايجان تاراپىنا قازاقستاندا جۇرگىزىلىپ جاتقان رەفورمالار مەن ءبىر پالاتالى قۇرىلتايدىڭ جۇمىسى تۋرالى اقپارات بەرىلدى.

ءوز كەزەگىندە ساحيبا گافاروۆا قازاقستانداعى رەفورمالار ۋاقىت تالابىنا ساي، جوعارى دەڭگەيدە جۇزەگە اسىرىلىپ جاتقانىن اتاپ ءوتتى. ول سونداي-اق، قازاقستان مەن ازەربايجان كوشباسشىلارىنىڭ ءوز ەلدەرىنىڭ بولاشاعىنا قاتىستى كوزقاراستارى بارلىق جاعىنان ۇقساس ەكەنىنە، ال حالىقتارىمىزدى رۋحاني تۋىستىق پەن تاريحي تامىرلاستىق بايلانىستىراتىنىنا دا توقتالدى.

Abai.kz