ۋكراينانىڭ وتىزعا جۋىق وداقتاستارىنىڭ باسشىلارى بەيسەنبى كۇنى پاريجدەگى ەليسەي سارايىندا فرانتسيا پرەزيدەنتى ەممانۋەل ماكرون ۇيىمداستىرعان «ەرىكتىلەر كواليتسياسىنىڭ» سامميتىنە قاتىستى.

ولار ۋكراينانىڭ «قاۋىپسىزدىك كەپىلدىكتەرىن»، ونىڭ ىشىندە رەسەيمەن بولاشاقتاعى بەيبىتشىلىك كەلىسىمىن، ۋكرايناعا ەۋروپانىڭ بىتىمگەرشىلىك كۇشتەرىن ورنالاستىرۋ جايىن تالقىلادى. ماكروننىڭ ايتۋىنشا، سامميت ءۇش ساعاتتان استام ۋاقىتقا سوزىلعان.

ءسامميتتى ماكرون، زەلەنسكي، ستارمەر ۇشەۋى جۇرگىزگەن. ولار ءوز سوزدەرىندە ترامپتىڭ باستاماسىمەن اقش پەن رەسەي قاتىناسى جاقسارۋعا بەت الىپ، سوعىستى توقتاتۋ جايى تالقىلانىپ جاتقان ءولارا شاقتا «ۋكراينا مەن ەۋروپانىڭ داۋسى جارقىن ەستىلۋى كەرەك» دەپ اتاپ وتكەن.

زەلەنسكي: «اقش تارابى ورتاعا قويعان سوعىستى توقتاتۋ كەلىسىمىنە ءبىز ماقۇلدىق بەردىك. كرەمل ادەتتەگىدەي باس تارتتى. نەگىزسىز تالاپتار قويدى. قارا تەڭىزدە اتىستى توقتاتۋ دا سوعان جاتادى. ولار ورىنسىز تالاپتارىن وزگەگە نەگىزسىز تەلىپ وتىر»، - دەدى.

ول سونداي-اق: «قازىر رەسەيگە سالىنعان سانكتسيانى الىپ تاستاۋ – ديپلوماتيالىق اپات بولعالى تۇر. سانكتسيا كرەملدى كەلىسىم ۇستەلىنە وتىرعىزۋدىڭ باستى قۇرالدارىنىڭ ءبىرى. ودان باسقا قانداي امال بار؟ رەسەيدىڭ كەلىسىم شارتتى بۇزعانى ازداي، سانكتسيانى جەڭىلدەتسە، ونى قالپىنا كەلتىرۋ قيىننىڭ-قيىنى بولادى. ەلدىڭ سەنىمى دە جويىلادى. سوعىس جالعاسىپ جاتقاندىقتان، سانكتسيا دا جالعاسۋى كەرەك. سوندىقتان وداقتاستارىمنان كرەملگە سانكتسيانى كۇشەيتۋدى تالاپ ەتەمىن»، - دەدى.

ماكرون ءوزىنىڭ ترامپپەن تەلەفون ارقىلى سويلەسكەنىن، ونىڭ رەسەيدىڭ سوعىستى توقتاتۋعا كەلىسىم بەرەتىنىنەن ءۇمىتتى ەكەنىن ايتقان.

انگليا باسشىسى ستارمەر: «ۋكرايناعا قانداي كومەك كەرەك بولسا، ءبىز بارىنە دايىنبىز»، - دەگەن.

ساميت سوڭىندا ماكرون انگليا مەن فرانتسيا اسكەري وكىلدەرىنەن قۇرالعان دەلەگاتسيانىڭ الداعى بىرنەشە كۇندە كيەۆكە بارىپ، ۋكراينانىڭ بولاشاق اسكەرىن قۇرىلىمداۋ مەن سوعىس توقتاعاننان كەيىن ورنالاستىن بىتىمگەرشىلىك كۇشتەرىنىڭ دايىندىعىن پىسىقتايتىنىن جەتكىزدى.

ول سونداي-اق، رەسەيگە سالىنعان سانكتسيانى كۇشەيتەتىندەرىن، ەۋرووداق ۋكرايناعا ۇلكەن جەتىلىك بولگەن قارجىنى تەزىرەك بولۋگە دايىن ەكەنىن ايتتى.

سامميتتەن كەيىن زەلەنسكي جازبا جاريالاپ: «مەن جيىندا سوعىستىڭ ءالى جالعاسىپ جاتقانىن ايتتىم. وعان كىنالى ورىس تارابى.ولاردىڭ مايدانى وتە انىق: تىنباي سوعىسۋ، ۇزدىكسىز شابۋىلداۋ، سوزبالاڭعا سالۋ ديپلوماتياسى»، - دەدى.

سارسەنبى كۇنى اقش مەملەكەت ىستەر حاتشىسى رۋبيو: «سوعىستى توقتاتۋ وڭاي شارۋا ەمەس، ۋاقىت قاجەت ەتەدى»، - دەگەن ەدى.

Abai.kz