قر پرەمەر-ءمينيسترى
ولجاس بەكتەنوۆكە،

قر باس پروكۋرورى
بەرىك اسىلوۆقا!

وتكەن اقپان ايىندا قازاقستان قور بيرجاسىنىڭ (KASE) سايتىندا شىعىس قازاقستانداعى ءشۇلبى جانە وسكەمەن سۋ ەلەكتر ستانتسيالارى «سامۇرىق-ەنەرگو» مەملەكەتتىك كومپانياسىنىڭ اكتيۆىنەن شىعارىلعانى جونىندە حابار (Kapital.kz) تارادى. ەسكە سالا كەتەيىك، قازاقستاننىڭ ستراتەگيالىق نىساندارى ساناتىنا جاتاتىن بۇل گەس-تەردىڭ 100 پايىز اكتيۆى بۇعان دەيىن كۆازيمەملەكەتتىك كومپانيا ارقىلى ۇكىمەتتىڭ مەنشىگىندە ەدى.

وسىعان وراي مەنىڭ ەل پرەمەر-ءمينيسترى مەن قر باس پروكۋرورىنا بىرنەشە سۇراعىم بار. ۇلتتىق كومپانياعا جانە مەملەكەتتىڭ ستراتەگيالىق مەنشىگىنە قاتىستى وسى اقپاراتتىڭ انىق-قانىعى جونىندە ءتيىستى ۇكىمەتتىك ورگاندار قوعامعا نەگە تۇسىنىكتەمە بەرمەدى؟ «مەملەكەتتىڭ اكتيۆىنەن شىعارىلدى» دەگەن تىركەستىڭ ءمانىن قالاي تۇسىنۋگە بولادى؟

ياعني، ءبىز بۇنى اتالعان گەس-تەردىڭ مەنشىك يەسى وزگەردى دەپ ءتۇسىنۋىمىز كەرەك پە؟ وراسان زور قارجىلىق ءتۇسىمى اعىپ جاتقان وزەنمەن سۋ تەگىن كەلەتىن مەملەكەت ءۇشىن اسا پايدالى نىسانداردى مەملەكەت مەنشىگىنەن شىعارۋدىڭ لوگيكاسى قانداي؟ وزدىگىنەن اعىپ جاتقان سۋدان باسقا شىعىندى قاجەت ەتپەيتىن گەس-تەردى ساتۋدىڭ قانداي قاجەتتىلىگى بولدى؟ قر ۇكىمەتىنىڭ قاۋلىسى** (تومەندە قاراڭىز) بويىنشا جەكەشەلەندىرۋگە جاتپايتىن اسا ماڭىزدى بۇل ستراتەگيالىق-ەنەرگەتيكالىق نىساندار نەگە جانە قانداي اكتىلىك قۇجاتتاردىڭ نەگىزىندە ساتىلدى؟

ەكىنشىدەن، وسكەمەن جانە ءشۇلبى گەس-تەرىنىڭ ارقايسىسى قانشا سوماعا ساتىلدى؟ ەسكە سالا كەتەيىن، 2024 جىلعى كوكتەمدە بۇل ەكى ستراتەگيالىق نىساندى «سامۇرىق-ەنەرگو» كومپانياسى «سامۇرىق-قازىنادان» ساتىپ العاندا، ءشۇلبى گەس-ءى 36,2 ملرد-قا، وسكەمەن گەس-ءى 23,5 ملرد تەڭگەگە باعالانعان ەدى (جالپى جيىنى 59,7 ملرد تەڭگە).

قۇرمەتتى باس پروكۋرور مىرزا!

مەملەكەتتىك جانە ۇلتتىق ماڭىزداعى ستراتەگيالىق نىسانداردىڭ جەكە مەنشىككە ءوتۋ زاڭدىلىعىنا باس پروكۋراتۋرا قانداي باعا بەرە الادى؟

ۇشىنشىدەن، تاعى ءبىر اقپارات بويىنشا، بۇل گەس-تەردى اراب امىرلىگىندەگى «ابۋ-دابي ينۆەستورلار كونتسورتسيۋمى» دەپ اتالاتىن تۇسىنىكسىز قۇرىلىم مەنشىكتەندى دەگەن حابار بار. بەت-بەينەسى مەن ءتۇر-تۇرپاتى بەيماعلۇم بۇل قانداي كونتسورتسيۋم؟ ونىڭ قۇرامىندا كىمدەر نەمەسە قانداي قارجىلىق ينستيتۋتتار بار، الەمدىك نارىقتاعى ونىڭ تاريحى مەن قۇرىلىمدىق سترۋكتۋراسى قانداي؟

تورتىنشىدەن، ەلدىڭ شىعىسىنداعى ەلەكتر رۋبيلنيگىن ءبىر ءوزى عانا يەمدەنەتىن بۇل كونتسورتسيۋم قازاقستاننىڭ ۇلتتىق جانە ەنەرگەتيكالىق قاۋىپسىزدىگىنە قاتەر تۋدىرۋ تاۋەكەلى قانداي؟ الدا-جالدا الدەبىر قاتەرلەر تۋا قالعان جاعداي بولسا، بۇل رۋبيلنيك جالپ ەتىپ ءوشىپ قالمايتىنىنا قانداي كەپىلدىكتەر بار؟

وسى گەس-تەردى جەكەشەلەندىرۋدىڭ زاڭدىلىعىنان مەملەكەت باسشىسى قاسىم-جومارت توقاەۆ قانشالىقتى حاباردار؟

وسىعان ۇقساس ەكىنشى تاقىرىپ: جۋىقتا «ترانستەلەكوم» اكتسيونەرلىك كومپانياسى ءبىر قولدان ەكىنشى مەنشىك يەسىنە ساتىلدى. «ەسكىقازاقستاندىق» نەمەرە ءنۇرالي اليەۆتىڭ ورنىنا «جۋسان» كومپانيالار توبى، ياعني ناعاشى اتاسى نۇرسۇلتان نازارباەۆتىڭ مەنەدجەرلەرى كەلدى.

ەلدىڭ تەمىرجول ماگيسترالىن بايلانىسپەن، سەمافور شامدارمەن، ءىت-تەحنولوگيامەن جابدىقتايتىن بۇل كومپانيا دا مەملەكەتتىك ستراتەگيالىق نىسان سانالادى. بۇل ستراتەگيالىق نىسان قاي پرەمەر-ءمينيستردىڭ وكىمىمەن جانە قانداي قاۋلى-قۇجاتتىڭ نەگىزىندە جەكەشەلەندىرىلدى؟ 2017 جىلى مەملەكەتتەن نەبارى 9 ملرد تەڭگەگە جەكەشەلەندىرىلىپ الىنعان كومپانيانىڭ «جۋسانعا» ساتىلىمىنان قازاقستاندىق قازىناعا قانشا سالىق ءتۇستى؟

قازاقستان ۇكىمەتى مەن قر باس پروكۋراتۋراسى ماعان – دەپۋتات رەتىندە، قوعامعا – تۇتىنۋشى رەتىندە ءتيىستى اقپاراتپەن جاۋاپ بەرۋىن سۇرايمىن!

قر پارلامەنتى ءماجىلىسىنىڭ دەپۋتاتى

ەرمۇرات باپي

Abai.kz